1 Kurintu 12 - Manobo Western Bukidnon

Is Menge Ketau he Imbeg̵ey te Wag̵as he Mulin-ulin

¹ Menge suled, egkesuatan ku he mepurung niw mesavut ke hengkey sikan is menge ketau he imbeg̵ey keniyu te Wag̵as he Mulin-ulin.

² Netuenan niw he zengan te wazè kew pa meketuu ki Jesus ne zuen ebpengelintau keniyu he mekeazap kew te menge ledawan, ne pinaag̵i kayi te menge wazè dan gehinawa he ledawan ne layun egketazin dengan is menge isip niw.

³ Ne tenged kayi ibpesavut ku zaan keniyu he ke zuen etew he ed-ulinan te Wag̵as he Mulin-ulin, kenà egkehimu he egkeg̵iyen din he zait he edrewaken si Jesus, ne iring din ded daan kenà egkehimu he egkeg̵iyen din he Nengazen din si Jesus emun kenà pinaag̵i te ked-ulini kandin te Wag̵as he Mulin-ulin.

⁴ Ne haazà is menge ketau he ibeg̵ey kenitew te Wag̵as he Mulin-ulin, ne kenà ed-iiring-iring, iyan, sevaha zà is puunè dan he iyan is Wag̵as he Mulin-ulin.

⁵ Ne kenà daan ed-iiring-iring is ebpeveelan te Megbevayà te kada sevaha kenitew, iyan, umba edtumanen tew su wey tew mepenunuat sikandin is sebsevaha zà he Nengazen.

⁶ Sikitew is tumutuu, mezakel is ebpeveelan kenitew, iyan, iyan ed-ulin te kada sevaha kenitew is Megbevayà wey mehimu te kada sevaha is ebpeveelan kandin.

⁷ Ne kada sevaha kenitew te menge tumutuu, ne zuen imbeg̵ey kandin he ketau he iyan tuus he mid-ulinan sikandin te Wag̵as he Mulin-ulin. Umba imbeg̵ey haazà diyà te kandin su wey zin metevangi is menge zuma zin he tumutuu.

⁸ Ne ziyà te zuma ibeg̵ey pinaag̵i te Wag̵as he Mulin-ulin is ketau te kedseysey te tutuu he tuluuwen; ne ziyà te zuma pa ibeg̵ey pinaag̵i te g̵ehem te Wag̵as he Mulin-ulin is ketau te kedseysey te memezalem he ibpepenurù te Megbevayà.

⁹ Ne ziyà te zuma pa ne ibeg̵ey is utew meheg̵et he kedtuu ne is duma, ne ebeg̵ayan te g̵ehem su wey zin mevewii is menge egkengezeruwan. Ne egkehimu zan is iring kayi su iyan gihapun ed-ulin kandan is Wag̵as he Mulin-ulin.

¹⁰ Ne ziyè pa te sevaha, ibeg̵ey zaan te Wag̵as he Mulin-ulin is gehem wey mekehimu sikandin te menge egkengein-inuwan; ne ziyà te zuma pa ibeg̵ey is ketau te kedseysaya te impesavut kandin te Megbevayà; ne te zuma pa ibeg̵ey kandin is kegketueni te ed-ulin, ke ebpuun be te Megbevayà is ed-ulin wey ke mezaat he mulin-ulin ve haazà. Ne zuen daan menge etew he ebeg̵ayan te Megbevayà te ketau te kegkag̵i te kineg̵iyan he kenè dan egketuenan. Ne zuen daan menge etew he ibeg̵ey kandan is ketau te kedluwas duen te egkeg̵iyen kayi.

¹¹ Ne is langun kayi he menge ketau, ne ziyà ebpuun te Wag̵as he Mulin-ulin, minsan pa kayi te wazà med-iring-iring he ketau he ibeg̵ey zin sumalà is gustu zin he ibeg̵ey ziyà te kada sevaha.

Is Menge Parti te Lawa

¹² Ne minsan pa te kenà ed-iiring-iring is ketau he imbeg̵ey kenitew te kada sevaha, nesevaha kiw g̵ihapun su iring kiw te sevaha zà he lawa ni Kristu he mezakel is menge parti zin.

¹³ Ne sikitew is langun, Hudiyu se kenà Hudiyu, sulug̵uen se kenà sulug̵uen, ne pudu kiw mibewtismuwan te sevaha zà he Wag̵as he Mulin-ulin; ne pinaag̵i kayi nehimu kiw en he sevaha zà he lawa, ne mid-ulinan kiw pudu te sevaha zà he Wag̵as he Mulin-ulin.

¹⁴ Is lawa te etew ne sevaha zà he lawa, iyan, mezakel is menge parti zin.

¹⁵ Penenglitan ke ebpekekag̵i is paa, ne ke sikandin te, “Kenà a parti te lawa su kenè e man belad.” Ne minsan pa ke iyan heini egkekag̵i zin ne kenà egkehimu he kenà parti te lawa is paa.

¹⁶ Ne ke egkag̵i zaan is telinga ne ke sikandin te, “Siak, kenà a parti kayi te lawa su kenè e man mata.” Ne minsan pa zaan ke iyan heini egkekag̵i zin, parti zed gihapun sikandin te lawa.

¹⁷ Su emun ke pudu mata is lawa te etew ne kenà sikandin ebpekezineg. Ne emun pudu telinga, ne kenà ebpekehazek.

¹⁸ Meupiya su kenà iring dutun is kedlimbag̵a te Megbevayà su te kedlimbag̵a zin te etew, midlimbag din dutun te lawa te etew is langun he kenà ed-iiring-iring he egkinehenglanen din sumalà is egkesuatan te Megbevayà.

¹⁹ Su wazà lawa he sevaha zà he parti.

²⁰ Is lawa ta he midlimbag te Megbevayà, ne mezakel he parti, iyan, sebsevaha g̵ihapun he lawa.

²¹ Ne tenged kayi kenà egkehimu he egkag̵i is mata ziyà te velad te, “Sikew is belad, kenè ku sikew egkinehenglanen!” Ne iring din ded daan su is ulu, ne kenà egkehimu he egkag̵i ziyà te paa te, “Sikew is paa, kenè ku sikew egkinehenglanen.”

²² Su kenà egkehimu ke kenè ta egkeg̵amit haazà is menge parti te lawa ta he kunaan ta ke wazè ta zuen egkeg̵emitan.

²³ Ne is menge parti he iring kayi, iyan ebpurungan ta. Ne haazà is menge parti te lawa ta he kenà meupiya ke ed-ahaan, ne edtembunan ta te bisti.

²⁴ Ne haazà, kenè en pezem kinahanglan he edtembunan pa maan is parti te lawa he meupiya en he ed-ahaan. Umba iring kayi is kebeeli te Megbevayà te lawa ta su wey ta utew mepurungi is menge parti te lawa ta he henduen be te wazè din utew pulus.

²⁵ Midhimu te Megbevayà is menge parti te lawa ta su wey zan mesevaha ne pinaag̵i zutun ebpekedtetevangè dan.

²⁶ Ne ke egkezeruwan is sengeparti te lawa ta ne egkesekitan is tivuuk he lawa ta. Ne iring din ded daan ke ebpurungan is sengeparti ne igkezeyzey te tivuuk he lawa ta.

²⁷ Iyan kehulug̵an kayi te langun is: sikitew is menge tumutuu, ne menge parti kiw te lawa ni Kristu.

²⁸ Ne is tivuuk he menge tumutuu, mibeg̵ayan te Megbevayà is kada sevaha te kenà ebpeked-iiring-iring he ebpeveelan din. Iyan aney he vaal zin is: mibpilì din is menge etew he midhimu zin he menge epustul. Ikezuwa, imbeg̵ey zin diyà te zuma is ketau te kedseysey te impesavut te Megbevayà. Iketelu, ne mibeg̵ayan din is duma he menge etew te ketau te kebpenurù te lalag din, ne mibeg̵ayan din is duma te g̵ehem te kebpekehimu te egkein-inuwan. Ne is duma pa ne mibeg̵ayan din te g̵ehem te kebewii te menge egkengezeruwan. Ne mibeg̵ayan din daan is duma te ketau te kedtevangi zan te menge zuma zan. Ne is duma pa, ne mibeg̵ayan din te ketau te ked-uwita zan te menge tumutuu. Ne is duma pa, mibeg̵ayan din te ketau te kegkag̵i te kineg̵iyan he kenè dan egkesavut.

²⁹ Kenà egkehimu he is langun he menge tumutuu, ne pudu menge epustul wey kenà egkehimu he ebeg̵ayan is langun te ketau te kedseysey te impesavut te Megbevayà. Ne kenà daan egkehimu he ebpenurù is langun, ne kenà daan egkehimu he ebeg̵ayan is langun te g̵ehem te kebpekehimu te egkengein-inuwan.

³⁰ Ne iring din ded daan kenà egkehimu he ebeg̵ayan is langun te g̵ehem te kebpemawì te egkengezeruwan. Ne kenà daan ebeg̵ayan is langun te ketau te kegkag̵i te kineg̵iyan he kenè din egketuenan. Ne kenà daan egkehimu he ebeg̵ayan is langun te ketau te kedluwasa te egkeg̵iyen kayi te metau he egkag̵i te kineg̵iyan he kenè din egketuenan.

³¹ Itag̵ù niw ziyà te g̵ehinawa niw he iyan hustu he ebuyuen niw ziyà te Megbevayà sikan is menge ketau he utew zekelà is pulus din. Iyan, duen pa paag̵i he utew pa zekelà is pulus din.