1 Kurintu 11 - Manobo Western Bukidnon

¹ Ne tenged dutun, menge suled, iringi niw is ed-ul-ulahan ku, iring te ed-iringan ku zaan is mid-ulaula zengan ni Kristu.

Is Hustu he Ed-ul-ulahan te Kedsimba

² Duen ed-ul-ulahan niw he layun ku egkeg̵iya he utew meupiya he iyan is: wazè a keniyu melipati ne is impenurù ku keniyu ne edtumanen niw layun.

³ Ne zuen ku pa ibpesavut keniyu. Iyan is: iyan ebayàbayà te maama si Kristu. Ne is maama, ebeyveyaan din is esawa zin ne iyan ebayàbayà ki Kristu is Megbevayà.

⁴ Ne tenged kayi, ke edtig̵um kew ziyà te simbahan ke zuen maama he ed-ampù wey ke edseysayen din be is impesavut kandin te Megbevayà, kinahanglan he puwasa zin is kalù din ke egkekalù sikandin su emun kenè din ebpuwasen haazà ne henduen be te kenà iyan si Kristu is ebayàbayà kandin.

⁵ Ne ke zuen bahi he ed-ampù, wey ke edseysayen din be is impesavut kandin te Megbevayà, ne kinahanglan he zuen lembung te ulu zin su emun wazà, ne utew heini igkeeled te esawa zin he ebayàbayà kandin.

⁶ Su emun wazà lembung te ulu zin ne zeyzey ke ebengulan sikandin. Ne utew igkeeled te vahi ke ebpealut wey ke ebengulan. Ne emun egkeeled sikandin he ebengulan kinahanglan he zuen lembung te ulu zin.

⁷ Is maama mulà, ne kenà kinahanglan he egkekalù ke ed-ampù su alung sikandin te zagwey wey g̵ehem te Megbevayà. Ne is bahi, alung sikandin te zagwey te maama.

⁸ Umba egkeg̵iyen ku heini su haazà is nehuna he maama, ne wazà ianak te vahi, kekenà, midlimbag te Megbevayà. Ne haazà is nehuna he vahi, ne mibeelan te Megbevayà puun duen te lawa te nehuna he maama.

⁹ Ne iyan inlimbag̵a te Megbevayà te maama su kenà te wey zuen duma te vahi, kekenà, midlimbag din is bahi su wey zuen duma te maama.

¹⁰ Ne tenged kayi kinahanglan he zuen lembung te ulu te vahi su wey metueni te minsan menge velinsug̵uen te Megbevayà diyà te langit he ebpezumazuma is bahi te egkeg̵iyen te esawa zin.

¹¹ Ne minsan pa zutun, sikitew is menge tumutuu te Nengazen, maama wey se vahi, ne ebpeserserig̵è kiw. Ebpetavang is maama te vahi ne ebpetavang daan is bahi te maama.

¹² Su minsan pa ke ebpuun is nehuna he vahi zutun te lawa te nehuna he maama, iyan, guntaan id-anak is maama te vahi, asal, diyà ebpuun is minsan hengkey te Megbevayà.

¹³ Isipa niw man ke hengkey is meupiya. Netuenan niw en he kenà meupiya ke zuen bahi ziyà te simbahan he ed-ampù he wazà lembung te ulu zin.

¹⁴ Su puun pa te zengan dà ne netuenan tew he utew igkeeled te maama ke melayat is bulvul zin he iring te vahi.

¹⁵ Iyan, ke melayat is bulvul te vahi ne utew haazà meupiya he ed-ahaan. Umba imbeg̵ey kandin te Megbevayà is melayat he vulvul su wey mekelembung te ulu zin.

¹⁶ Ne ke zuen minsan hentei he kenè din edewaten is kedì he sambag kayi ne iyan tavak ku is: wazà duma he vetasan he ibpenurù dey. Ne is menge zuma he tumutuu ziyà te minsan hendei he inged, ed-ul-ulahan dan daan heini ke edsimba zan.

Is Kedlavung te Nengazen

¹⁷ Ne zuen pa egkeg̵iyen ku keniyu, ne iyan is: kenè ku egkesuatan is ulaula niw emun edtig̵um kew su kenà egkeheg̵et is kedtuu niw pinaag̵i te kedtig̵um niw, kekenà, henduen be te egkehugkà.

¹⁸ Nezineg ku he emun edtig̵um kew egkengevahinbahin kew ziyan ne ebpekunkuntedehè kew. Ne malu a kayi ebpeketuu.

¹⁹ Kinahanglan buwa he iyan heini egkehitavù keniyu ziyan su wey metueni ke hentei keniyu is egkeserig̵an te Megbevayà.

²⁰ Heeyan is kedtig̵um niw te kegkaan, kenà iyan paag̵i te kedtumana te Idlavung te Nengazen.

²¹ Umba egkeg̵iyen ku heini su zuen kun duma keniyu he leg̵ezen ne edhuna zan kun egkaan ne kenè dan edsemaan is menge zuma zan ne tenged dutun egkengevitil is duma. Ne kenà iyan dà haazà su ebpemelelangut is duma!

²² Maan is kenè kew ziyà egkaan te menge valey niw? Tenged keniyu te menge leg̵ezen egkengeeled is menge zuma niw he egkeayuayu ne egkezeetan niw is dengeg te tivuuk he tumutuu ziyan. Kunaan niw vuwa ke kenà utew ku igkeepes is ulaula niw he iring kayi! Kenè ku iyan egkesuatan is mid-ulaula niw.

²³ Umba egkeg̵iyen ku heini su is impenurù kediey te Nengazen, ne iyan daan impenurù ku diyan te keniyu. Iyan is: dutun te kezukileman te ked-ekali te Nengazen tew he si Jesus, hein edlavung dan, ne migkuwa ni Jesus is supas,

²⁴ ne mibpeselematan din te Megbevayà, ne mibpenevìtevì din ne ke sikandin te, “Iyan heini lawa ku he ibpemuhat wey kew melibri te silut. Layun niw heini keena te iring kayi he paag̵i su wey a keniyu kenà melipati.”

²⁵ Ne zutun hein nekekaan dan en, migkuwa ni Jesus is tasa he nepenù te inumen ne ke sikandin en maan te, “Heini is inumen, ne tuus te veg̵u en he paag̵i te kegkelibri he midtukud te Megbevayà ne egkehimu heini pinaag̵i te lengesa ku he ibpaag̵as. Ne emun ed-inumen niw heini is inumen te minsan keenu he timpu isipa a keniyu,” ke si Jesus.

²⁶ Ne taman te kenè pa ebpekelikù is Nengazen tew he si Jesus, emun ed-inumen niw heini is inumen wey egkeenen niw heini is supas, igkepeehè niw is kedsarig niw te kebpatey zin.

²⁷ Ne ke zuen egkaan kayi te supas te Nengazen ne ed-inum kayi te inumen din ne kenè din idtag̵ù diyà te g̵ehinawa zin ke hengkey is tutuu he kehulug̵an kayi, ne nekesalè en sikandin diyà te Nengazen tew su wazè din tehuza is lawa wey is lengesa te Nengazen.

²⁸ Ne tenged dutun kinahanglan he susiya te kada sevaha is kandin he g̵ehinawa ke tutuu ve is kedsarig din te kebpatey ni Jesus ne human egkehimu he egkaan wey ed-inum sikandin.

²⁹ Su ke wazè din isipa he alung te lawa wey lengesa ni Jesus haazà is ed-inumen din wey egkeenen din ne edsilutan sikandin te Megbevayà.

³⁰ Iyan heini hinungdan ke maan is egkezeruwan is mezakel keniyu. Mezakel zaan diyan is menge meluya is lawa zan ne mezakel zaan is nemematey su silut te Megbevayà.

³¹ Emun edsusiyen ta is kenita he g̵ehinawa, kenè ki en edsilutan te Megbevayà.

³² Iyan, is Megbevayà, edsusiyen kiw zin guntaan is menge tumutuu ne edsilutan kiw zin su wey kiw mepenurù. Ne zutun kenè kiw zin en egkesilutan keuzemà ragkes te menge kelibutanen he etew he wazà medtuu kandin.

³³ Na, menge suled ku, emun edtig̵um kew te kegkaan te Idlavung te Nengazen, teg̵azi niw is menge zuma niw.

³⁴ Ne ke zuen egkevitil, kinahanglan he ziyà sikandin mebpekehantey te valey zin su wey kenè kew mesiluti te Nengazen ke egkesupak niw is intelaan din mehitenged dutun te kedtig̵um niw. Ne zuen pa zuma he selembag̵an ku keniyu, ne wey ku en heini edseysaya ke ebpekeuma a ziyan.