1 Kurintu 10 - Manobo Western Bukidnon

Menge Petizaan

¹ Egkesuatan ku, menge suled, he metueni niw ke hengkey is neulaula zengan te menge kepuun dey te menge Hudiyu he nemenduma ki Moises. Su mibpeyungan sikandan te g̵apun he iyan tuus he mibulus diyà te kandan is Megbevayà, ne midrapas dan is dag̵at he migngezanan te Merig̵à, ne wazà nelened kandan.

² Ne heini is neulaula zan, ne iring te nebewtismuwan sikandan pinaag̵i zutun te g̵apun wey zag̵at su wey zan mekesundan ki Moises.

³ Ne sikandan is langun, ne nekekaan dan te egkeenen he imbeg̵ey te Megbevayà

⁴ ne nekeinum dan te inumen he imbeg̵ey zin daan su is langun te sikandan, ne nekeinum te wahig he ebpuun diyà te vatu he impaahà kandan te Megbevayà. Ne haazà is batu, ne iyan si Kristu he kenà edsuwey kandan.

⁵ Ne minsan pa te zekelà is tavang kandan te Megbevayà, wazà ikesuat te Megbevayà is ulaula te kezekelan kandan, ne tenged kayi nemematey zan dutun te tanà he mezelag ed-uzani he imbayè dan.

⁶ Umba nehitavù diyà te kandan heini is langun su wey kiw meleg̵uyi ke hengkey is egkehitavù kenitew ke egkesuatan tew te ed-ulaula is iring te mid-ulaula zan he mezaat.

⁷ Kenè tew ed-ezapen is kenà hustu he ed-ezapen he iyan ulaula zan dengan su zuen insurat he Lalag te Megbevayà he edhenduen te, “Mid-erungutan dan su egkeenen dan wey ed-inumen dan is impemuhat dan, ne neipus haazà ne midsayew zan.”

⁸ Ne elin daan mid-ulaula zan dutun is egkevuten dan is kenè dan esawa. Ne sikitew, kenè tew heini ed-iringan su midsilutan sikandan te Megbevayà ne keluwaan wey tetelu he libu is nemematey kandan te sengeandew zà.

⁹ Ne kenè tew zaan egezaman is ked-entusa kenitew te Megbevayà su iyan heini mid-ulaula te zuma kandan ne iyan silut kandan dutun is: mibpendunghul sikandan te menge uled ne nemematey zan.

¹⁰ Ne kenè tew zaan edtemudmuzan is menge egalen he imbeg̵ey kenitew te Megbevayà su iyan mid-ulaula te zuma kandan ne zutun duen belinsug̵uen he midsug̵ù te Megbevayà he ibpehimatey kandan.

¹¹ Umba neulaula heini is langun su wey metueni te langun he kenà iyan haazà ulaula he egkesuatan te Megbevayà. Ne insurat daan heini su wey ikepenurù kenitew he edsilutan te Megbevayà is ed-ulaula te iring kayi. Su sikitew, meg̵aan tew en egkeumahi is kegketuman te langun he nengetagnà dengan.

¹² Ne tenged kayi, haazà is etew he egkeisip din he mezesen en is kedtuu zin, ne kinahanglan he purungi zin pa heg̵eta is kedtuu zin su kela ke mekesalà sikandin gihapun.

¹³ Is minsan hengkey he ibpenuley kenita ni Setanas, ne kenà beg̵u su layun din en ibpenuley te menusiyà is iring dutun. Iyan, egkeserig̵an ta is Megbevayà su kenè din idtug̵ut he ebpenulayan ki te subra te egkeantus ta. Layun din ibeg̵ey kenitew is kelig-en su wey zuen paag̵i te kedlikayi ta he kenè ki mekeulaula te mezaat.

Is Ked-azap te Kenà Tutuu he Megbevayà wey Sikan is Kedlavung te Nengazen

¹⁴ Ne tenged kayi, menge suled, likayi niw is ked-ezapa te kenà tutuu he megbevayà.

¹⁵ Sikiyu, ne metau kew he ed-isip, umba, isipa niw heini is egkeg̵iyen ku.

¹⁶ Sikitew is menge tumutuu, emun edtig̵um kiw su edtumanen tew is kedtenuzi te kebpatey ni Kristu, duen ed-inumen tew he ebpeselematan tew te Megbevayà. Tuus heini he mibpelisan kiw en te lengesa ni Kristu. Ne is supas he ebpenebtevien tew ne egkeenen tew, kebpekeambit tew heini te lawa ni Kristu.

¹⁷ Ne g̵eina te sevaha zà is supas he iyan si Kristu, minsan pa ke mezakel kiw, nesevaha kiw g̵ihapun su pudu kiw ebpekekaan dutun te sevaha he supas.

¹⁸ Isipa niw is ulaula te menge Hudiyu su is kada sevaha kandan he egkaan duen te impemuhat duen te vangkù diyà te etuvangan te Megbevayà, ne pinaag̵i te kegkaan dan nekelapik en sikandan te ked-azap te Megbevayà.

¹⁹ Iyan ibpesavut ku kayi is: baal zà te etew is ledawan he ed-ezapen te menge etew ne ke zuen egkeenen he ibpemuhat dutun, ne egkeenen dà duen su kenà tutuu he ed-ezapen haazà is ledawan.

²⁰ Ne minsan pa zutun kenà iyan dà ed-ezapen dan dutun is ledawan, kekenà, elin is menge mezaat he mulin-ulin, kenà iyan is tutuu he Megbevayà. Ne kenè ku egkesuatan he mekelapik kew te ed-azap te menge mezaat he mulin-ulin.

²¹ Sikitew is tumutuu, emun edtuman ki en duen te intelaan he Idlavung te Nengazen, ne kenà egkehimu he ed-inum ki wey egkaan ki zaan duen te impemuhat te kenà menge tumutuu ziyà te menge mezaat he mulin-ulin su ebpekeiring te zuen tew kebpekid-upakat te menge mezaat he mulin-ulin.

²² Ne kenà meupiya he mepauk kenitew is Nengazen. Kunaan niw vuwa ke ebpekesukul kew kandin.

Is Kelibriyanan te Menge Tumutuu

²³ Egkehimu, kun, he ed-ul-ulahan tew is minsan hengkey he meupiya. Ne venar iyan heeyan. Iyan, bahin kediey, iyan egkekag̵i ku is: mezakel is kenà meupiya he ed-ul-ulahan su kenà ebpeketavang. Minsan pa te egkehimu he ed-ul-ulahan tew is minsan hengkey, mezakel is ed-ul-ulahan he kenà ebpekeheg̵et te kedtuu te menge zuma tew.

²⁴ Ne kinahanglan he kenè tew iyan dà ed-isipen ke hengkey is igkezeyzey te kenitew zà he keugelingen he kebpekesavuk, kekenà, kinahanglan he ed-isipen tew zaan ke hengkey is kegkepurungi tew te menge zuma tew.

²⁵ Na. Egkehimu he egkeenen ta is minsan hengkey he usa he imbelegyà diyà te mirkadu, iyan, kenè ta id-insà ke impemuhat be wey ke wazà su wey wazà ibmesakit te g̵ehinawa ta ke egkeenen ta.

²⁶ Umba egkeg̵iyen ku heini su zuen insurat he Lalag te Megbevayà he edhenduen te, “Is tivuuk he kelibutan wey is langun he tag̵ù din, ne azen te Megbevayà.”

²⁷ Ne ke zuen etew he wazà medtuu te Nengazen tew ne ibpekaan ke zin diyà te valey zin ne ke edhendiyè ka, egkehimu he egkeenen nu is idhenat din kenikew zutun, asal kenè nu iinsà ke impemuhat be wey ke wazà su wey kenà ibmesakit haazà te g̵ehinawa nu ke ingkepemuhat haazà.

^28-29 Iyan, ke zuen tumutuu he egkag̵i te, “Impemuhat heini is idsezè ta te ledawan,” ne kenè ka zutun kaan te idsezà su kela ke egkelenew sikandin he egkaan duen, ne ibmesakit te g̵ehinawa kayi te zuma nu he tumutuu ke egkeenen nu haazà. Ne siguradu zuen ebpekeinsà te, “Emun egkehimu he ed-ul-ulahan ku is minsan hengkey, maan is edlikayan ku is ulaula he kunaan ke mezaat te menge etew he wazà mekesavut te hustu?

³⁰ Penenglitan,” ke sikandin, “ke ebpeselematan ku te Megbevayà is egkeenen ku, maan is egkeg̵iyen te zuma he mezaat he ulaula is kegkeena ku te mibpeselematan ku?”

³¹ Ne iyan tavak ku zutun is: minsan hengkey he ed-ul-ulahan niw, te kegkaan niw wey te ked-inum niw, ne kinahanglan he iyan id-ul-ulaha niw zutun su wey mezalig is Megbevayà tenged te ulaula niw.

³² Tenged kayi, kinahanglan he wazà minsan hengkey he ulaula niw he ibmesakit te g̵ehinawa te minsan hentei he etew, Hudiyu se kenà Hudiyu wey menge zuma niw he tumutuu te Megbevayà.

³³ Siak, ebpen-ahaan ku layun is paag̵i su wey meketavang te minsan hentei is menge ulaula ku. Kenè ku iyan ebpen-ahaan is kediey he igkezeyzey, kekenà, iyan is igkezeyzey te langun he menge zuma he etew. Umba ebeelan ku heini su wey meketuu sikandan ne melibri sikandan te silut.