1 Kurintu 1 - Manobo Western Bukidnon

^1-2 Siak si Pablo is midtezù te Megbevayà he epustul ni Jesu Kristu su iyan egkesuatan te Megbevayà. Siak wey si Sustinis is sevaha he suled tew pinaag̵i te kedtuu, ebpesuratan dey sikiyu is menge tumutuu te Megbevayà diyan te inged he Kurintu. Midhimu kew en he menge g̵aked te Megbevayà pinaag̵i te kegkesevaha niw ki Jesu Kristu. Mibpilì kew te Megbevayà ne tenged kayi menge zuma kew en te langun he menge etew ziyà te minsan hendei he nemeketuu te Nengazen tew he si Jesu Kristu su iyan si Jesus edlingahaan tew te langun he ed-azap kandin.

³ Ikeg̵agew kew te Amey tew he Megbevayà wey te Nengazen tew he si Jesu Kristu ne veg̵ayi kew zan te melinawen he kebpekesavuk.

Is Tuvad Pinaag̵i ki Jesu Kristu

⁴ Layun dekelà is kebpeselemati ku te Megbevayà tenged te g̵ag̵ew zin keniyu pinaag̵i te kebpekidsevaha niw ki Jesu Kristu.

⁵ Su pinaagi kandin utew zekelà is kedtuvazi keniyu te Megbevayà ne zekelè en is kedsavut niw, ne metau kew en he ebpenurù.

⁶ Ne utew en midmezesen is kedtuu niw te impesavut dey keniyu mehitenged ki Kristu.

⁷ Ne tenged kayi imbeg̵ey en daan keniyu te Wag̵as he Mulin-ulin is minsan hengkey he ketau he egkinehenglanen niw kayi te kedtag̵ad niw te ked-uman kebulus te Nengazen tew he si Jesu Kristu.

⁸ Iyan sikandin edlig-en keniyu taman te ketepusan he timpu su wey wazà igkesewayi keniyu zutun te andew keuzemà te kedlikù din.

⁹ Is Megbevayà, egkeserig̵an tew is lalag din, ne iyan sikandin mibpetuu kenitew wey kiw mebpekid-upakat ki Jesu Kristu he iyan Anak din wey iyan Nengazen tew.

Is Kebpekedsesemberawà te Menge Tumutuu

¹⁰ Menge suled ku tenged te kedtuu, duen idhangyù ku keniyu pinaag̵i te kebayàbayà kenitew te Nengazen tew he si Jesus; iyan is: kinahanglan he kenè kew mevahinbahin, kekenà, uyun-uyun kew su wey mesevaha is isip niw wey g̵ehinawa niw.

¹¹ Umba egkeg̵iyen ku heini, menge suled, su zuen menge zuma ni Keluwi he midtudtul kedì he egkengetebektebek kew ziyan.

¹² Iyan ibpesavut ku is: selakew kun is edtindeg̵an te uman sevaha te sikiyu su egkag̵i kun is sevaha he iyan a si Pablo is edsundanan din. Ne egkag̵i is sevaha he si Epulus mulà is edsundanan din. Ne egkag̵i is sevaha he iyan kandin he edsundanan si Pedro. Ne egkag̵i is sevaha he si Kristu mulà is kandin.

¹³ Utew mezaat heeyan! Nevahinbahin bes si Kristu ziyan te keniyu? Kunaan niw vuwa ke iyan a si Pablo kes inransang te krus wey kew melibri. Kunaan niw vuwa ke nebewtismuwan kew su wey kew mekesundan kedì.

¹⁴ Utew zekelà is kebpeselemati ku te Megbevayà su iyan ku zà nebewtismuwan diyan si Crispo wey si Gayu.

¹⁵ Ne tenged kayi wazà minsan hentei keniyu he ebpekekag̵i he nebewtismuwan sikandin su wey sikandin mekesundan kedì.

¹⁶ Duen pe bes nebewtismuwan ku ziyan he iyan ensi Istipenas. Ne g̵awas dutun wazè ku en egketenuzan ke zuen pa nebewtismuwan ku ziyan te keniyu.

¹⁷ Su si Kristu, wazè e zin sug̵ua wey a mekebewtismu, kekenà, iyan insug̵ua zin kedì su wey ku ikesangyew is Meupiya he Tudtulanen. Ne impesavut din kedì he kinahanglan he kenè ku egemiten is kelibutanen he ketau te kegkag̵i su kela ke egkevenaran is menge etew tenged te ketau ku ne egketembunan is gehem ni Kristu te kedlibriya kandan pinaag̵i te kebpatey zin duen te krus.

Is Gehem wey Ketau te Megbevayà

¹⁸ Ne emun ibpesavut ta ziyà te menge etew is kebpatey ni Kristu zuen te krus, sikan is menge etew he kenà egkelibri te silut, kunaan dan ke wazà pulus te ibpesavut ta. Iyan, sikita is nelibri en te silut, netuenan ta he pinaag̵i te kebpesevuta te kebpatey ni Kristu, ibpaahà te Megbevayà is gehem din te kedlibriya te menusiyà.

¹⁹ Ne mehitenged kayi zuen insurat he Lalag te Megbevayà he edhenduen te, “Is ketau te menge uluwanen, edhimuwen ku he wazè din pulus, ne is kedsavut te nemeketunghà, ibpeehè ku he tarù,” ke sikandin.

²⁰ Ne egkesavut ta kayi he wazè en pulus te ketau te menge uluwanen, ne wazà daan pulus te kedsavut te nemeketunghà wey te menge metau he egkag̵i zini te kelibutan. Su impesavut en te Megbevayà he is ketau he zini zà ebpuun te kelibutan, wazè en pulus diyà te kandin.

²¹ Utew metau is Megbevayà; midhimu zin he kenà egketuenan te menge etew ke hentei sikandin pinaag̵i te kandan dà he ketau su midhimu zin he egkelibri sikandan pinaag̵i zà te kedtuu zan te Meupiya he Tudtulanen he ibpenurù ta he kunaan dan ke tarù he wazè din pulus.

²² Is menge etew he Hudiyu, kenè dan edtuu ke kenè dan egkeahà is menge egkengein-inuwan he tuus te g̵ehem te Megbevayà. Is menge etew he Gerisyahanen, iyan edserig̵an dan is metau he ed-isip.

²³ Ne sikitew mulà, ibpenurù tew is mehitenged ki Kristu he inransang te krus. Is menge Hudiyu, igkeepes dan utew heini ne is menge Gerisyahanen ne kunaan dan ke tarù ne wazè din pulus.

²⁴ Iyan, is minsan hentei, Hudiyu se Gerisyahanen, emun ebpemineg dan te Megbevayà dutun te kebpetuuwa zin kandan, netuenan dan he pinaag̵i te kedrensanga ki Kristu impezayag te Megbevayà is gehem din wey ketau zin.

²⁵ Su heini is kedrensanga ki Kristu he ibpesavut tew he kunaan te menge etew ke utew tinulebung, ne pinaag̵i kayi ibpaahà te Megbevayà is ketau zin he lavew utew kenà te ketau te menge etew. Kunaan dan ke wazà gehem te Megbevayà, iyan, lavew is gehem din te g̵ehem he ziyà ebpuun te isip te etew.

²⁶ Kenè niw, menge suled, lipati ke hengkey kew zengan hein wazè kew pa ipetuu te Megbevayà. Su ziyan te keniyu te menge tumutuu, mezelag is etew he egkekag̵i te menge etew he utew metau; mezelag is lavew is pid-etawan din; mezelag daan is sepian.

²⁷ Ne minsan pa zutun mibpilì kew te Megbevayà wey kew melibri. Su is menge etew he kunaan te kezekelan ke kenà memetau, iyan mibpilì te Megbevayà su wey mengeeled is uvag memetau. Ne haazà is menge etew he kunaan te kezekelan ke wazà utew egkehimu, mibpilì din daan su wey mengeeled is menge zuen dan uvag gehem.

²⁸ Elin daan mibpilì te Megbevayà is menge etew he edsudien te menge etew zini te kelibutan. Iyan mibpilì din is egkeg̵iyen te menge etew he kenà memetau wey wazà menge pulus. Umba mibpilì din is menge iring kayi su wey zin ikepesavut he wazà pulus diyà te kandin is minsan hengkey he kunaan te menge etew ke zekelà is pulus.

²⁹ Ne tenged kayi wazà minsan hentei he ebpekezantal te ketau zin wey g̵ehem din diyà te etuvangan te Megbevayà.

³⁰ Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

³¹ Ne tenged kayi utew venar is insurat dengan he Lalag te Megbevayà he edhenduen te, “Ke zuen etew he egkesuat he edantal, ne kinahanglan he iyan dà izantal zin is nengehimu te Nengazen.”