1 Juan 3 - Manobo Western Bukidnon

¹ Utew kiw mahal ziyà te g̵ehinawa te Amey tew he Megbevayà su ahaa niw man migngezanan kiw zin en he menge anak din ne menge anak kiw zin en iyan. Is menge etew zini te kelibutan he kuntada te Megbevayà, kenè kiw zan egkekilala he menge anak kiw te Megbevayà su kenè dan daan egkekilala ke hentei sikandin.

² Menge minahal ku he menge emig̵u, menge anak kiw en te Megbevayà ne kenè tew pa egketuenan ke hengkey is egketemanan te kegkeenaka kenitew te Megbevayà. Iyan, netuenan tew he ke edlikù si Kristu, egkehimu zutun is kenitew he zagwey he iring te kandin he zagwey su zutun egkeehè tew human is tutuu he zagwey zin.

³ Is minsan hentei he ebperateng te kedlikù ni Kristu, layun din ebpurungi is menge ulaula zin su wey wazà mezaat iring te wazà daan mezaat he ulaula ni Kristu.

⁴ Ke zuen nekesalà, nesupak din is kesug̵uan te Megbevayà su is ulaula he egngezanan te salà ne iyan is minsan hengkey he ulaula he supak te kesug̵uan te Megbevayà.

⁵ Netuenan niw en he umba mibpeetew si Kristu su wey zin maawà is menge salè tew. Ne netuenan niw zaan he wazà minsan sevaha he salà he nehimu zin wey egkehimu zin.

⁶ Ne tenged dutun is minsan hentei he edhemenan din is kebpekidsevaha zin ki Kristu, kenà egkehimu he layun sikandin ed-ulaula te mezaat. Sikan is etew he layun ed-ulaula te mezaat, wazè din metueni ke hentei si Kristu ne wazè din tuuwi sikandin.

⁷ Menge anak ku, kinahanglan he kenè niw pemineg̵a is minsan hentei he teruen he ebpenurù pezem keniyu. Iyan tutuu is: ke zuen etew he ed-ulaula te hustu ne iyan sikandin metazeng he etew iring te metazeng si Kristu.

⁸ Ke zuen etew he layun ed-ulaula te mezaat ne sakup sikandin ni Setanas su layun daan si Setanas ed-ulaula te mezaat puun pa te kedlimbag̵a te kelibutan. Umba midhendini te kelibutan is Anak te Megbevayà su wey zin ikeawà is gehem te menge ulaula ni Setanas.

⁹ Is minsan hentei he nehimu en he anak te Megbevayà, kenè en sikandin egkesuat he ed-ulaula te mezaat su midsempù en man te Megbevayà. Geina te iyan Amey zin is Megbevayà kenà egkehimu he layun sikandin ed-ulaula te mezaat.

¹⁰ Ne ke zuen etew he kenà metazeng is menge ulaula zin, tuus heini he kenà sikandin anak te Megbevayà. Ne kenà daan anak te Megbevayà is minsan hentei he kenè din ebmahalen is duma zin. Pinaag̵i kayi egketuusan ta ke hentei is menge anak te Megbevayà wey ke hentei is menge sakup ni Setanas.

Is Kegig̵ineg̵awà

¹¹ Kinahanglan he ebmahalen tew te kada sevaha is menge zuma tew. Iyan heini impenurù kenitew hein aney kiw meketuu.

¹² Kenè tew ed-iringan si Kain su sakup sikandin ni Setanas ne mibunù din is hazi zin. Umba mibunù din su mezaat is kandin he ulaula ne metazeng mulà is menge ulaula te hazi zin.

¹³ Menge suled, kenè kew meinuinu emun ebpekigkuntada keniyu is menge etew zini te kelibutan he kuntada te Megbevayà.

¹⁴ Netuenan tew he zengan iyan egkeperateng tew is kemetayen he wazà pidtemanan. Ne netuenan tew zaan he g̵untaan duen tew en untung he wazà pidtemanan. Umba netuenan tew heini su utew en mahal zini te g̵ehinawa tew is menge zuma tew. Is minsan hentei he kenà mahal ziyà te g̵ehinawa zin is menge zuma zin, kemulu pa sikandin ebpekeperateng te kemetayen he wazà pidtemanan.

¹⁵ Is minsan hentei he ebpekigkuntada te zuma zin, mid-isip sikandin te Megbevayà he iring te teremunù; ne netuenan ta he ke zuen etew he egkesuat he ebunù wazè pa sikandin mekeangken te untung he wazà pidtemanan.

¹⁶ Umba netuenan tew en he utew zekelà is kebmahala kenitew te Megbevayà diyà te g̵ehinawa zin su mibpehimatey si Jesu Kristu he elili kenitew. Ne sikitew zaan, kinahanglan he edtevangan tew is menge zuma tew he tumutuu minsan ke ibpatey ta haazà is kedtavang.

¹⁷ Ke zuen minsan hentei kenitew he egkehimu he edtevangan din is duma zin he edlised, iyan, kenè din edtevangan, kenà egkehimu he mahal ziyà te g̵ehinawa zin is Megbevayà.

¹⁸ Menge mahal ku he anak, kinahanglan he kenà menge lalag dà is kebmahala ta te menge zuma ta, kekenà, kinahanglan he ibpeehè ta is kebmahala ta kandan pinaag̵i te menge ulaula ta.

¹⁹ Su emun ed-ul-ulahan tew heini, egketuenan tew he menge anak kiw iyan te tutuu he Megbevayà. Ne tenged dutun kenè en kinahanglan he egkeeled ki ziyà te etuvangan din

²⁰ minsan pa te iyan diyà te isip ta is: dait ki he edsilutan. Umba kenè ki egkeeled su iyan lavew he egkeserig̵an is hukum te Megbevayà, kenà is hukum te isip ta su netuenan din is minsan hengkey.

²¹ Ne emun netuenan ta he wazè en igkesiluti zin kenita, egkehimu en he zekelà is kedsarig ta ke ed-ampù ki ziyà te kandin.

²² Ibeg̵ey zin kenita is ebuyuen ta su edtumanen ta is menge sug̵ù din wey ed-ul-ulahan ta is egkesuatan din.

²³ Ne iyan insug̵ù din kenitew is: kinahanglan he edtuuwan tew is Anak din he si Jesu Kristu wey ebmahalen tew te kada sevaha is menge zuma tew sumalà is insug̵ù daan dengan ni Jesus.

²⁴ Is minsan hentei he edtuman te menge sug̵ù te Megbevayà, nekidsevaha sikandin te Megbevayà ne ziyà te kandin ed-ubpà is Megbevayà. Egketuenan ta he zini te kenita ed-ubpà is Megbevayà su mid-ulinan ki te Wag̵as he Mulin-ulin.