1 Juan 1 - Manobo Western Bukidnon

Is Lalag he Ebeg̵ey te Untung

¹ Ebpesuratan ku sikiyu mehitenged ki Kristu. Migeraran sikandin te Lalag he ebpekeveg̵ey te wazà pidtemanan he untung. Daan en sikandin te wazè pa tukuza is kelibutan. Ne minsan pa zutun neehè dey sikandin ne nekepemineg key te migkag̵i zin. Neehè dey ne neg̵ewezan dey sikandin.

² Hein mibulus dini te kelibutan heini is puunà te untung, neehè dey ne tenged dutun egkeg̵iyen dey keniyu is neehè dey. Edseyseyen dey keniyu is migeraran te untung he wazè din pidtemanan. Daan sikandin he zuma te Amey tew he Megbevayà ne zutun mibpeg̵awag̵awa kenami zini te kelibutan.

³ Edtudtulen ku en keniyu haazà is neehè dey wey nezineg dey ziyà te kandin su wey kew mebpekid-upakat kenami su nekid-upakat key zaan te Amey tew he Megbevayà wey te Anak din he si Jesu Kristu.

⁴ Ne tenged dutun ebpesuratan ku sikiyu te iring kayi su wey meheg̵et is kelipey tew.

Is Etew he Ziyà te Kerayag

⁵ Ibpesavut ku keniyu is impesavut kenami te Anak te Megbevayà he is Megbevayà, iyan sikandin puunà te kerayag ne wazà minsan hengkey he merusirem diyà te kandin.

⁶ Emun egkag̵i ki he nekid-upakat ki te Megbevayà, iyan, diyè ki pa te kerusireman, he ke và dà egkeg̵iya, mezaat pa is menge ulaula ta, teruen ki. Teruen ki pinaag̵i te menge lalag ta wey pinaag̵i te menge ulaula ta.

⁷ Emun merayag mulà is ibayè tew iring te merayag is Megbevayà, he ke và dà egkeg̵iya, emun mibpesakup kiw te Megbevayà, egkeupakat kiw ne layun kiw edlumpiyuwi te minsan hengkey he salè tew pinaag̵i te kebpelisi kenitew te lengesa ni Jesus he Anak te Megbevayà.

⁸ Emun egkag̵i ki he wazè ta salà, tarù is ebpetuuwan ta te g̵ehinawa ta ne kenè ki ves edtuman te tutuu he tuluuwen.

⁹ Emun idtug-an ta ziyà te Megbevayà is menge salè ta, kenà egkehimu he kenè ki zin ebpeseyluwen su metazeng sikandin ne metinumanen te pesarig din. Edlumpiyuwan ki zin te langun he menge ulaula ta he kenà metazeng.

¹⁰ Iyan, ke egkag̵i ki he wazè ki mekesalà, henduen be te migkag̵i ki he teruen is Megbevayà ne wazè ki mebpezumazuma te lalag din.