Matayo 9 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Adi dre sizo kaluṅbana, dre ziazo ta’ana, dre cazo ai tandini ba murungu di na.

² Mi no ka, aii doki ago dradre ole abile di, aiyira’a langadri: Yesu dre aiiki tai ka’ile di nora’a, ta ago dra dre ole abile di dre, ki di, Mva‐ago mi koci ami togo, a tri ami takonji dre.

³ Mi no ka, dia ta‐tisilepi arukaba dii dre ta kisuzo aiiki togona, ki di, Ago nidi adre Nzambe da.

⁴ Yesu dre aiiki ta kisule dii nira’a, dre tazo, ki di, Mi kisu takonji amiki togona adose ya?

⁵ Ta angodi añi ya, ko ta, A tri ami takonji dre, ko ta, Mi konga kuru, mi dre tecizo?

⁶ Mi koniro Adamuni Mva mi lanjilanji vudri di, diaki takonji tizalepi di (adi dre tazo dia dra ole abile di dre, ki di) Mi konga kuru, ami langa do, lizo ami jona.

⁷ Akodi dre ngazo kuru, dre njizo ai jona.

⁸ Dia lezolepi dii kono tai nidi dre di, aii roro, dre utukufu fezo Nzambedre, akodi dia mi lanjilanji di bazo nitini.

⁹ Yesu dre lavura’a nalese, i no Mataya dre lirira’a midaia girana: adi dre tazo adidre, ki di, Mi kali ma vuse. Akodi dre ngazo lile adi vuse.

¹⁰ Kadre nitini di, adi dre nga ñara’a jona, mi no ka, atelonii bi, takonji olepi bi dii aliki, dreki lirizo Yesu, ai tayilepi dii be.

¹¹ Farusii kono dre di, aii taki adini tayilepi diidre, ki di, Amiki ta‐tadalepi di adre nga ña atelonii e, takonji olepi dii be, adose ya?

¹² Adi koyi di, adi ta, ki di, Dia iriñi be dii leki alokoliyini zi ko, dia drafulepi dii leki alokoliyini zi.

¹³ Mi koli, mi dre nizoa geagea ado tai nidi le ta tadale ya, ki di, Ma le tai lele kini di, ma le zatufuzo Nzambe ledezo di ko: ma dre alile dia olepi piri diiki zi ko dise, ma ali dia takonji olepi diiki zi.

¹⁴ Velero Yoaneni tayilepi dii aliki adi vuna, dre tazo, ki di, Mà, Farusii be, adreki nga ñale di gazo re we, adose ya, ami tayilepi dii dreki nga ñale di gazo re ko?

¹⁵ Yesu dre tazo aiidre, ki di, Kadura tecilepi ago toko gilepi di vuse dii kicoaki adrele tizaro, ago toko molepi di dre adrera’a aii be ya? Lokia ni aca i dre ago toko molepi di ruzo aiiki kofula ase, velero aii kadre nga ñale di ga re kani’a.

¹⁶ Dia ba bongoroga todi di bongo aku di ru ko: kadre nitini di bongo dre dile bina a di dre sizo asa, amba akuna tisini.

¹⁷ Dia da teji biño aru joroa aku di lena ko: kadre nitini di joroa adre fuzo, biño su are kutuzo, joroa adre tisizo: a da biño todi di biño‐joroa todi di lena, iriti dre adrezo tani.

¹⁸ Adi dre ta nii tara’a aiidre, mi no ka, vura talepi di alidre, dre tandizo kandra, dre tazo, ki di, Ama mvatoko adre ñanomvano dradraro kani’a: mi kali, dre dreka bazo akodiru, akodi kadre lidriru.

¹⁹ Yesu dre ngazo dre lizo adi vuse, ai tayilepi dii be.

²⁰ Mi no ka, toko akodia kari dre afozo kona mudri‐dri‐iri, ali Yesu amvolese, dre akodia bongoti tabezo:

²¹ akodi dre tale i lena dise, ki di, Ma tabe akodia bongo kodia di, a ko lede ma kani’a.

²² Yesu dre ai alazo, dre akodi nozo, dre tazo, ki di, Mvatoko, mi koci ami togo; ta mina ka’ile di lede mi dre. Toko lederuda saa nadise.

²³ Yesu kosi dia vura talepi di jona dre di, dre dia kegela volepi dii nozo, dia lezolepi dii be, aii dre lulu gara’a.

²⁴ Adi ta, ki di, Mi kisiru lati ase: ajukumva dre drale ko dise, adre aiyiko. Aii dreki adini tabizo gule gugu.

²⁵ A ko’o dia lezolepi dii fole amvena dre di, adi si jona, dre akodi dozo drekase; ajukumva dre ngazo.

²⁶ Ta ole nidi rubi dre la’uzo la’u nadi ase o̱ei.

²⁷ Yesu dre lavura’a dangase, ago mi ako dii iri liki adi vuse, dre trera’a, ki di, Mi koba ami togo kini ama ru, mi Dawidini mva.

²⁸ Adi kosi jona dre di, ago mi ako dii aliki adi vuna: Yesu dre tazo aiidre, ki di, Mi ka’i ma kicoa tai nidi o ya? aii dre tazo adidre, ki di, Ai’i Miri.

²⁹ Dra adi tabe aiiki mi dre, dre tara’a, ki di, Ngoro amiki tai ka’ile di tini, a ko’o amidre.

³⁰ Aiiki mi njiruda, Yesu dre ta lanjizo aiidre iriñise, ki di, Mi ko’o dia koniro tejia ko.

³¹ Aii dreki fozo dre adini rubi la’uzo la’u nadi ase o̱ei.

³² Aii dre afora’a, mi no ka, a do ago ladra trotro di, teri konji dre rule di adi vuna.

³³ A ko dro teri konji di ase dre di, ago ladra trotro di, ta tai dre: dia lezolepi diiki lindri gaga, dre tazo ki di, Dridri a no ta nitini Yisarelena ko.

³⁴ Farusii dreki tazo, ki di, Adi dro daimonae ase daimonaki mirise.

³⁵ Yesu dre lizo ba murungu dii ase o̱ei kurukuru, ba o̱ei be, dre tai tadara’a aiiki sinagogona dre tandu tani mataya adea ngira’a, dre dra konji toa dii o̱ei ladrora’a, dra toa o̱ei dii e be.

³⁶ Adi kono dia lezolepi dii ai togo ti aiise aii dreki landele landelande dise, dre labuzo wayaro, ngoro kabiliki, kabilikilikilepi dre adrele yo di tini.

³⁷ Dra adi dre tazo dia ai tayilepi diidre, ki di, Laña kalepi di adre bi, mundia laña lolepi dii adre ca.

³⁸ Tandu nidise mi kongo Miri laña kalepi di adea kandra, adi komuro mundia laña lolepi dii, aii koli laña kalepi dii lo.