Matayo 22 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Yesu dre ta akozo, dre tazo tandu alale dise todia aiidre, ki di,

² Mataya bu adea mokonzi anda tini akodi lede mokaña ñale ai mva dre toko mole dise;

³ dre ai adremakandrae muzo dia i dre zile mokaña ña toko mole dise dii zi: aii dre lezo alile ko.

⁴ Adi mu todia adremakandrae azina, dre tazo, ki di, Mi kota ta dia i dre zile diidre, ki di, Mi no ka, ma lede ama nga ñale di dre: a fu ama ti, ti lingalepi dii be, a lede ngae o̱ei dre: mì kali mokaña toko mole dise di ña.

⁵ Aii dreki ta nidi tabizo, dreki aiiki latii dozo lizo, dia alo di li ai amvuna, dia azina di li ai nga gizo dii na:

⁶ dia ambi velero dii dreki adini adremakandrae ruzo, dreki aiiki ozo konji, dreki aiiki fuzo drale.

⁷ Mokonzi dre kumba ozo we; adi dre ai tukutuku muzo, dre dia dia fulepi drale dii tizazo, dre aiiki ba murungu di zazo.

⁸ Dra adi ko ta ai adremakandrae dre di, ki di, A lede mokaña toko mole dise, dia i dre zile dii su lile ko.

⁹ Tandu nidise mi koli latii kulepi dii ase, dia angopi ya mi dre kusule dii zizo mokaña toko mole dise di ña.

¹⁰ Adremakandrae nii dreki lizo latii wawa dii ase, dia angodi ya aii dreki kusule dii dia tani dii, dia konji dii aii dre atonazo o̱ei: dia galepi bi dii dreki alizo ta ago dre toko mole dise.

¹¹ Mokonzi kasi dia i dre zile dii no di, adi no nale ago adrelepi bongo toko mozo di akoro di.

¹² Adi dre tazo akodi dre, ki di, Arupi, mi asi nole bongo toko mozo di akoro angini ya? Akodi agi titi.

¹³ Dra mokonzi ta adremakandradre, ki di, Mi kolambe akodi dreka, akodi pa be, dreki akodi bezo tinimva amvele dina: a kadre nale tai ngozo a’ose di, tai diaki si cizo di be.

¹⁴ I dre dia bi dii zile dise, i dre dia ca di kepezo.

¹⁵ Dra Farusii liki, dreki ta tazo aii be, aii o muṅa adi ru angini ya.

¹⁶ Aii dreki aiiki tayilepi dii, dia Erode adea be, muzo adi vuna, dre tazo, ki di, Dia ta‐tadalepi di, ama niki mi dia pati e, mi dre lati Nzambe adea tadazo pati, dre dia roro tejia ko: mi dre ami togo bale diaki tase ko dise.

¹⁷ Tandu nidise, mi kota amadre, Mi tusu angini ya? A kogi bidaiya Kaisala adea, a ko gi ko di, angodi togi e ya?

¹⁸ Yesu dre aiiki takonji atogiazo, dre tazo, Mi adre ama liti adose ya, mi dia togo iri dii?

¹⁹ Mi kotada franka bidaiya gizo di madre. Aii dreki franka ajizo adi vuna.

²⁰ Adi dre tazo aiidre, Nidi adini lasu e ya? ta tisile di be.

²¹ Aii dreki tazo adidre, Kaisala adea. Dra adi ta aiidre, Mi kaji Kaisala a ngae Kaisaladre; mi kaji Nzambe a ngae Nzambedre.

²² Aii ko yi tai nidi dre di, aiiki lindri gaga, dreki adini ta’izo dreki aiiki lati dozo lizo.

²³ Kitu nadise Sadoke alizo adi vuna, aii dia ta talepi dii nganga dra ase di yokodo: aii dreki ta lizizo adi ti,

²⁴ dre tazo ki di, Dia ta‐tadalepi di, Mose adre tale, ki di, Ago kodra dí, mva yo, akodi adrupi kodoro akodi toko mole dre mva tizo adrupia dre.

²⁵ Dia nji‐dre‐iri, aii adrupiro dre adrezo ama be: kayua dre toko dozo mole, dre drazo, mva ai vudria yokodo dre ai toko ta’izo ai adrupidre;

²⁶ ngoro nitini di adrupina azi iri di o tai indi, adrupina azi na di be, cale adrupina azi nji‐dre‐iri dre.

²⁷ Aiiki vudria toko nidi dre drazo vele.

²⁸ Kadre nitini di nganga‐dra ase dise aiiki adrupi angodi ni toko e ya? aii dreki o̱ei adini dole mole dise.

²⁹ Yesu dre ta akozo, dre tazo aiidre, ki di, Mi avi, ta‐tisile dii nira’a ko, iriñi Nzambe adea nira’a ko.

³⁰ Nganga‐dra ase dise, aii mo ko, aii fe dia mole di ko, aii adreki malaika buna dii tini.

³¹ Tandu nganga‐dra ase dia dralepi adea di, mi la tai Nzambe dre tale amidre di tara’a, ki di,

³² Ma Nzambe Iburaimu adea, Nzambe Yisaka adea, Nzambe Yakobo adea, Nzambe, Nzambe dia dralepi diikia ko, adi Nzambe dia lidriru diikia di e.

³³ Dia lezolepi dii ko yi tai nidi dre di, aiiki lindri dre gazo adini ta‐tadale di se we.

³⁴ Farusii, koyi di, adi o Sadoke agile titi, aii dreki rukebezo.

³⁵ Dia alo aiiki kofula a di, dia togi nilepi di, dre adi ti zizo, adini litira’a, ki di,

³⁶ Dia ta‐tadalepi di, togi toratina di angodi amba togi azina di ruse ya?

³⁷ Adi dre tazo adidre, ki di, Mi kole Miri ami Nzambe ami togose o̱ei, ami lindri se o̱ei, ami ta tusule dii se o̱ei.

³⁸ Nidi togi kayua di, togi murungu di.

³⁹ Togi iri ngoro togi kayua di tini. Mi kole ami bapi ami tandi tini.

⁴⁰ Tandu torati o̱ei, nabikia ta o̱ei dii e, togi iri nii dii.

⁴¹ Farusii dre rukebera’a, Yesu dre aiiki ti zizo,

⁴² Tara’a ki di, Mi tusu Kristuni tandu angini ya? Adini mva e ya? Aii ta adidre, ki di, Mva Dawidi adea.

⁴³ Adi ta aiidre, Dawidi zi akodi Miri Teri lana angini ya, tara’a, ki di,

⁴⁴ Miri ta ama Miridre, i ki di, Mi koliri ama drigualese ma dre, Ami kariba bazo ami pa anduna?

⁴⁵ Tandu nidise Dawidi zi akodi Miri di, akodi ai mva‐agoro di angini ya?

⁴⁶ Dia alo di kicoa ta ako tale tejia ko, kitu nadise dia o̱ei ro ta lizile adi ti di roro.