Matayo 16 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Farusii, Sadoke be, dreki alizo, dreki adini litira’a, zi adi ti, adi kotadaro aiidre ta‐tadale bualese di.

² Adi dre ta akozo, dre tazoa aiidre, ki di, Kitu kondi di, mi adre tale, Nga kituru: bu mibale dre kale kaka dise.

³ Dribise mi dre tale, Andru di toboro; bu mibale dre lakale lakalaka dise, nduruku be. Mi kicoa bu mibale ni, mi kicoa ta‐tadale vese nadise nile ko.

⁴ Biro konji, muṅa olepi di nda ta‐tadale di; a kofe ta Yona adea tadale biro nidi dre alokodia. Adi dre aiiki ta’izo, dre njizo.

⁵ Dia tayilepi dii dreki cazo ta‐ana, ta ambata dozo di vi aii ase vivi.

⁶ Yesu dre tazo aiidre, ki di, Mi kolama ta, mi koga amiki mi taku Farusikia dise be, taku Sadokekia dise be.

⁷ Aii dreki tazo aii be, tara’a, Mà do nga ñale di dre ko.

⁸ Yesu dre ta nidi atogiara’a, dre tazo, A mi ta ka’ile ca di be, mi adreki ta ta amiki kofule ase adose ya, mi dre adrele ambata ko dise?

⁹ Mi atogia dre ko ya, ta ambata nji mundia kutu njiki ketona aga mi lena ko ya kanji angopi ya mi dre kuduzo dii?

¹⁰ Ta ambata nji‐dri‐iri dia kutu su ketona kanji angopi ya mi dre kudu zo dii adea aga ami lena ko ya?

¹¹ Mi atogia ko angini ya, ma adre mapa tandu ta amidre ko. Mi ko ga amiki mi taku Farusikia dise be, taku Sadokekia dise be.

¹² Dra aii yidre geagea i dre ta tale aiidre aii kogaro aiiki mi ta‐tadale Farusikia e Sadokeki adea se di, aii kogaro aiiki mi taku mapa adease ko.

¹³ Yesu kali vo Kaisala‐Filipo adea na dre di, i zi dia ai tayilepi dii ti, dre tazo, Mundia ta Adamuni Mva adi e ya?

¹⁴ Aii dreki tazo, ki di, Arukaba ta Yoane dia Batisilepi di, arukaba ta Eliya; arukaba ta Yeremaya, ta dia alo nabi kofule di e.

¹⁵ Adi dre tazo aiidre, Mì dre tale ma adi e ya?

¹⁶ Simona Petero dre ta akozo, dre tazo, Mi Kristu e, Mva Nzambe lidriru di adea.

¹⁷ Yesu dre ta akozo akodi ti, dre tazo, A ko ba beneditu miru, Simona Bara‐Yona, za, kari be dre tai nidi tadale mi dre ko dise, ama Ata buna di dre ta nidi tadazo midre.

¹⁸ Ma dre tazo midre indi, mi Petero e, ma kosi ama kopainyi kira nididre, ti Adezi adea kolavu ko.

¹⁹ Ma kofe fungula mataya bu adea midre: ado nga ya mi kolambe vudri, a kolambe buna: ado nga ya mi tri vudri a kotri buna.

²⁰ Dra adi loga dia tayilepi dii dre re, aii kota adi Kristu e diadre tejia ko.

²¹ Vese nadise Yesu ba tandu tadale dia ai tayilepi diidre, i su lile Yerusalemina dre lizazo tai bii maliga e, koani dridri dii e, dia ta‐tisilepi dii be drekase aii dreki i fuzo, kitu na velero dise dre ngazo todia.

²² Petero dre adini dozo dre adini ta bazo ndrile, dre tazo, Tai nidi kadre mi mvumvu, Miri: a go tai nidi ole miru ko.

²³ Adi dre ai alazo, dre tazo Peterodre, Mi koli ma amvona Setani: mi adre nga ma olepi dele di, mi dre ta Nzambe adea rule lovose ko dise, mi ru ta diakia dii rule lovose kani’a.

²⁴ Dra Yesu dre tazo dia ai tayilepi diidre, ki di, Ta lovo lizo ma vuse di koru dia alo di, akodi koga ai tandi re, dre ai fa atipatipa tingazo, dre alizo ma vuse.

²⁵ Dia angodi ya le ai lindri tedrile, akodi lindri kaviro aviavi; dia angodi ya ko’o ai lindri avile di ama tandise, akodi kotedri ai lindri.

²⁶ Nga angopi ya go dia vo ñalepi oei di dre akodi lindri avi ase: Dia kotifo ai lindri adi ngase ya?

²⁷ Adamuni Mva kali utukufu ai Ata adea na ai malaika be, vese nadise adi dre fezo mundia oei dii dre, aiiki ta ole diise.

²⁸ Ma ta amidre pati, dia arukaba adrelepi konua dii kodraki tejia ko, aii kono Adamuni Mva alira’a ai mataya na ka.