Matayo 14 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Lokia nadise Erodi miriro di yi rubi Yesuni tandu dre,

² dre tazo ai adremakandraedre, ki di, Akodi Yoane dia Batisilepi di e; akodi nga dradra ase dre; tai nidise di tai kokoroko nii adre adini o ni lana.

³ Erodi dre Yoane rule dise, dre akodi lambezo bagojona Erodiasini tase, ai adrupi Filipoa toko e.

⁴ Yoane dre tale Erodidre dise, ki di, Nidi togi e ko, mi dre adini mozo di.

⁵ Adi kole akodi fule drale di, adi ro dia lezolepi dii roro, aii dreki tusuzo akodi nabi e.

⁶ Erodini kitu tizo di kaca di, Erodiasini mvatoko to nga diaki keto a, Erodi dre lenzezo adise.

⁷ Tai nidise adi ta pa wazo dise, ado nga ya akodi dre zile adi ti di adi fe akodidre.

⁸ Akodi dre adrera’a tai andrena dre tadale dridri di be i lena di, dre tazo, ki di, Mi kafe Yoane dia Batisilepi di ni dri ndakpa a madre nole.

⁹ Tiza adre mokonzi o ni, dre ai pa wale dise, dia lirilepi adi be diise, adi ta a ko fe wa;

¹⁰ adi dre dia muzo, akodi dri li bagojona.

¹¹ I dre akodi dri dozo ndakpa a, dre fezo ajukumvadre: akodi dre dozo andreadre.

¹² Dia adini tayilepi dii dreki alizo, dreki avo dozo, dreki adini bazo buna; aii dreki lizo tazo Yesudre.

¹³ Yesu koyi tai nidi dre di, adi li nalese kaluṅbana, vo aṅboro di lena kaloma: dia lezolepi dii koyi dre di, aii liki adi vuse pase ba murungu dii ase.

¹⁴ Adi dre fozo, dre dia lezolepi we dii nozo, adini togo dre tizo aiise, adi dre aiiki dia drafulepi dii tedrizo.

¹⁵ Kitu kondi di, dia tayilepi dii dreki alizo adi vuna, dre tazo, ki di, Vo aṅboro di e, vese lavudre; mi komu dia lezolepi dii, aii koliro ba na, dre nga ñale di gizo aiise.

¹⁶ Yesu dre tazo aiidre, ki di, Aii liki angia: mi kofe aiidre ñale.

¹⁷ Aii dreki tazo adidre, ki di, Ambata nji, kosia iri kodia be ama dreka nole.

¹⁸ Adi dre tazo, ki di, Mì kado ma vule nole.

¹⁹ Adi dre tai fezo dia lezolepi diidre aii koliri mbidri; adi dre ambata nji dii dozo, kosia iri dii be, dre mi dora’a buna, adi dre beneditu bazo, dre ambata tupizo, dre fezo dia lezolepi diidre.

²⁰ Aii o̱ei dreki ñazo, dreki pizo: nga koroño aii dre ta’ile dii, aii kudu kanji mudri‐dri‐iri.

²¹ Dia nga ñalepi dii dre adrezo ago ngale kutu nji, toko e, anjia be.

²² Drañano adi dre dia ai tayilepi dii ozo sile kaluṅbana, aii dreki ziazo dridri ta’ana, adi mu dia lezolepi dii lile ka.

²³ Tako adi mu dia lezolepi dii lile dre, adi mba kiradrina ngole Nzambe kandra kaloma: nga kani di, adi adre nale kaloma.

²⁴ Ñanomvano kaluṅba dre adrezo yi ketogona, yi kakpo kaluṅbaru, lia dre vile aii mise dise.

²⁵ Ta lamale ngacise dise vese su nii, adi alida tecibe aii vuna yi drise.

²⁶ Dia tayilepi dii kono akodi tecira’a yi drise di, aiiki togo o ta kuku, dre tazo, ki di, Nidi teri e: aii dreki trezo tirise.

²⁷ Drañano Yesu dre tazo aiidre, ki di, Mi koci amiki togo; ma e, mi koro nga ko.

²⁸ Petero dre ta akozo adi ti, ki di, Miri, mi e dí, mi kofe tai madre, ma koliro mi vuna yi drise.

²⁹ Adi dre tazo, ki di, Mi kali. Petero dre asizo kaluṅba ase, dre tecizo yi drise alile Yesu vuna.

³⁰ Adi kono lia dre di, adi roro; dre ora’a arile, adi tre, ki di, Miri, mi kopa ma.

³¹ Drañano Yesu dre ai dreka tejizo, dre akodi ruzo, dre tazo akodidre, ki di, A mi ta ka’ile cadi be, mi ka’i ko adose ya?

³² Aii komba kaluṅbana dre di, lia adre kiri.

³³ Dia adrelepi kaluṅbana dii dreki adini ledezo, tara’a, Mi Mva Nzambe adea e pati.

³⁴ Aii dreki ziazo ta’ana, aii caki Genesaretena.

³⁵ Ago bana di nadii koniki akodi dre di, aii mu la’u nadi ase o̱ei kurukuru, dre dia drafulepi dii dozo o̱ei adi vuna;

³⁶ aii dreki akodi ti zizo tawase, aii kotabero teji akodi bongoti: dia tabelepi dii lederuda.