Matayo 11 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Kadre nitini di Yesu kolanji ta dia ai tayilepi mudri‐dri‐iri dii e dre akele di, adi njida nalese ta tada, dre mando ngizo aiiki ba murungu dii na.

² Yoane koyi bagajona di, azi Kristu adea andu, adi mu dia ai tayilepi diise,

³ Dre tazo adidre, ki di, Mi dia alilepi di e ya? Ma kobaki amaki mi dia azina alilepi di vo ya?

⁴ Yesu dre ta akozo, dre tazo aiidre, ki di, Mi kodo amiki lati lizo, dre tai mi dre yile dii, tai mi dre nole dii tazo Yoanedre;

⁵ dia mi ako dii aiiki mi njiruda, dia sialepi siasia dii dre tecizo, karidia lederuda, dia bibale ako dii yi ta dre, a tinga dia dralepi dii dradra ase, a ngi tandu tani di dia lemerero dii dre.

⁶ Ari adre dia o ni tai ozo dele di akodi kusu ma vuna ko.

⁷ Aii dreki aiiki lati dora’a, Yesu ba tandu tale dia lezolepi dii dre Yoaneni tandu, ki di, Mi afo dre aṅbodrina ado nga no ya? lomi velepi liase di ni no ya?

⁸ Mi afodre ado nga no ya? ago bongo menimeni asolepi di ni no ya? Mi no ka dia bongo menimeni asolepi dii adreki mokonzini jona.

⁹ Mi afodre adose ya? nabi no ya? Ai’i, ma ta amidre akodi amba nabi ruse we.

¹⁰ Nidi akodi e, a tisi tandu dre, ki di, Mi no ka ma mu dia maña, ma dre ta lazizo adi ti, Adi li dridri mi kandrale koledero ami lati lizo di.

¹¹ Ma ta amidre pati, ki di, Dia afolepi toko a se diikia ketona adre amba Yoane dia Batisilepi di ruse ko: akodi adrelepi ca di mataya bu adea na dre adrezo amba adi ruse.

¹² Kitu Yoane, dia Batisilepi di adea lese aca ñanomvano a o tai lumbase mataya bu adea ru, ago lumbalepi dii dreki mataya dozo lumbase.

¹³ Nabi o̱ei, torati be dii, adreki nabi ta ta, Yoane acadre tai nidi akedre.

¹⁴ Mi le tai nidi drile di, nidi Eliya e su akodi dre alizo.

¹⁵ Dia adrelepi bibale be di, tai ni yi di, koyi wa.

¹⁶ Ma kota biro nidi adre ado tini ya? Biro nidi adre ngoro mva lirilepi nga girana dii tini, aii ziki aiiki arupiidre,

¹⁷ Dre tazo, ki di, Ama voki nga amidre, mi dre nga tozo ko; ama ga lulu amidre, mi dreki tiza bazo ko.

¹⁸ Yoane dre alile nga ñara’a ko, nga mvura’a ko dise, aii dreki tazo, ki di, Adi adre teri konji di be.

¹⁹ Adamuni Mva alidre nga ñara’a, nga mvura’a, aii dreki tazo, ki di, Mi no ka, ago kole, biñosu mvulepi di, arupia ateloni adea, takonji olepi dii be! I dre togi tadazo tani ai ta ole diise.

²⁰ Adi dre tandu bazo ba murungu di a vo i dre ai azi kokoroko lavulepi ambani dii ni ora’a dia ndrizo, aii dre aiiki togo alale ko dise, ki di.

²¹ Tiza ko’o ami ni, Korazina, tiza ko’o ami ni Betesaida, i dre azi kokoroko ole Turana, Sidona dise di, ngoro i dre ole ami lena dii tini, aii aladre aiiki togo, gunia na, tofo be.

²² Ma dre tazo amidre, ki di, Mi kodo tai asualepi asuasua di, amba tai asualepi asuasua di Sodoma e, Gomora be kitu tavo tazo di se.

²³ Mi, Kapanauma, a kotinga mi kuruna ya? Mi kosi Adezina, i dre azi kokoroko dii ole Sodoma na dise di, ngoro i dre ole ami lena tini dii, Sodoma adre kitu nidise.

²⁴ Ma ta amidre, ki di, Mi kodo tai asualepi asuasua di amba tai asualepi asuasua di la’u Sodoma adea kitu tavo tazo di ruse.

²⁵ Lokia nadise, Yesu dre ta akozo tale, dre tazo, ki di, Ma fe merisi midre Ata, Miri bu adea, vo be, mi dre tai nii zule togiliyi, dia tai nilepi dii ase dise, dre tai nii tadazo mva kuriro dii dre:

²⁶ Aizako Ata, kadre nitini di tai dre adrele tani ami mise dise.

²⁷ Ama ata fe nga o̱ei madre dre: dia alo ni Mva tejia ko, Ata alokodia, dia ni Ata tejia ko Mva alokodia, akodi be Mva le Adini tada dia e dre.

²⁸ Mi kali ma vuna, dia landelepi landelande o̱ei dii, dia nga lanji dolepi o̱ei dii, ma dre tai lovozo di fezo amidre.

²⁹ Mi kodo ama kembe‐fa amidre, dre tai nizo ma drekase; ma dre adrele kinikini, buṅa o ako ama togona dise, mi dre tai lovozo di kusuzo amiki lindrise.

³⁰ Ama kembe‐fa dre adrele añi dise, ama nga dozo di kawukawu.