Marako 8 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Kitu na’etu dialezolepi dii ko go adrele todia we di, aiikia nga ñale di yokodo, adi adre dia ai tayilepi dii zi i vuna, dre taza aiidri,

² Ama togo ti̱ dialezolepi diise, aii dreki adrele ma be ñanomvano kitu na diise, aiikia nga ñale di yokodo.

³ Ma komu aii lile aii bana tebirise di aii li lati balese fonafona; arukabakia ba mvumvu.

⁴ Dia adi tayilepi dii dreki ta akozo adi ti, ki di, Dia kicoa ambata fe dia nii dri̱ konua aṅbodrina angualese ya? aii dre ñale pizo.

⁵ Adi dre ta lizizo aii ti, ki di, Ambata be angopi ya? Aii dreki taza, Ambata nji‐dri‐iri.

⁶ Adi dre ta tazo dialezolepi dii dri̱ aii koliri vudri: adi dre ambata nji‐dri‐iri nii dozo, dre merisi fezo, i tupi ambata, dre fezoa dia ai tayilepi dii dri̱, bale aii kandra; aii dreki bazoa dialezolepi dii kandra.

⁷ Kosia adre bi ko, camva dii be, adi dre beneditu bazo rua, dre ta tazo koba kosia nii aii kandra indi.

⁸ Aii ñadre o̱ei, aii dre pizo: nga korono aii dre ta’ile di aii kudu kanji nji‐dri‐iri.

⁹ Dia dre adrezo ngale kutu su ya di, adi dre aiiki muzo lile.

¹⁰ Drañano adi dre šizo kaluṅbana dia ai tayilepi dii be, dreki alizo kofule Dalamanauta adea‐a.

¹¹ Farusii dreki afozo, dreki ta bazo lizile adi ti nga adi drika ta‐tadazo bualese di ndara’a, dre adini litira’a.

¹² Adi dre la’azo katu ai terina, dre taza, Biro nidi adre nga tatadazo di nda adose ya? Ma ta amidri pati, A kofe nga ta‐tadazo di biro nidi dri ko.

¹³ Adi dre aiiki ta’izo, dre ašira’a todi kaluṅbana, i nga ziale ta’ana.

¹⁴ Ta ambata dozo di vi aiiase vivi; aiiki ambata dole kaluṅbana aii be di ngale ambata alo ya di, azina yo.

¹⁵ Adi dre taza aiidri, Mì kolama ta, mì koga amiki mi taku Farusikia dise be, taku Erodi adea be.

¹⁶ Aii dreki ta taza aii be, ki di, Mà adre nga ñale di ako.

¹⁷ Yesu dre ta atogiara’a, dre taza aiidri, Mì adre ta ta adose ya, mì dre adrele nga ñale di ako dise? Mì atogia dre ko ya, mì ni dre ko ya? amiki togo mbamba ya?

¹⁸ Amiki mi be, mì ni nga ko ya? Amiki bibale be, mì yi ta ko ya? Tai aga ami lena ko ya?

¹⁹ Ma kotupi ambata nji dii dia kutu nji dii dri̱ di, mì kudu nga koroño kanji angopi ya? Aii dreki taza adidri, Kanji mudri‐dri‐iri.

²⁰ Ma ko tupi ambata nji‐dri‐iri dia kutu su dii dri̱ di, mì kudu nga koroño kanji angopi ya? Aii dreki taza adidri, Kanji nji‐dri‐iri.

²¹ Adi dre taza aiidri, Mì ni dre ko ya?

²² Aii dreki acazo Betesaidana. Aii dre ago miako di adrizo adi vuna, dre ngozo adiru, adi kotabero akodi.

²³ Adi dre ago miako di ruzo drikase, dre akodia drizo balese; ko fu tušu akodia miru di, dre ai drika bazo akodiru, dre ta lizizo akodi ti, ki di, Mi no nga ya?

²⁴ Adi dre nozo kuru, dre taza, Ma no dia kani’a, ma dre aiiki nole fe tini dise, tecira’a.

²⁵ Adi ba ai drika todi akodia miru; akodi dre nga nozo didi, mi lederuda, akodi dre nga nozo o̱ei dradra.

²⁶ Adi dre akodia muzo lile akodi bana, dre taza, Mi koši tejia ba nidi lena ko.

²⁷ Yesu e, dia ai tayilepi dii be, dreki fozo lile ba‐ase Kaisalia‐Pilipoa di; adi dre ta lizizo dia ai tayilepi dii ti lati bale, dre taza aiidri, Dia adre tazoa, ma adi e ya?

²⁸ Aii dre tepezoa adidri, ki di, Yoane dia Batisilepi di, arukaba ta Eliya, arukaba ta dia alo nabi kofule di e.

²⁹ Adi dre ta lizizo aii ti, ki di, Mì ta ma adi e ya? Petero dre ta akozo, dre taza adidri, Mi Kristu e.

³⁰ Adi dre logazo aiidri re, aii kota adini tandu diadri teji ko.

³¹ Adi dre tandu bazo tadale aiidri su Adamuni Mva dre lizazo ta bi diise, maligai̱ e, koani dridri dii e, dia tatišilepi dii be kogaki adi re, a fu adi, kitu na velero dise dre ngazo todia.

³² Adi dre ta nidi likizo ko. Petero dre adini dozo, dre adini ta bazo ndrile.

³³ Adi dre ai alara’a, dre dia ai tayilepi dii nora’a, dre Peteroni ndrizo, dre taza, Setani, mi li ma amvona: mi dre ta Nzambe adea rule lavose ko dise, mi ru ta diakia dii lavose kani’a.

³⁴ Adi dre dialezolepi dii zizo i vuna, dia ai tayilepi dii be, dre taza aiidri, Ta lavo lizo ma vuse di, ko ru dia alo di di, akodi koga ai tandi re, dre ai fa atipatipa tingazo, dre alizo ma vuse.

³⁵ Dia angodi ya le ai lindri tedrile, akodia lindri kaviro aviavi; dia angodi ya ko’o ai lindri avileda ama tandise, tandu tani dise, akodi kotedri ai lindri.

³⁶ Nga angopi ya go dia vo ñalepi o̱ei di dri akodia lindri avi asa?

³⁷ Dia kotifo ai lindri ado ngase ya?

³⁸ Dia kañi olepi mase, ama tase di biro muṅa olepi konji nidise, kañi ko’oro Adamuni Mva akodia tase, adi kali di utukufu Atana adea lena, malaika lolo dii be.