Marako 5 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Aii dreki cazo ta’ana, la’u Gerasakia lena.

² Dra adi dre afozo kaluṅba‐ase di, drañano ago teri konji be di afo mogo ketoase i dre rukušuzo adi be.

³ Akodia adrera mogo ketona; dia kicoa akodia lambe todia ko, ñarise tejia ko.

⁴ Aii dreki akodia lambele we komvese, ñarise dise, akodi dre ñariki kezo, dre komveki toṅozo konokono: dia iriñi be di tejia yo akodi o adrele malimali.

⁵ Nga̱cise, kituse, akodi adre trele kolia, mogo ketona, kira palena, ai rumva loara’a kirase.

⁶ I ko no Yesu rararo di ra nguse, dre tandizo adi kandra.

⁷ Dre trezo dradra, ki di, Ama tai mi be ado ya, Yesu mi Mva Nzambe adrelepi kuruna ambani di adea? Ma zi mi Nzambeni ruse, mi kofo ama mi ko.

⁸ Adi dre tale akodidri dise, ki di, Teri konji, mi kafo ago niase.

⁹ Dre ta lizizo akodi ti, ki di: Ami ru ado ya? Akodi dre taza adidri, Ama ru Legioni, mà dre adrele bi dise.

¹⁰ Akodi dre zizo adi ti komuro aii lile la’u niase ko.

¹¹ Kadre nitini kezia bi adreki nga ña kira nadi aolese.

¹² Aii dreki ngozo adiru, ki di, Mi komu ama kezia’a, mà koširo aii lena.

¹³ Adi dre ka’izoa aiidri. Teri konji dre afozo šile keziae lena. Kezia dreki tozo golokoase yitaparana: aii ngale kutu iri ya di, aii dreki drazo yina.

¹⁴ Dia kezia likilepi dii dreki lapazo, dreki ta nidini andu tazo ba murunguna, la’uase. Aii dreki alizo ta acalepi di no.

¹⁵ Aii dreki alizo Yesu vuna, aii dreki dia daimona dreki rule dridri di nozo, dre lirira’a, bongo be i ru, tiritiza akedre ru asa, akodi adrelepi legioni be di: aii dreki rozo roro.

¹⁶ Dia ta nidi nolepi dii adreki dia daimona dreki rule dre di’a tandu tada aiidri, tandu keziakia di be.

¹⁷ Aii dreki tandu bazo ngole adiru konga aiiki kofulease.

¹⁸ Adi dre šira’a kaluṅbana, dia daimona dreki rule dre di adre ngole adiru i koliriro adi be.

¹⁹ Adi ka’i akodidri ko, dre taza akodidri, Mi nji mi bana, ami arupii vuna, dre ta murungu Miri dre ole mise dii tepezo aiidri, adini ta ki̱niki̱ni midri di.

²⁰ Akodi do ai lati njizo, dre ta rubi nidi andu bazo la’ule Dekapolina, ta murungu Yesu odre akodidri: dia o̱ei aiiki lindri dre gazo gaga.

²¹ Yesu ko zia todi kaluṅba‐ase ta’ana di, dialezolepi bi dii keberu akodi vuna: akodi dre adrezo yitapara laga.

²² Ago alo sinagogoliiki kofulease dre alizo, runa Yairo, dre adini nora’a, de adi pa.

²³ Dre ngozo adiru we, ki di, Ama mvatoko camva di o ta drazo: ma ngo miru mi kaliro drika ba akodiru a koledero akodi adrele.

²⁴ Adi dre lizo adi be, dialezolepi bi dii liki adi vuse, dreki adini kipizo.

²⁵ Toko, akodia kari dre afozo kona mudri‐dri‐iri,

²⁶ dre lizazo alokolii bi diikia tase we, dre ai nga gizo o̱ei dre, rubana dre lovozo tejia ko, amba akodia dra konji dridri di ruse,

²⁷ dre Yesuni rubi yizo, adi ali dialezolepi diiki kofulease Yesu amvolese, dre akodia bongo tabezo.

²⁸ Adi dre tale dise, ki di: Ma kotabe akodia bongo kodi’a di, a kolede ma kani’a.

²⁹ Drañano kari afolepi di sedre, adi dre nizoa i ru dra konji ake i ruse dre.

³⁰ Drañano Yesu dre atoi giazoa i lena iriñi i lese di afodre, ala e dialezolepi dii ketona, dre taza, Adi tabe ama bongo ni ya?

³¹ Dia adini tayilepi di dreki taza adidri. Mi no dialezolepi dii adreki ami kipi, mi dre taza, adi tabe ma ni ya?

³² Adi dre mi lebezo i lagase dia ta nidi olepi di no.

³³ Toko dre liara’a tirise, dre ta nidi a o idri di nizo, ali dre dezo adi kandra, dre ta pati di tepezo o̱ei adidri.

³⁴ Adi dre taza akodidri, Mvatoko, ta mina ka’ile di lede mi dre; mi li, ami togo kadre kedrikedri, a kolede mi ami dra konji‐ase.

³⁵ Adi dre ta tara’a, aii aliki sinagogoliini joalese, dre taza, Ami mvatoko dradre, mi go Togilii nidini arukia adose ya?

³⁶ Yesu yi ta aii dre tale di, dre taza sinagogoliidri. Mi kororo ko, mi koka’i kodi’a.

³⁷ Adi le dia alo di lile i vuse ko, alo Petero e, Yakobo e, Yoane be Yakoboni adrupi.

³⁸ Aii dreki acazo sinagogoliini jona; adi dre lulu gale di nozo, dre dia bi adrelepi ngole mindra be dii, adrelepi ao ngo we dii nozo.

³⁹ Adi ko’o šile di, i dre taza aiidri, Mì adre lulu ga, adrezo ngole adose ya? Mva dradre ko, adre ayiko.

⁴⁰ Aii dreki adini tabizo gule gugu. Adi ko’o aii fole joase o̱ei di, i dri mvani ata e, andre be, dia adrelepi i be dii be, aii dreki šizo vo mva dre ayizo di lena.

⁴¹ Dre mva ruzo drikase, adi dre taza akodidri, Talita kumi, ta alale tale di, Ajukumva ma ta midri, mi konga kuru.

⁴² Drañano ajukumva dre ngazo tecile; akodia kona mudri‐dri‐iri. Drañano aiiki lindri dre gazo gaga we.

⁴³ Adi dre taza aiidri, tejia dia koniro ta nidi ko. Adi dre taza aii kofe nga akodidri ñale.