Marako 16 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Sabiti ko lavudre di Maria Magadala e, Maria Yakoboni andre e, Salome be, aii gi nga ngulepi tani dii, aii kaliro adini rumva li.

² Dribise kitu poso adea a’ulepi dridri dise, aii dreki alizo mogona kitu kafodre di.

³ Dreki taza aiiki kofulena aii ki di, Adi lololi kira butise amadri ni ya?

⁴ Dreki mi dozo no a, kira lolidre: kira nidi dre adrele murungu ngaeko dise.

⁵ Aii dreki šira’a mogona, dreki kadura lirilepi drigualese di nozo, bongo kemve adiru; aiiki lindri dre gazo gaga.

⁶ Akodi dre taza aiidri Amiki lindri koga ko: mì adre Yesu dia Nazaretalese di ni nda, a kipa akodi fe atipatipadri; akodi ngadre; akodi nole yokodo: mì no ka, vura aii dre adini bazo di.

⁷ Mì koli, mì kota dia adini tayilepi dii dri̱, Petero be, adi li amidri dridri Galilayana, mì kono adi dale, ngoro adi dre amidri tale di tini.

⁸ Aii dreki fozo lapale mogoase; tai liazo di, ta aiiki lindri dre gazo gaga di dre aiiki ole dise: aii dreki ta tazo diadri teji ko; tiri dre aiiki ole dise.

⁹ Adi ko ngadre di dribise kitu poso adea a’ulepi dridri di adi aga Maria Magadala kandra dridri, i dre daimona nji‐dri‐iri dii ladrozo akodi ase kiono.

¹⁰ Akodi nji̱, dre ta tazo dia adrelepi adi be kiono dii dri, aii dreki ao ngora’a mindra be.

¹¹ Aii ko yi adi adre lidriru di, Maria dre adini nozo dre, aii ka’iki ko.

¹² Tai nii vudria di i dre adini tadazo lasu azi di be, dia aiikia iri nii dri, aii dreki tecira’a lati balase lira’a la’una.

¹³ Aii dreki nji̱zo dreki taza aiiki ambiidri: aii ka’iki aiidri ko.

¹⁴ Velero adi dre ai tadazo mudri‐dri‐alo niidri, aii dreki lirira’a nga ña; adi dre aiikia ta ka’ile ko e ta aiikia togo dre adrele mbamba di be ndriza aii dreki dia adini nolepi adi ngadre dii ka’ile ko dise.

¹⁵ Adi dre taza aiidri, Mì koli voase o̱ei, dre tandu tani ngizo dia dri̱ o̱ei

¹⁶ Dia ta ka’ilepi di, i dre akodia abatisizo a kotedri akodi; dia ta ni ka’ilepi ko nia tavo konji.

¹⁷ Ta ta‐tadazo nii kaliki dia ka’ilepi dii vuse; ama ruse aii koladro daimona dia ase; aii kota ta ti todise:

¹⁸ aii kotodo mi kuru, aii komvu ado nga ya drazo asa dradra di di, ko’o aii tejia ko, aii koba dri̱ka dia drafulepi diiru, aiiki ruba kolovoro.

¹⁹ Kadre nitini tako Miri Yesu ta ta aiidri da di‐a, a̱ dri akodi kuru buna, akodi dre lirizo Nzambeni drigualese.

²⁰ Aii dreki fozo lile, dreki ta ngizo voase o̱ei. Miri dre ta ole aii be, dre ta ni ozo adrele kokoroko ta ta‐tadazo nii, dre alile aii vuse dise. Amina.