Marako 15 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Drañano dribise koani dridri dii e, maligae e, dia tatišilepi dii e, dia rukebelepi vura ta dii be adreki ta ta aiiki kofulana, dreki Yesuni lambezo, dreki lizo fe adi Pilato vuna.

² Pilato dre ta lizizo adi ti, ki di, Mi Maleke Yudakia di e ya? Adi dre ta akozo, dre taza adidri, Mi adre ta.

³ Koani dridri dii dreki tai lodzazo adiru bi.

⁴ Pilato dre ta lizizo adi ti todi, ki di, Mi akota tale ko ya? Mi no ka, ta be we aii dre lodzale miru dii.

⁵ Yesu go ta ako tejia ko; kadre nitini Pilateni lindri gada.

⁶ Nga ñale murungu na tu adi go bagodia alo di tri aiidri, akodi aii dreki zile adi ti di.

⁷ Dia anda alo, runa Baraba alambelambe ayile dia la̱buandu solepi kiono dii be, dia dia fulepi drale ajua dii.

⁸ Dialezolepi dii dreki ngazo tandu ba zile adi ti adi ko’o ngoro i dre adrele ole aiidri di tini.

⁹ Pilato dre ta akozo, ki di, Mì le ma kotri Maleke Yudakia di amidri ya?

¹⁰ Adi dre atogiale dise koani dridri dii feki akodi aiiki togo dre asuale akodiru dise.

¹¹ Koani dridri dii gaki dialezolepi niiki a ni, amba ta nidi adi dre Barabani trizo aiidri di.

¹² Pilato dre ta akozo todia, dre taza aiidri, Ma ko’o ado ya akodidri mi zi Maleke Yudakia di?

¹³ Aii dreki trezo todia, ki di, Mi kokipa akodi fe atipatipadri.

¹⁴ Pilato dre taza aiidri, Adose ya? Akodi o ado ya konji di? Aii dreki trezo ambani, ki di, Mi kokipa akodi fe atipatipadri.

¹⁵ Pilato dre lezo dialezolepi niiki togo kokini, a tri Baraba aiidri, dra i coa Yesu kinise di, i dre akodia fezo kipale fe atipatipadri.

¹⁶ Tukutuku dreki adini sezo maraṅana, a zi runa Pretorio; aii dreki kopañi ruzizo o̱ei.

¹⁷ Aii dreki bongo keka di ašozo adiru, dre kuci lesezo pa̱ripa̱riru asole adi dri.

¹⁸ Aii dreki ta zi adi ti, ki di, Ari be, Maleke Yudakia di.

¹⁹ Aii dreki adi dri coazo lomise, dre tušu fuzo adiru, dre aiki kaya̱ti tira’a ta̱ndiki adidri.

²⁰ Aii ko ta̱bi adi di, aii ngi bongo keka di adi ruse, aii dreki adini bongo tošozo adiru. Aii dreki adini sezo lile kipale fe atipatipadri.

²¹ Aii dreki dia alo lavulepi di ozo lile aii be, runa Simona dia Kurenea di, alilepi la’uase di, ata Alesandura adea e Rufu adea be, akodi kodoro fe adini kipazo di.

²² Aii dreki alizo adi be vo Gologotaa, ala nidi tale di, vo drifa adea.

²³ Aii dreki biño fezo aidri mvule akudu ngialo mure be: adi do mvule ko.

²⁴ Aii dreki adini kipazo fe atipatipadri, dreki adini bongo la̱njizo aiiki kofulease, gumari bera’a adi o do ni ya.

²⁵ Saa na dise, aii dreki adini kipazo fe atipatipadri.

²⁶ A tiši ta lodzale adiru di bale adi drile, ki di, Maleke Yudakia di.

²⁷ Aii kipa kugu iri dii fe atipatipadri adi be, alo di adini drigualese, alo di adini lijialese.

²⁸ Ta tišilepi di talepi di, ki di, A la akodi dre ta konjiolepi dii be, i dre tai nidi ozo akele dre.

²⁹ Dia lavulepi dii dreki adini aizezo aii dreki aiki dri kayara’a, dreki taza, Ha! Mi yekaluni tizalepi di, yekaluni šilepi kitu na di,

³⁰ mi kotedri mi, mi kaši fe atipatipadrise.

³¹ Koani dridri dii ta̱bi adi aiiki kofulea nitini, dia tatišilepi dii be, ki di, Adi tedri dia aziadii, kicoa i tedri ko.

³² Kristu Maleke Yisaraelikia di kaši fe atipatipa drise ñanomvano, mà konoro ka’ile. Dia kipale fe atipatipadri adi be dii dreki adini voazo.

³³ Saa njikazia di kaca di vo o̱ei di go adrele tinimvaro saa nji‐dri‐su di acazo.

³⁴ Saa nji‐dri‐su dise Yesu dre trezo kuli be dradra, ki di, Eloi, Eloi, lama sabakitani, ta alale tale di, Ama Nzambe, ama Nzambe, mi ta’i ma adose ya?

³⁵ Dia arukaba adrelepi lagana dii ko yi ta nidi di, ki di, Mi no ka, adi ara Eliyani zi.

³⁶ Dia alo di dre razo, dre mamalia ozo kolosu be bi, dre soza lomidri, dre fezo adidri mvule, ki di, Kota’i; mà kono Eliya kali adini do vudri ki.

³⁷ Yesu dre trezo kuli be dradra, dre ai lindri fezo lile.

³⁸ Bongo kacua yekalu adea a ši ana iri, kurulese cale tabuna.

³⁹ Kendurioni adrelepi adi laga di ko no adi o ai lindri lile nitini di, ki di, Ago nidi Nzambeni Mva e pati.

⁴⁰ Toko koangia dreki adrezo ta no rararo, adreki aiki kofulena Maria Magadala e Maria e andra Yakobo camva di adea Yose adea be, Salome be;

⁴¹ toko alilepi adi vuse dii, adi kadre Galilayana di, dreki ta ozo adidri, toko azina ambalepi bi Yerusalemina adi be dii.

⁴² Ñano nga ka̱ni dre di, kadre nitini di kitu nidi nga ledezo di kitu sabiti adea dri dridri.

⁴³ Yosefa Arimatayalese di’a di ali, ago di togilii ta olepi piri di, akodia tandi dre mi bazo Nzambeni matayase; dre šizo Pilato vuna tiri ako, dre Yesuni rumva zizo adi ti.

⁴⁴ Pilatoni lindri dre gazo akodi dradre di se: dre kendurionini zizo i vuna, i dre ta lizizo adi ti akodi dradre trokiono ya di.

⁴⁵ Adi ko yi kenduriono tise di, i ka’i Yosefadri avo dozo.

⁴⁶ Akodi gi gotono‐bongo, dre adini adozo vudri, dre adini ndrazo gotono‐bongose, dre adini bazo buna, a̱ di kirana kiono; dre kira lilizo butise.

⁴⁷ Maria Magadale e, Maria Yoseni andra be aii dreki adini bara nozo.