Marako 13 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Adi dre fora’a yekaluase dia alo ai tayilepi di dre taza adidri, Togilii, mi no kira nii ka, mi no jo dii ka!

² Yesu dre taza adidri, Mi no jo murungu nii ya? A kota’i kira alo di konua kira azididri ko, a kotiza o̱ei.

³ Adi dre lirira’a kira Bilayadrina, yekalu laga konale, Petero e, Yakobo e, Yoane e, Andarea be adreki ta lizi adi ti aii taiya,

⁴ ki di, Mi kota amadri ta nii aca angutu ya? Ta nii o̱ei ko’o ta acazo di ta tatadazo di angodi kaliro ya?

⁵ Yesu dre ta bazo tale aiidri, ki di, Mì košu ami ru dia alo di ko’o ami avile latia ko.

⁶ Dia bi dii kaliki ama ruse aii dre ta tara’a ki di, Ma akodi e; aii ko’o dia bi dii avile latia.

⁷ Mì ko yi ta dia dreki adrezo rubu dii, ta rubuzo diiki rubi, amiki togo ko’o ta kuku ko: su ta nii dreki acazo, nga akezo di acadre ko.

⁸ Amvutu diašuru azidi dreki nga rubu diašuru azidi be dise, mataya azidi dre ngazo rubu mataya azina be: ki̱diki̱di kokaiya vo la’u nii‐ase; karabo kaca, ta lizazo di andu ba acale ta nii be.

⁹ Mi košu ami ru: aii dre amiki dozo fele vura talepi diidri; dre amiki coazo sinagogo dii lena; mì kadre kuru mirii kandra, maleke kandra, ama tandise tandu bazo aiidri dise.

¹⁰ Su tandu tani ngizo zia diašuru o̱ei dii dri̱.

¹¹ Aii kose ami lizo tavo ta di, dre amiki dozo fele dia dri̱, amiki togo ko’o ta kuku dridri amikia ta tara’a ko; ta angodi ya a fe amidri saa nidise, mi kota nidi, ami ta nidi talepi dii e ko, Teri Lolo e.

¹² Adrupi kofe adrupia drale, ata dre mvana fezo drale; anjia konga aiiki tilepi diiru, dreki aiiki ozo drale.

¹³ Dia o̱ei dii koze ami zeze ama ruse: dia togo trotro di ta nii dre akezo di, a kotedri akodi.

¹⁴ Mi kono di ta konjilepi to di ta nga dre rutizazo di adea dre adrera’a voa su adrele ko (dia ta ñalepi di koni wa) dia adrelepi Yudayana dii kilapaki lile kiranae vuna,

¹⁵ dia adrelepi jodrina di kaši vudri ko, kaši jona nga do ai joase ko:

¹⁶ dia adrelepi amvuna di kago ai bongo kacua di do ko.

¹⁷ Tiza ko’o toko adrelepi a be dii, toko ba felepi ndrolepi dii kitu na’ese.

¹⁸ Mì kongo ta nii cale yiguna ko.

¹⁹ Kitu na’ese di tiza adre bua̱ko, ta Nzambe dre nga kayua bazo di, ta ñano di, dridri dia no tiza nitini ko, go acale todia ko.

²⁰ Miri koki kitu nii ta̱li ko di, apa dia ko: adi ki kitu nii ta̱li dia i dre drile dise.

²¹ Dra alo di kota amidri di, ki di, Mì no ka, Kristu be konua; mì no ka, Kristu be konana; mì koka’i ko:

²² Kristu kinzoro dii, nabi kinzoro dii dreki afole dise, aii kotada ta ta‐tadale dii, ta diaki lindri dre agazo gaga dii be, aii ko kicoa dia Nzambe dre drile dii o avile latia di.

²³ Mì košu ami ru: mì no ka, ma ta ta o̱ei amidri kiono.

²⁴ Kitu kona’etu di tiza murungu nadi ni vudria di, kitu kadre tinimvaro, mba koka paramvero,

²⁵ bibinae kadre adele ade buase, nga kokoroko buna dii kadreki bukose.

²⁶ Dra aii kono Adamuni Mva alilepi ndurukua, iriñi be we di utukufu be.

²⁷ Dra adi komu malaika lile, dre dia i dre drile diiki kebezo lia su dii ase, voase di mvu ambani, buase di mvu ambani.

²⁸ Ñano mì koni tandu malobia adea alale di: akodia fekola kogo adrele aruro di, bina dre afozo, mì ni kona o ta a’uzo;

²⁹ ami koangia ditini, mì kono ta nii dre acara’a di, mì koni adi adre añi, aizako, adre jotile.

³⁰ Ma ta amidri pati, Biro nidi kolavu ko, ta nii kake ka.

³¹ Bu kolavu vo be, ta maña dii lavu ko kani’a.

³² Kitu anda, saa anda, dia alo di ni ko, malaika buna dii niki tejia ko, Mva ni ko, alo Ata ni ni.

³³ Mì kosu ami ru, mì kolama ta, dre ngozo Nzambe kandra; mì dre lokiana nile ko dise.

³⁴ Kadre ago adrelepi la’u azidi lena di tini, dre ai jo ta’izo, dre ai adremakandraki mi bazo la̱njile la̱njila̱nji, dre aiiki a̱zi lanjizo aiidri, dre ta fezo adre‐jotile dri koangia akodi kolama ta.

³⁵ Kadre nitini kolama ta: mì dre nile ko dise, miri jo adea kago di, ngale yendrose ya di, ngale nga̱ci ketose ya di, ngale agolowa dre wara bera’a ya di, ngale dribise ya di;

³⁶ adi kali ṅbororo di, ngale i dre amiki kušuzo ayikora’a.

³⁷ Ta ma dre tale amidri di, ta ma dre tale dia o̱ei dii dri̱ di, Mì kolama ta.