Marako 12 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Adi dre tanduniiki bazo alale aiidri, ki di, Ago tidi biño amvua, dre kala sozo kurukuru, dre bu gazo murungu nga biño zuazo di bazo, dre mvorogo šizo, dre amvu ta’izo dia biñoni a̱zi olepi dii dri̱, aii koliriro adi vudria, adi dre njizo la’u azidia.

² Lokia biño lo’wa dre kazo di acadre adi adre adremakandra mu dia biñoni a̱zi olepi dii vuna, adi kodoro biño lo’wa kalepi amvua dii dia biñoni a̱zi olepi dii vulese.

³ Aii dreki akodia ruzo coale, dreki akodia muzo tako.

⁴ Aii dre gozo adremakandra azidi mu aii vuna todia; aii dreki akodia dri ozo lazia be, dre akodia fuzo konji.

⁵ Adi dre azina muzo; aii dreki akodia fuzo drale: adremakandra bi; arukaba aii dreki coale nii, arukaba aii dreki fule drale nii.

⁶ Azina be alo, mva akodiadea tašila di: adi mu akodi velero aii vuna, dre taza, Aii koba ama mvani kañi.

⁷ Dia biñoni a̱zi olepi nii dreki taza aiki kofulena, Nidi mva adrelepi atani vudria di, mà kali, mà kofu akodi drale, vo nidi kogoro adrele amakia di.

⁸ Aii dreki adini ruzo fule drale, dre adini bezo amvuase.

⁹ Kadre nitini miri amvu adea ko’o ado ya? Adi kali, dre dia biñoni a̱zi olepi nii kizazo, dre amvu fezo dia azidiidri.

¹⁰ Mì na teji ta tišile nidi ko ya; Kira nidi dia jošilepi dii gare, A ba kira nidi kira kayua diro jokušuna:

¹¹ Ta nidi Miri adea, Amaki lindri aga asa agaga?

¹² Aii dre ta nda adini ruzo, aii dre dialezolepi dii rozo roro; aii dre atogiale dise adi adre ta ni andu ala aiiru; aii dre adini ta’izo, dre njizo.

¹³ Aii dre Farusii arukaba muzo, dia Erode adea arukaba be adi vuna, aii ko’oro muṅa tandu ndazo adi tise.

¹⁴ Aii kali di, aii dreki taza adidri Togilii, mà ni mi dia pati e, mi ro dia tejia ko: mi ba ami togo diaki tase ko, mi dre lati Nzambe adea tadazo pati: A kogi bedaia Kaisala adea, a kogi ko di angodi togi e ya?

¹⁵ Mà kogi ya? Mà kogi ko ya? Dre aiiki togo iri di atogiara’a adi dre taza aiidri, Mì adre ama liti adose ya? Mì ado faranga madri, ma konoro.

¹⁶ Aii dre adoza adi, dre taza aiidri, Nidi adini la̱su e ya? ta tišile di be? Aii dre taza adidri, Kaisala adea.

¹⁷ Yesu dre taza aiidri. Mì kaji Kaisalaa ngae Kaisaladri, mì kaji Nzambea ngae Nzambedri. Aiiki lindri dre gazo gaga we adise.

¹⁸ Sadoke dreki alizo adi vuna, aii dia ta talepi dii nganga dra’ase di yokodo; aii dreki ta lizizo adi ti, ki di,

¹⁹ Togilii, Mose adre tišile amadri, ki di, Agoni adrupi ko dra di, dre toko ta’izo ai vudria, mva ako, akodia adrupi kodoro akodia toko mole, dre mva tizo adrupiadri.

²⁰ Dia be nji‐dri‐iri aii adrupiro: kayua di dre toko dozo mole, dre drara’a ta’i mva ko.

²¹ Adrupina azi iri di dre adini dozo mole, dre drazo, ta’i mva ai vudria ko; adrupina na di ditini.

²² Dia nji‐dri‐iri nii dreki mva talizo ko, aiki vudria toko nidi dre drazo vele.

²³ Nganga dra’ase dise aiki kofulea adi adea toko e ya? adrupi nji‐dri‐iri nii dreki adini dole mole dise.

²⁴ Yesu dre taza aiidri, Tandu nidise mì avi ko ya, mì ni ta tišile dii ko, mì ni iriñi Nzambe adea ko.

²⁵ Aii ko nga dra’ase di, aii mo ko, aii fe dia mole di ko, aii dreki malaika buna dii tini kani’a.

²⁶ Tandu dia dralepi dii dreki ngazo di, mì na buku Mose adea’a ko ya, tandu fekoñu adea, Nzambe adre ta ta adidri ki di, Ma Nzambe Abarayama adea, Nzambe Yisaka adea, Nzambe Yakobo adea?

²⁷ Adi Nzambe dia dralepi diikia di ko, adi Nzambe dia lidriru diikia di e: ta nidise mì avi we.

²⁸ Dia tatišilepi alo di dre alizo, dre ta lizile aii ti di yizo, dre nizo, adi dre ta akozo aii ti tani, akodi lizi adi ti, ki di, Togi angodi togi azina dri dridri ya?

²⁹ Yesu ako ta, ki di, Nidi togi kayu di, Yisaraele, mì koyi wa, Miri Nzambe amakia di Miri alo di:

³⁰ mi kole Miri ami Nzambe ami togose o̱ei, ami lindrise o̱ei, ami ta tušurase o̱ei, ami iriñise o̱ei.

³¹ Togi iri nidi, Mi kole ami ba̱pi ami tandi tini. Amba togi azina togi nii ruse ko.

³² Dia tatišilepi nidi dre taza adidri, Togilii, mi adre ta ta tani pati, akodi alo; azina yokodo, alo akodi:

³³ akodia lezo togo o̱ei dise, tanini o̱ei dise, iriñi o̱ei dise, dre ai ba̱pini lezo ai tandi tini, amba ta za tefezo zale koloṅboro di, ta za tufuzo Nzambe ledezo di ruse o̱ei.

³⁴ Yesu katogia di adi ako ta tale togise, dre taza adidri, Mi mvu Nzambeni mataya ruse ko. Ta nidini vudria dia ro ta adini lizizo roro.

³⁵ Yesu dre ta akozo, dre taza, i dre tai tadara’a yekaluna, ki di, Dia tatišilepi dii taki Kristu Dawidini mva angotini ya?

³⁶ Dawidini tandi ta Teri Lolo di lena, ki di, Miri ta ama Miridri, i ki di, Mi koliri ama drigualese Ma dre ami kariba tobazo ami pandu.

³⁷ Dawidini tandi zi akodi Miri, akodi ai mva angotini ya? Dia tako dii dreki adini ta lezo yile we.

³⁸ Adini ta tadara’a, adi ki di, Mì koga amiki mi dia tatišilepi diise, aii leki tecile bongo kacua dii be, aii leki dia koziru ta aii ti libongona be,

³⁹ aii leki vo kayua lirizo sinagogona dii be, aii leki vo kayua adrezo nga murungu ña dii indi:

⁴⁰ aii ña taitokokia ngae tako, dre litiza ngole Nzambe kandra we; dia niikia tavo konji dia aziakia ruse.

⁴¹ Adi dre lirizo sandu‐parata‐bazo di laga, dre parata dialezolepi diikia lebele sandua di nozo: dia bi adrelepi ngali’iro dii lebeki parata we lena.

⁴² Taitoko anda lemerero acadre, dre pinda iri dii bezo, kicoa senge ko.

⁴³ Adi dre dia ai tayilepi dii zizo i vuna, dre taza aiidri, Ma ta amidri pati, amba pinda taitoko nidi adea bele di dia o̱ei parata lebelepi sandua di kia dii ruse:

⁴⁴ aii o̱ei dreki aiki parata lebele aiiki paratani ambi murungu di ase dise; akodia ngalavoase i dre ai nga bezo o̱ei, aizako nga akodiadea ñale di be o̱ei.