Tîtɛ 3 - Kɑɑ Fí

Ntɛ́ yi mbɔ pʉɔ-Kɛlístɔ nɑ́ŋ

¹ Kẅíitɛ pʉɔ-Kɛlístɔ ŋɡɔ pɔ́p ɡẅɛɛ nɛzúꞋ ntsu-pɑsɑ́Ꞌŋɡɔŋ pɔ́p pɑtsiinɛ ŋɡɔŋ, ŋ́ɡɛ yúu mi pɔ́p sɛ́ ḿbíkŋɛ, ḿbɛn ńnɑ́ŋ ńtʉ́ʉ pɔ nɛɡɛ mɛnu mi ɛ́ pɔŋnɛ.

² Cú mbɔ̌ pɔ́p ŋɡɔ kɔɔ pɔ́p cú nu kɛpɔŋ mbɔ̌ ŋu, ŋɡɔ pɔ́p pɑ́ɑ mɛfɛꞋ, ḿbɔ́ pʉɔ mbɔ́tnɛ pɔ́tnɛ́nɛ, ńnɑ́ŋ ŋ́ɡɑ́ mɛkuꞋ mbɑ wɔ̌ lɑ́.

³ Ɛ́ kɑ pɔ́ yɛcɔ́ ŋkɑ́ pɛkŋɛ ɡúu pɔ́ pɑɡɛ nu kɛ́ sɑ́ŋ, ḿbɔ́ pɑtʉʉtú mbɔ̌ Sɛ́, ḿbɔ́ pʉɔ pi pɔ́p fɑɑnɛ́nɛ ndúŋ, ḿbɔ́ pɛkwɑɑ mbɔ̌ yúu tsʉʉ yi mbʉʉ yɛkŋɛ tsʉ́ʉnɛ́nɛ wɛkŋɛ nɛtsɑ́ɑ mbɑ nɛɡɛ. Pɛkŋɛ kɑ pɔ́ pʉɔ ńzɑ́ɑ sɔ́ɔ, ḿbɔ́ ɡɑŋkɛɡʉ̈ɔꞋ, ḿbɑɑnɛ mɛmbʉʉ mɛkŋɛ tɛꞋ.

⁴ Lɑ́ ŋkɑ́ yi Sɛ́ ẅi ɑ ɡɛnɛ pɛkŋɛ luk nyɛtnɛ ŋɡɔ tʉ́m yɛ́ pɔŋ, ɑ pɛn ŋ́kɔŋ pʉɔmɛsɔŋ lɑ́,

⁵ ɑ ɡɛ pɛkŋɛ luk. A ɡɛ pɔ́Ꞌɔ ɛ́ pɔɔ pɔ́ ŋɡɔ pɛkŋɛ ɡɛ mɛnu mi ɛ́ tʉ́ʉnɛ ndʉ́ŋndʉŋ pɔ́, lɑ́ ɛ́ mbíꞋŋɡɔ ɑ tsɑ́ɑ mɛjʉ́ŋ mɛkŋɛ. A kɑ suk mɛnu kɛpɔŋ mɛkŋɛ, ńdɛɛ nǔu Zẅikŋɛ Lɛ́ɛnɛ́nɛ ŋ́ɡɛ pɛ́ pí wɛkŋɛ nɛpí wɛ fí.

⁶ Sɛ́ kɑ lɛɛ nǔu Yɛ́su Kɛlístɔ, jʉ́ ẅi ɑ ɡɛnɛ pɛkŋɛ luk, ńníꞋ Zẅikŋɛ Lɛ́ɛnɛ́nɛ ɛ̂yɑ́ tʉ́m pɛkŋɛ kɛ́ ɡʉɔꞋ.

⁷ A kɑ níꞋ pɑ́Ꞌɑ nɛpɔ́ yi pɛkŋɛ ɡʉ ńdɛɛ nǔu pɔŋ tʉ́m yɛ́, ńtsʉ́Ꞌ pʉɔ ndʉ́ŋndʉŋ ŋ́ɡẅɛɛ luk kɛ́mɛ pɑ́Ꞌ pɛkŋɛ nɑŋ ḿbɔ́ ńzẅíꞋlɛ lɑ́.

⁸ Mɛnu mɔnɛ mi ɛ fúnɛ nɛcú lɑɑ zúꞋu ḿbɔ́ pɔ́Ꞌɔ. M bɛn ḿbɔ́ ŋ́kɔŋ ŋɡɔ ɔ tsuŋ ɛ́sẅíi wɔ́p sʉ́Ꞌnɛ, ńjí ŋɡɔ pʉɔ tsʉʉ pi pɔ́p zɑ́pnɛ tʉ́m yɔ́p nǔu Sɛ́ ɡʉ ɛ́sɑ́Ꞌ tʉʉ nɛɡɛ mɛfɑꞋ sʉ́Ꞌnɛ, ɛ́ pɔ́ pɔ́Ꞌɔ, yúu mi ɔ zíꞋnɛ pɔŋ ḿbɛn ḿbɔ́ yúu mi ɛ́ ńcẅɛ́lɛ́ pʉɔmɛsɔŋ.

⁹ Lɑ́ pɑ́ɑ nɛzɔŋ mɛnu kɛ́ tú, ḿbɑ́ɑ mɛnu nǔu mɛlík-pɛmɑ̂ŋɡɑpnjẅɛt, ḿbɑ́ɑ nɛzɔŋ nu ńdɔk ɛ́shɔt shʉ́-nɛpʉ́ʉ-Mɔ̌sɛ̂ɛ, ɛ́ mɛnu kɛ́ tú mi mbɔ ɛ́ pɔɔ cẅɛ́lɛ́.

¹⁰ Ŋu lɑɑ ḿbɔ́ ŋu ẅí ɑ mɑꞋnɛ fɑkŋɛ tsɛt cúꞋlɛ-pʉɔ Kɛlístɔ, ɔ pɑpmɛ wɛ́ tɑ́Ꞌ ŋkɑ́ ɑ pɔɔ zúꞋ, ɔ pɑ́ɑtɛ ḿbɛn ḿbɑpmɛ wɛ́ ɑ kɛ mbɔɔ zúꞋ, ɔ cẅɛɛtɛ wɛ́ tsɛtsɛt pʉɔ.

¹¹ Ɔ jí ŋɡɔ ntɛ́ ŋu pɔ́Ꞌɔ kɑ́ pɛn ḿbɔ́ nǔu sɛ̂ndúŋ-Sɛ́ pɔ́, ḿbɔ́ ŋɡɛmɛnu kɛpɔŋ. Mɛnu kɛpɔŋ mɛ́ sɛ́ ŋ́ɡɛ ŋɡɔ ɑ vu ntsɑŋ mbi Sɛ́.

CɛꞋlɛ lɔk ńdẅiklɛ

¹² N dɑɑ ńtúu Altɛmîs kɛ pɔ Tishik ɔɔ mbɔ̌ ɡu, ɔ sɑ́Ꞌ tʉʉ tɛ ńtɔ́ ŋ́kẅɛ́ɛtɛ wɑ́ɑ tʉ́sɔŋ-Nikɔpɔlɔs. Ɛ́ zʉꞋ yi ŋ kɑ zɑ́pnɛ ŋɡɔ ŋ ɡʉ ńnɑ́ŋ zúꞋu nǔu ŋkɑ́-fɑ́k ɡwɛ́.

¹³ Zɛnɑ́s ẅi ɑ ḿbɛꞋ mɛlɑ́Ꞌ-pʉɔ zʉꞋ-ntsɑŋ, tɛ mbɑ Apɔlɔ́s lɑɑ ŋ́ɡɔ ńcʉ́ɔ sɛ̂ndúŋ nɛnɛn, ɔ lɔɔ shʉ́ ŋ́ɡɑ́ kʉ̈ɔ́ lɑ́ yi ɛ́ sɛ́ ḿbíkŋɛ ŋɡɔ pɔ́p ɡẅɛɛ.

¹⁴ Ɛ́ píkŋɛ ŋɡɔ pɔ́ɔpɛ́mɑ́ pɛkŋɛ nzʉʉ Kɛlístɔ ɡẅɛɛ nɛsɑ́Ꞌ tʉʉ ŋ́ɡɛ mɛnu sʉ́Ꞌnɛ, nɛlɔk ńcẅɛ́lɛ́ pʉɔ pi kwɑꞋ nu tʉ́ʉnɛ nǔu pɔ́p, kɔɔ pɔ́p pɔ́ pʉɔ kɛ pɛ́ ńdúꞋnɛ wɔ́p.

¹⁵ Pʉɔ-Kɛlístɔ tsʉʉ pi pɛk pɛpɔ́p pɔ́nɛ, sɛ́ cɛꞋlɛ wú. CɛꞋlɛ pʉɔ-Kɛlístɔ pi pɔ́p kɔŋnɛ wûu, mbíꞌŋɡɔ pɛkŋɛ pɛpɔ́p tɛmtɛ ńzɑ́p tʉ́m nǔu Yɛ́su Kɛlístɔ. Ŋɡɔ mbɔ́tnɛ-Sɛ́ pɔ́ nɛ́ pʉʉ pɛtsʉʉ.