Jɑ̂ŋ 6 - Kɑɑ FíYɛ́su zẅík nɔɔ-lɑ́Ꞌ 1 Mɔ mɛnu lɛɛ, Yɛ́su túu yɛcɔ́ mɑ́mɑ́ pɔ̂lfúꞋ-ŋki ni ɛ́ Ŋɡɑlilɛɛ, pɛ́ pɛn ɛ́fúŋ ŋɡɔ mɑ́mɑ́-pɔ̂lfúꞋ-Tibɛ́liyɑ́dɛ ŋ́ɡʉ nɛ́ yɛcɔ́ njʉ́n. 2 Nɔɔ-lɑ́Ꞌ pɔ́ ńcʉ́ɔ nzʉʉ yɛ́ tɛꞋ, mbíꞋŋɡɔ pʉɔ kɑ pɔ́ ńjʉ́ɔ mɛnu mɑ̌ɑmɑɑnɛ mi ɑ kɑ pɔ́ ŋ́ɡɛ nǔu ɡɑŋɡɔɔ. 3 Yɛ́su ŋ́kɔ́Ꞌ ndǔ nɛcɔ́ nɛŋkɔ́Ꞌ, pɔ́p ɡɑŋku pɛ́ nɑ́ŋ sɛ́. 4 Ɛ́ ɡɔ́ ḿbɔ́, ŋkɑ́ yi pɑyúdɑ ɡʉ ńjʉ́ ndínɑ wɔp ẅí pɛ́ fúŋnɛ ŋɡɔ Pɑ́skɑ (Mbɔ pɛ́ jʉ́ɔ nǔu mɛkɛm mɛmbɑ́ nǔu mɛŋkɑŋ ntsɔ̌pɛ́tɑ́t) pɔ́ ŋ́kuꞋ. 5 Yɛ́su nɑ́ŋ tɛ ḿbʉꞋ tú yɛ́ ńjʉ́ɔ mɑ́mɑ́ nɔɔ-lɑ́Ꞌ pɔ́ ńtɔ́ nɛ́ nɛjɔ́ŋ yɛ́, ɑ cú mbɔ̌ Filîp ŋɡɔ: «Pɛkŋɛ ɡʉ ŋ́ɡʉ ɡɔ́ ńzúu mbɛlɛ̂ɛt lɑ ńdɔk ńzẅík wɔ́p?» 6 A kɑ pɔ́ ńcú pɔ́Ꞌɔ, ńdɔk ŋ́kwɑꞋlɛ wɛ́ kwɑꞋnɛ́nɛ. KwɑꞋ jʉ́ Yɛ́su pɔ́ ńjí yúu mi ɑ ɡʉ ḿbɛn ŋ́ɡɛ. 7 Filîp pʉ̈ɔt ŋɡɔ: «Pɛ́ lɑɑ ńzúu mbɛlɛ̂ɛt pɔ yɛ́ mɛndɛ́níɛ ŋkʉ yɛ́pɑ́, ŋu wɔp kwɛ́t mbɔ ɛ́ ŋ́kúu nǔu lʉ́m yɛ́?» 8 Wɛcɔ́ ŋɡɑŋku-Yɛ́su pɔ́ zúꞋu, lík yɛ́ pɔ́ ŋɡɔ Ndɛlɛ́yɑ, ɑ pɔ́ mɔ́ɔmɑ́ pɛ́ Símɔ̂ŋ Pyɛ̂. A cú mbɔ̌ Yɛ́su ŋɡɔ: 9 «Wɛcɔ́ mɔ́ɔ mbɛ́ɛnɛ zɑꞋnɛ, ŋ́ɡẅɛɛ mbɛlɛ̂ɛt ntɑ́Ꞌ yɛtɑɑ, ŋ́ɡɛ mɛshú mbɑŋ yɛ́pɑ́, yîyɑ́ yúu kɛ́ ŋ́kuꞋ kʉ̈ɔ́ nǔu ndɛn lɑ́Ꞌ yɔ?» 10 Yɛ́su cú ŋɡɔ: «Pʉʉ ɡɛ lɑ́Ꞌ nɑ́ŋtɛ sɛ́.» Nɛɡíi m̄bɔ́ zúꞋu. Pʉɔ nɑ́ŋtɛ sɛ́, ḿbɔ́ mbɛ́ɛnɛ yúu ntsɑ́Ꞌ yɛ́tɑɑ. 11 Yɛ́su pɛ́ɛ mbɛlɛ̂ɛt, ŋ́ɡɑ́ pɑꞋlɑ́ mbɔ̌ Sɛ́, ŋ́ɡɑp mbɔ̌ lɑ́Ꞌ, ḿbɛn ŋ́ɡɛ pɔ pɔ́Ꞌɔ nǔu mɛshú, mbɑ wɔ̌ lɑ́ kwɛ́t yúu pɑ́Ꞌ ɑ kɔŋnɛ. 12 Pʉɔ tsʉʉ kwɛ́t yúu tɛ ńzwɛ́t, Yɛ́su cú mbɔ̌ ɡɑŋku pɛ́ ŋɡɔ: «Pʉʉ lɑk mɛkɛm mɛ́ mi ɛ́ vuꞋnɛ tɛ yúu pɔɔ pɛ́.» 13 Pɔ́p lɑk mɛkɛm mɛ́ mi ɛ́ vuꞋnɛ nǔu mbɛlɛ̂ɛt yi pʉɔ kwɛ́tnɛ ntɑ́Ꞌ yɛ́tɑ́ɑ lɑ́, ɛ́ lúu tsɛt pɛtúŋ ntsɔ̌ppɑ́ nɛ́ nɛɡɛ́m. 14 Lɑ́Ꞌ jʉ́ɔ nu mɑ̌ɑmɑɑnɛ yi Yɛ́su ɡɛnɛ, ńcú ŋɡɔ: «Ŋu wɔ kwɑꞋ ŋɡɛ́mndʉ̈ɔ́Ꞌ-Sɛ́ ẅi pɛ́ kɑ pɔ́ ńzẅíꞋlɛ ŋɡɔ ɑ tɔ́ ndǔmbí.» 15 Yɛ́su jʉ́ɔ shʉ́ yi pɔ́p sɛ́ ńdɔɔ nɛɡẅɛɛ wɛ́ ńdɔk wɛ́ ŋ́ɡɛ fɔɔ, ḿbɛn ńnɑ́ wɔ́p ŋ́ɡʉ nɛ́ ndǔ nɛŋkɔ́Ꞌ zɛ́nɛjʉ́. Yɛ́su sɛ́ ńnɛn ndǔ ŋki 16 Ɛ́ ɡɛ ḿbɔ́ ntsuŋkẅɛ́Ꞌ, ɡɑŋku-Yɛ́su cúŋ ŋ́ɡʉ nɛ́ mbʉʉ mɑ́mɑ́ nɛtʉŋ-ŋki-Ŋɡɑlilɛɛ. 17 Pɔ́p kúu tsɛt yɛcɔ́ mɑ́mɑ́ kɑnúꞋ. Ḿbɔ́ ŋ́ɡʉ nɛ́ Kɑpɛɛnɑwûm nǔu yɛcɔ́ njʉ́n. Mbɔ túꞋ sʉ́ʉ mɔ́, lɑ́ Yɛ́su pɛ́t pɔ kɛ́ kẅɛ́ɛtɛ wɔ́p. 18 Yɛcɔ́ mɑ́mɑ́ fɛfʉ̈ɔt pɔ́ ńtsʉ́Ꞌnɛ tɛꞋ, ŋki pɔ́ ḿbʉʉnɛ. 19 Pɔ́p lɔk kɑnúꞋ ńnɛn yúu pɛkílumítɑ pɛ́tɑɑ kɛ pɛ́nɛ́túkú ɔɔ, ńjʉ́ɔ Yɛ́su pɔ́ ńnɛn ndǔ ŋki ńtɔ́, pɔ́p pɔ́k. 20 Lɑ́ Yɛ́su cú mbɔ̌ pɔ́p ŋɡɔ: «kɔɔ pʉʉ pɔ́k, ɑ pɔ́ mɔ.» 21 Pɔ́p pɔ́ ńdɔɔ nɛɡɛ ɑ kúu tsɛt kɑnúꞋ, ŋ́ɡɔ́ ńjʉ́ɔ, mbɔ pɛ́ kúu mɔ mbʉʉ-ŋki. Yɛ́su yúujʉ́ yi ɛ́ ɡɑ́nɛ luk 22 Njí ɡɛ ŋ́kiɛ, lɑ́Ꞌ yi pɛ́ lɑ́Ꞌnɛ ńnɑ́ nǔu yɛcɔ́ njʉ́n-ŋki kẅíitɛ ŋɡɔ kɑnúꞋ lɑ́Ꞌ ḿbɔ́ sɛ́ ndɑꞋ wɛ́mɔ́Ꞌ, ɡɑŋku-Yɛ́su pɛn ŋ́ɡɔ ńdɔk ŋ́ɡʉ, pɔ́p pɛ́ Yɛ́su pɔɔnɛ pɔ́. Pɔ́p ɡʉ pɔ zɛ́nɛ pɔ́p. 23 Mɛcɔ́ mɛkɑnúꞋ pɛn ɛ́fú Tibɛ́liyɑ́dɛ, ńtɔ́ zʉꞋ yí Yɛ́su kɑ tʉ́ʉnɛ zúꞋu, ŋ́ɡɑ́ pɑꞋlɑ́ mbɔ̌ Sɛ́ nǔu mbɛlɛ̂ɛt, ŋ́ɡɑptɛ pɔ́p kwɛ́t lɑ́. 24 Ɛ́ ɡɔ́ ḿbɔ́, mbɔ lɑ́Ꞌ yîyɑ́ jʉ́ɔ ŋɡɔ Yɛ́su kɑ́ pɛ́t zúꞋu pɔ́, ɡɑŋku pɛ́ pɛn mbɔɔ pɛ́t yɔ́p zúꞋu pɔ́, pɔ́p ɡɔ́ɔ ŋ́kɛ́ ŋ́kúu tsɛt mɛkɑnúꞋ ɛ̂mɑ́, ńdɔk wɛ Kɑpɛɛnɑwûm nɛpɔ́ ńdɔɔ Yɛ́su. 25 Ŋ́ɡʉ tɛ ŋ́kúu nǔu yɛcɔ́ njʉ́n, ńjʉ́ɔ wɛ́, ńcú mbɔ̌ wɛ́ ŋɡɔ: «Cícɑ, ɔ tɔ́ tɛ ŋ́kúu zɑꞋnɛ ŋkɑ́ kʉ̈ɔ́.» 26 Yɛ́su pʉ̈ɔt mbɔ̌ pɔ́p ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, pʉʉ kɑ pɔ́ sii ńdɔɔ wɑ́ɑ pɔ mbíꞋŋɡɔ pʉʉ kɑ jʉ́ɔ mɛnu mɑ̌ɑmɑɑnɛ mi ŋ kɑ ɡɛnɛ, ɛ́ nyɛt mɛtʉʉ-Sɛ́ pɔ́, pʉʉ lɔɔ wɑ́ɑ ntɛ́ pɔ pɑ́Ꞌ pʉʉ kɑ kwɛ́tnɛ mbɛlɛ̂ɛt tɛ ńzwɛ́t lɑ́. 27 Kɔɔ pʉʉ sɑ́Ꞌ tʉʉ nǔu yúupɛjʉ́ pi ɛ́ kɛ́ lɑ́ɑtɛ, pʉʉ sɑ́Ꞌ tʉʉ pɔ nǔu yúupɛjʉ́ pi ŋu jʉ́, ɛ́ ɡɑ́ luk kɛ́mɛ. Mɔ́ɔ-Ŋu ɡʉnɛ ŋ́ɡɑ́ yîyɑ́ yúupɛjʉ́ mbɔ̌ pʉʉ, mbíꞋŋɡɔ Tɑ̌ɑ Sɛ́ kɑ cʉɔꞌ lii yɛ́ nǔu wɛ́.» 28 Pɔ́p cú mbɔ̌ wɛ́ ŋɡɔ: «Pɛk ɡʉ ŋ́ɡɛ ŋɡɔ́ku lɑ ŋ́ɡɛ yúu mi Sɛ́ sɛ́ ŋ́kɔŋ?» 29 Yɛ́su pʉ̈ɔt mbɔ̌ pɔ́p ŋɡɔ: «Yúu mi Sɛ́ sɛ́ ŋ́kɔŋ ŋɡɔ pʉʉ ɡɛ, ɛ́ nɛzɑ́p tʉ́m nǔu mɔ ẅí Sɛ́ kɑ túunɛ.» 30 Pɔ́p pɑꞋ ŋɡɔ: «Nu mɑ̌ɑmɑɑnɛ yi ɔ ɡʉ ŋ́ɡɛ pʉk jʉ́ɔ fú nǔu ńzɑ́p tʉ́m nǔu ɡu ɛ́ kʉ̈ɔ́? Yúu mi ɔ ɡʉ ŋ́ɡɛ ɛ́ ku? 31 Pɛmɑ́ŋɡɑpnjẅɛt pɛk kɑ kwɛ́t yúu mi pɛ́ fúŋnɛ ŋɡɔ mɑ̂ɑnɛ, kɔ̂ŋtɛt. Ɛ́ lɔk ḿbuutɛ nǔu pɑ́Ꞌ ŋwɑꞋnɛ-ndɛn kɑɑ sɛ́ ńcú ŋɡɔ: “A kɑ ɡɑ́ wɔ́p nɛ́ yúupɛjʉ́ pi ɛ́ fúnɛ tʉ́nɛpú.”» 32 Yɛ́su pʉ̈ɔt mbɔ̌ pɔ́p ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, Mɔ̌sɛ̂ɛ ŋkɑɑ ɡɑ́ yúujʉ́ pi ɛ́ fúnɛ tʉ́nɛ́pú mbɔ̌ pʉʉ pɔ́. Tɑ̌ɑ mɔ sɛ́nɛ́ ŋ́ɡɑ́ kwɑꞋ yúujʉ́ pi ɛ́ fúnɛ tʉ́nɛ́pú mbɔ̌ pʉʉ.» 33 «MbíꞋŋɡɔ yúujʉ́ pi ɛ́ fúnɛ mbɔ̌ Sɛ́, ɑ ŋu ẅí ɑ fúnɛ tʉ́nɛ́pú ńcúŋ, ŋ́ɡɛ pʉɔmɛsɔŋ ndǔmbí ɡẅɛɛ kwɑꞋ luk.» 34 Lɑ́Ꞌ ɡɔ́ɔ ŋ́kɛ́ ńcú mbɔ̌ wɛ́ ŋɡɔ: «Ndɛ, nɑ́ŋ ŋ́ɡɑ́ yîyɑ́ yúujʉ́ mbɔ̌ pɛk ŋkɑ́ tsʉʉ.» 35 Yɛ́su pʉ̈ɔt mbɔ̌ pɔ́p ŋɡɔ: «Yúujʉ́ pi ɛ́ ɡɛnɛ ŋu pɔ́ ɡú, mɔ. Ŋu lɑɑ ńtɔ́ ńtsɛ́t wɑ́ɑ, mbɔ njí kɛ́ lɑ́Ꞌ ḿbɛn ńzɑ́ŋ wɛ́ pɔ́. Ŋu lɑɑ ńzɑ́p tʉ́m yɛ́ nǔu mɔ, mbɔ ɡɑ́k yɛ́ kɛ́ lɑ́Ꞌ ḿbɛn ɛ́shí pɔ́. 36 Lɑ́, ŋ kɑ sẅíi wʉ́ʉ, pʉʉ kɑ jʉ́ɔ wɑ́ɑ, ŋ́kɛ́ mbɔɔ zɑ́p tʉ́m nǔu mɔ pɔ́.» 37 Mbɑ wɔ̌ lɑ́ ẅi Tɑ̌ɑ mɔ ɡɑ́nɛ mbɔ̌ mɔ, ɑ ɡʉ ńtɔ́ ńtsɛ́t wɑ́ɑ. M bɛn ŋ́kɛ́ mbɔɔ lɑ́Ꞌ yɛcɔ́ lɛ́Ꞌ ńcẅɛɛtɛ ŋu ẅí ɑ tɔ́nɛ ńtsɛ́t wɑ́ɑ, ŋ́ɡɑ́ píi pɔ́. 38 MbíꞋŋɡɔ mɔ ŋkɑɑ fú tʉ́nɛ́pú ńtɔ́ pɔ nɛɡɛ yɑ́ɑ yúu mi ŋ kɔŋnɛ pɔ́, ŋ kɑ tɔ́ nɛɡɛ yúu mi ŋu ẅí ɑ kɑ túunɛ wɑ́ɑ sɛ́ ŋ́kɔŋ. 39 Yúu mi ŋu ẅí ɑ kɑ túunɛ wɑ́ɑ sɛ́ ŋ́kɔŋ, ɛ́ pɔ́ pɔ ŋɡɔ kɔɔ mɔ nɑ́ tɛ wɛcɔ́ tɑ́Ꞌ nǔu pʉɔ pí ɑ kɑ ɡɑ́nɛ mbɔ̌ mɔ pɛ́. Ndẅiknzʉʉ lɛ́Ꞌlɑ́Ꞌ ńdɑ́Ꞌ ḿbɔ́, n zẅíimɛ wɔ́p nǔu nɛvú. 40 Yúu mi Tɑ̌ɑ mɔ sɛ́ ŋ́kɔŋ ɛ́ pʉ̈ɔ́lɑɑ: «Ŋu lɑɑ ńjʉ́ɔ mɔ́ɔ nɛ, ńzɑ́p tʉ́m yɛ́ nǔu wɛ́, mbɔ ŋɡɑŋ ŋ́ɡẅɛɛ luk kɛ́mɛ. N dɑ́Ꞌ ndẅiknzʉʉ lɛ́Ꞌlɑ́Ꞌ ńzẅíimɛ wɛ́ nǔu nɛvú.» 41 Pɑyúdɑ ɡɔ́ɔ ŋ́kɛ́ ńzɛ nɛcútɛ nzʉʉ Yɛ́su, mbíꞋŋɡɔ ɑ cú ŋɡɔ ɑ yúujʉ́ yi ɛ́ fúnɛ tʉ́nɛ́pú. 42 Pɔ́p pɛn ḿbɔ́ ńcú ŋɡɔ ŋu wɑ́ kɑ́ pɔ́ Yɛ́su mɔ́ɔ-Yɔsɛ̂p pɔ́ ɔɔ! Pɛkŋɛ kɑ́ pɔ́ ńjí tɑ́t wɛ pɔ́p mɑ́ wɛ pɔ́ ɔɔ! Ɛ́ pɛn ŋ́ɡɛ ŋɡɔ́ku lɑ ɑ sẅíi wɛkŋɛ ŋkɔ̂ɔnɛ ŋɡɔ ɑ kɑ fú tʉ́nɛ́pú ńcúŋ? 43 Yɛ́su tsɔ́Ꞌ mbɔ̌ pɔ́p ŋɡɔ: «Kɔɔ pʉʉ pɛn ńcútɛ! 44 Wɛcɔ́ ŋu lɑɑ ḿbɔ́ ɑ pɔɔ tɔ́ ńtsɛ́t wɑ́ɑ kɛ́ pɔ́ yi Tɑ̌ɑ mɔ ẅí ɑ kɑ túunɛ wɑ́ɑ zɛɛnɛ ɛ́shuŋ wɛ́ pɔ́. Mɔ, m bɛn ńdɑ́Ꞌ nǔu ndẅiknzʉʉ lɛ́Ꞌlɑ́Ꞌ, ńzẅíimɛ wɛ́ nǔu nɛvú.» 45 Pɛ́ kɑ ŋwɑꞋnɛ tsɛt ŋwɑꞋnɛ-pɛŋɡɛ́mndʉ̈ɔ́Ꞌ-Sɛ́ ŋɡɔ: «Sɛ́ nɛ́ tú mbʉʉ yɛ́ ɡʉ ńdɑ́Ꞌ ńzíꞋ nu yɛ́ mbɔ̌ pʉɔ tsʉʉ. Ŋu lɑɑ ńzúꞋ nu yi ɛ́ fúnɛ mbɔ̌ Tɑ̌ɑ, ḿbɛ́m yúu mi ɑ zíꞋnɛ pʉɔ, mbɔ ẅîwɑ́ ŋu ɡʉ tɔ́ ńtsɛ́t wɑ́ɑ. 46 Sɑ̌ɑ ŋu ŋkɑɑ mɔ Tɑ̌ɑ jʉ́ɔ, tɛ ńdíꞋ ndɑꞋ mɔ ẅí ŋ kɑ fúnɛ nɛjɔ́ŋ yɛ́. Mɔ kɑ jʉ́ɔnɛ Tɑ̌ɑ Sɛ́. 47 Lɑ́ ɛ sẅíi wʉ́ʉ, kwɑꞋ nɛ́nẅín, ŋu lɑɑ ńzɑ́p tʉ́m nǔu mɔ, mbɔ ŋɡɑŋ ɡʉ ŋ́ɡẅɛɛ luk kɛ́mɛ. 48 Yúujʉ́ yi ɛ́ ɡɛnɛ pɛ́ pɔ́ ɡú ɑ pɔ́ mɔ. 49 Pɛmɑ́ŋɡɑpnjẅɛt pʉ́ʉ kɑ kwɛ́t yúujʉ́ yi pɛ́ fúŋnɛ ŋɡɔ mɑ̂ɑnɛ kɔ̂ŋtɛt, ḿbɛn ḿpfú pfúnɛ. 50 Lɑ́, yúujʉ́ pi ɛ́ fúnɛ tʉ́nɛ́pú ńcúŋ, ɛ́ yi ŋu lɑɑ ńjʉ́, ɑ pɔɔ pɛn ḿpfú pɔ́. 51 KwɑꞋ mɔ, mɔ yúujʉ́ yi ɛ́ kuꞋnɛ nɛɡɛ pɛ́ pɔ́ ɡú, ɛ́ yi ɛ́ fúnɛ tʉ́nɛ́pú ńcúŋ. Ŋu lɑɑ ńjʉ́ yîyɑ́ yúujʉ́, mbɔ ɑ ɡʉ ńdɑ́Ꞌ ḿbɔ́ pɔ ɡú mɛŋɡuꞋ mɛŋɡuꞋ. Yúujʉ́ yi ŋ ɡʉ ŋ́ɡɑ́, ɛ́ mbɑp-mbʉʉ yɑɑ. Ŋ ɡʉ ŋ́ɡɑ́ lɑ́ ɛ́ lɛɛ pɔ́Ꞌɔ, pʉɔmɛsɔŋ ndǔmbí pɔ́ ɡú.» 52 Ńcú pɔ́Ꞌɔ, pɑsɑ́Ꞌlɑ́Ꞌ-Pɑyúdɑ pɔ́ ńzɔŋ tsɛtsɛt pɔ́p tɛꞋ ńcú ŋɡɔ: «Ŋu wɑ́ ɡʉ ŋ́ɡɛ ŋɡɔ́ku lɑ́ ŋ́ɡɑ́ mbɑp-mbʉʉ yɛ pɛkŋɛ kwɛ́t?» 53 Yɛ́su tsɔ́Ꞌ mbɔ̌ pɔ́p ŋɡɔ, lɑ́ ɛ sẅíi wʉ́ʉ, kwɑꞋ nɛ́nẅín, pʉʉ lɑɑ mbɔɔ kwɛ́t mbɑp-mbʉʉ-Mɔ́ɔ-Ŋu, ńnɔ́ mɛci mɛ́ pɔ́, mbɔ pʉʉ kɛ́ ɡɛ ŋ́ɡẅɛɛ kwɑꞋ luk pɔ́. 54 Ŋu lɑɑ ŋ́kwɛ́t mbɑp-mbʉʉ yɑɑ, ńnɔ́ mɛci mɑ́ɑ, ɑ ɡẅɛɛ luk kɛ́mɛ. Ŋ ɡɛ ńzẅíimɛ ŋɡɑŋ nǔu nɛvú ndẅiknzʉʉ lɛ́Ꞌ. 55 MbíꞋŋɡɔ mbɑp-mbʉʉ yɑɑ yúujʉ́ sʉ́Ꞌnɛ, mɛci mɑ́ɑ pɔ́ kwɑꞋ yúu nɔ́nɛ. 56 Ŋu lɑɑ kwɛ́t mbɑp-mbʉʉ yɑɑ, ńnɔ́ mɛci mɑ́ɑ, mbɔ ɑ tɛmtɛ nǔu mɔ, n tɛmtɛ yɑ́ɑ ɡúu nǔu wɛ́. 57 Tɑ̌ɑ mɔ kɑ túunɛ wɑ́ɑ, ɑ nɛsɑ́Ꞌ-luk. N dɔk pɔ pɔ́Ꞌɔ, ḿbɔ́ ɡú, ɛ́ ndʉ́ŋndʉŋ pɑ́Ꞌ ŋu lɑɑ ŋ́ɡɛ ŋ́kwɛ́t mbɑp-mbʉʉ yɑɑ, mbɔ ɑ ɡʉ ńdɔk pɔ pɔ́Ꞌɔ, ḿbɔ́ ɡú. 58 Yɔ pɑꞋ yúujʉ́ pi ɛ́ fúnɛ tʉ́nɛ́pú pɔ́nɛ, ɛ́ kɑ́ pɔ́ pɑ́Ꞌ yi pɛtɑ́t pʉ́ʉ kɑ kwɛ́tnɛ ŋ́kɛ́ ḿbɛn ḿpfú pfúnɛ pɔ́. Ŋu lɑɑ ńjʉ́ pɔ yúujʉ́ yi ɛ́ fúnɛ tʉ́nɛ́pú, mbɔ ŋɡɑŋ ɡʉ ńdɑ́Ꞌ ḿbɔ́ pɔ ɡú. 59 Yɛ́su kɑ pɔ́ ńcú mɔnɛ mɛnu, ŋkɑ́ yi ɑ kɑ pɔ́ ńzíꞋ pʉɔ nɛ́ nu-Sɛ́ tsɛt ndɑ́-cúꞋlɛ-pɑyúdɑ Kɑpɛɛnɑwûm. Nɛtík ku nǔu nu pɛ́mtʉ́m 60 Gɑŋku-Yɛ́su zúꞋ sẅiŋɛ yɛ́, nɛzɑ́ɑ pʉɔ zɛ nɛcú ŋɡɔ: «Sẅiŋɛ yɑ́ tɛn tɛ ńtsɑ! Ɛ́ lɑɑ ḿbɔ́ wɔ̌ zẅíꞋlɛ?» 61 Yɛ́su jí ŋɡɔ ɡɑŋku pɛ́ sɛ́ ńcútɛ ntɛ́ nu yí ɑ cúnɛ, ḿbíkŋɛ wɔ́p ŋɡɔ sẅiŋɛ yɑ́ɑ sɛ́ ḿbɑ́klɛ wʉ́ʉ pɑ́klɛ́nɛ kɛ? 62 Lɑ́ pʉʉ lɑɑ ŋ́ɡɔ ńjʉ́ɔ Mɔ́ɔ-Ŋu pɛn ŋ́kɔ́Ꞌ ŋ́ɡʉ nɛ́ zʉꞋ yí ɑ kɑ zɛɛnɛ ḿbɔ́ zúꞋu, pʉʉ ɡɛ pɔ ŋɡɔ́ku? 63 Zẅikŋɛ-Sɛ́ ɡɛnɛ pɛ́ tsuŋ ḿbɔ́ ɡú. Ŋumɛsɔŋ nɛ́ tú yɛ́ kɑ́ kuꞋ nɛɡɛ yɛcɔ́ yúu pɔ́. Sẅiŋɛ yí ŋ ɡɑ́nɛ mbɔ̌ pʉʉ fú mbɔ̌ Zẅikŋɛ-Sɛ́, yîyɑ́ sẅiŋɛ ɡɛnɛ lɑ pɛ́ pɔ́ ɡú. 64 Tɛ mbɑ pɔ́Ꞌɔ, pɛcɔ́ pʉɔ tsɛtsɛt pʉʉ kɑ́ pɔ́ ḿbɛ́m pɔ́. Ɛ́ ɡɔ́ ḿbɔ́, mbɔ Yɛ́su kɑ lɑ́Ꞌ mɔ́ ńjí pʉɔ pinɛ pɔ́p kɑ́ pɔ́ ńzɑ́p tʉ́m nǔu wɛ́ pɔ́, ḿbɛn ńjí ŋu ẅí ɑ ɡʉ ŋ́ɡɛ ɛ́fɛn wɛ́. 65 Yɛ́su pɛn ńcú ŋɡɔ, ɛ́ yúu mi ɛ́ ḿbɔ́ ŋ́ɡɛ lɑ n cú mbɔ̌ pʉʉ ŋɡɔ, ɛ́ lɑɑ ḿbɔ́ ŋu pɔɔ tɔ́ ŋ́kẅɛ́ɛtɛ wɑ́ɑ kɛ́ pɔ́ yi Tɑ̌ɑ mɔ ɡɛnɛ ŋɡɔ ŋɡɑŋ tɔ́ pɔ́. 66 Ɛ́ fú ŋkɑ́ ɛ̂yɑ́, nɛzɑ́ɑ ɡɑŋku-Yɛ́su kʉ̈ɔ́, pɔ́p pɛpɔ́p pɔɔ pɛn ńnɛn pɔ́. 67 Yɛ́su ɡɛ ńcú mbɔ̌ pʉɔ ntsɔ̌ppɑ́ nɛ́ nɛɡɛ́m ŋɡɔ: «Pʉʉ kɑ́ pɔ́ ŋ́kɔŋ yʉ́ʉ nɛɡʉ pɔ́ kɛ?» 68 Símɔ Pyɛ̂ pʉ̈ɔt mbɔ̌ wɛ́ ŋɡɔ: «Tsɑpʉɔ, pɛk ɡʉ ŋ́ɡʉ ŋ́kẅɛ́ɛtɛ pɔ wɔ̌? Ɔ ɡẅɛɛ sẅiŋɛ yí ɛ́ ɡɑ́nɛ luk kɛ́mɛ. 69 Pɛk kɑ lɑ́Ꞌmɔ́ ḿbɛ́m, ḿbɛn ḿbɔ́ ńjí ŋɡɔ ɔ kwɑꞋ ŋu ẅí ɑ fúnɛ nɛjɔ́ŋ Sɛ́.» 70 Yɛ́su pʉ̈ɔt mbɔ̌ pɔ́p ŋɡɔ: «Pʉʉ wɔ ntsɔ̌ppɑ́ nɛ́ nɛɡɛ́m, mɔ ŋkɑɑ nɛ tsɔ́Ꞌ wʉ́ʉ pɔ́ ɔɔ? Wɛcɔ́ ŋu kɛ́ ḿbɔ́ tsɛtsɛt pʉʉ, ḿbɔ́ ŋu-Sɑ́ttɑ.» 71 Yɛ́su cú pɔ́Ꞌɔ, ńdɑ́Ꞌ Jẅidɑ, mɔ́ɔ-Símɔ Iskɑlyɔt. Jʉ́ kɑ pɔ́nɛ ŋ́ɡʉ ŋ́ɡɛ ɛ́fɛn Yɛ́su, tɛ mbɑ pɑ́Ꞌ ɑ m̄bɔ́nɛ tsɛtsɛt pʉɔ ntsɔ̌ppɑ́ nɛ́ nɛɡɛ́m. |
CABTAL, 2017