Jɑ̂k 5 - Kɑɑ Fí

Gɑŋyúu lɑk tú yɔ́p

¹ Pʉʉ zẅíꞋlɛ ńzúꞋ! Pʉʉ ɡɑŋyúu, pʉʉ lɑɑ tɛ ŋɡi yʉʉ kɔ́Ꞌ tʉ́ ntɛ́ mɑ́mɑ́ ŋɡʉ̈ɔ́Ꞌ yi ɛ́ sɛ́ ńtɔ́ nǔu pʉʉ.

² Yúu yʉ́ʉ yi ɛ́ cɔ́k ŋkɑ́p lʉ̈ɔ́, shʉ̈ɔ́Ꞌŋɡɔ́Ꞌ jʉ́ mɛndẅí mʉ́ʉ.

³ Gwɛ́tkɑ́ɑ ɡẅɛɛ tʉ́n-ɡɔ̂l yʉ́ʉ mbɑ ŋkɑ́p yʉʉ. Pɛ́ ɡʉ ŋ́ɡɛ ɛ́fú pɔ nǔu ńjʉ́ɔ ŋɡɔ pʉʉ vu ntsɑŋ, mbɑp-mbʉʉ yʉʉ mɛ pɑ́Ꞌ ŋkɑ́ yi pɛ́ tɔɔ wʉ́ʉ múk lɑ́. Pʉʉ kɑ cúꞋlɛ́nɛ yúu mi ɛ́ cɔ́k ŋkɑ́p nǔu mɔ mɛlɛ́Ꞌlɑ́Ꞌ mi ɛ́ ndẅiknzʉʉ.

⁴ GɑŋfɑꞋ kɑ lɑk yúu pʉ́ʉ ŋkɑꞋ, pʉʉ jʉ́ ŋkɑ́p yɔp. Pʉʉ zúꞋ pɑ́Ꞌ pɔ́p lɑɑnɛ! Ŋɡi-pʉɔ pí pɔ́p lɑknɛ yúu pʉ́ʉ ŋ́ɡɑ́ ndɑ́ kɔ́Ꞌ tɛ ŋ́kúu mɛtúutɛ́-Sɛ́, jʉ́ Tsɑpʉɔ ẅí ɑ sɑ́Ꞌnɛ pɑlʉ̈ɔ́Ꞌntsɔ tsʉʉ pí pɔ́p tʉ́.

⁵ Pʉʉ kɑ nɑ́ŋ ndǔ tsɛ́tsɑ́Ꞌ ŋ́ɡẅɛɛ mɛyúu, ńtsɑ́ɑ kʉ̈ɔ́ ɔɔ ŋ́ɡẅɛɛ, ŋ́kwɛ́t yúu ŋ́ɡúꞋ pɑ́Ꞌ mɛyúumɛku mí pɔ́p zẅíꞋlɛ́nɛ lɛ́Ꞌ yi pɛ́ ɡʉ ŋ́ɡwɑt wɔ́p lɑ́.

⁶ Pʉʉ kɑ zɑ́p mɛnu tú-pɑkɛfɑɑnɛ, ńjẅítɛ wɔ́p, pɔ́p kɛ́ mbɔɔ nyɛt yɛcɔ́ tʉʉ mbi pʉʉ pɔ́.

Nɛsʉk mbɑ nɛcɛꞋlɛ Sɛ́

⁷ Pɔ́ɔpɛ́mɑ́ pɑ́ɑ, pɔ́Ꞌɔ lɑ́ pʉʉ lɔk kɔk mbʉʉ ńzẅíꞋlɛ tɛ ŋ́kúu ŋkɑ́ yi Tsɑpʉɔ ɡʉ ńtɔ́. Pʉʉ jʉ́ɔ pɑ́Ꞌ nzʉ́Ꞌnɑŋ kɑ lɑ́Ꞌ ńdɔk pɔ kɔkmbʉʉ ńzẅíꞋlɛ ŋɡɔ tsɛ́tsɑ́Ꞌ zɛ́m yúu sʉ́Ꞌnɛ, ɛ́ zɛ́m, ɑ kɑ́p ntú, ńzẅíꞋlɛ tɛ ńtɑ́ɑ ḿbɛn ŋ́kɑ́p nzʉʉ.

⁸ Mbɑ pʉʉ yʉ́ʉ, pʉʉ lɔk kɔkmbʉʉ ńzẅíꞋlɛ, kɔɔ pʉʉ citɛ mbʉʉ mbíꞋŋɡɔ ɛ́ tsʉ́Ꞌ pɔ mɔ́zʉꞋ, Tsɑpʉɔ tɔ́.

⁹ Pɔ́ɔpɛ́mɑ́ pɑ́ɑ, pʉʉ pɑ́ɑ nɛɡẅɛɛ sẅíitɛ tsɛtsɛt pʉʉ, ńjí ŋɡɔ Sɛ́ kɛ́ ɡɛ ńcú ŋɡɔ pʉʉ vu ntsɑŋ pɔ́, nzɑ́Ꞌmɛntsɑŋ tɔ́ tɛ ńtʉ́ʉ ntsundɑ́.

¹⁰ Pɔ́ɔpɛ́mɑ́ pɑ́ɑ, pʉʉ pɛ́ɛ fʉꞋ nǔu pɛŋɡɛ́mndʉ̈ɔ́Ꞌ-Sɛ́ pi pɔ́p ḿbɔ́ ńcú nu nǔu lík-Tsɑpʉɔ. Nǔu nɛsʉk ŋɡʉ̈ɔ́Ꞌ, mbɑ nǔu nɛlɔk kɔkmbʉʉ ńzẅíꞋlɛ yúu.

¹¹ Pʉʉ jʉ́ɔ pɑ́Ꞌ pɛkŋɛ fúŋnɛ pʉɔ pí pɔ́p kɑ sʉknɛ ŋɡɔ pɛpɔ́ttú. Pʉʉ kɑ zúꞋ pɑ́Ꞌ pɛ́ kɑ lɛ́Ꞌlɛ́nɛ ntɛ́ yi Jɔp kɑ lɔknɛ ɛ́sʉk pɔ́Ꞌɔ. Pʉʉ pɛn ńjí yúu mi ɛ́ kɑ tsʉ́Ꞌ nɛmɛkŋɛ Tsɑpʉɔ ɡɛ nǔu wɛ́, mbíꞋŋɡɔ Tsɑpʉɔ ɡẅɛɛ pɔŋtʉ́m tɛꞋ, ńtsɑ́ɑ mɛjʉ́ŋ pɔ pɔ́Ꞌɔ.

¹² Pɔ́ɔpɛ́mɑ́ pɑ́ɑ, ɛ́ lɑɑ ḿbɔ́ pɔ nu kʉ̈ɔ́ ɔɔ, kɔɔ pʉʉ cú nu tɛ ŋ́kɑɑ. Kɔɔ pʉʉ lɔk nɛpú ŋ́kɑɑ nu, kɔɔ pʉʉ lɔk tsɛ́tsɑ́Ꞌ ŋ́kɑɑ. Ɛ́ pɔŋ ŋɡɔ wʉʉ ɔ́ɔŋ pɔ́ pɔ ɔ́ɔŋ, wʉʉ ŋɡɑ́ŋ pɔ́ pɔ ŋɡɑ́ŋ. Ɛ́ lɛɛ pɔ́Ꞌɔ, lɑ Sɛ́ pɔɔ ɡɛ ŋɡɔ pʉʉ vu ntsɑŋ pɔ́.

¹³ Ŋu wʉʉ lɑɑ ḿbɔ́ ńjʉ́ɔ ŋɡʉ̈ɔ́Ꞌ, ɑ púꞋ mbɔ́ mbɔ̌ Sɛ́. Ŋu lɑɑ ḿbɔ́ ńtsɑ́ɑtɛ ɑ zɔp mɛzɔpŋki ńdɔk ŋ́ɡúꞋlɛ Sɛ́.

¹⁴ Ŋu wʉʉ lɑɑ ḿbɔ́ ŋ́ɡɔɔ, ɑ fúŋ pɑcẅɛ́ɛmbi tsɛt cúꞋlɛ-pʉɔ-Kɛlístɔ, pɔ́p tɔ́ ńdɔk mɛɡwɛ́t ńzɔ́Ꞌ wɛ́ nǔu lík-Tsɑpʉɔ, ńcɛꞋlɛ Sɛ́.

¹⁵ CɛꞋlɛ yi pɛ́ ɡɔ́ ŋ́ɡɛ, ńzɑ́p tʉ́m nǔu Sɛ́, ɛ́ ɡɛ ɑ fíitɛ. Tsɑpʉɔ pʉꞋ wɛ́, ḿbɔ́ yi ɑ kɑ zɛɛ ŋ́ɡɛ pɔ nu kɛpɔŋ, mbɔ Sɛ́ ɡʉ ńdikŋɛ mɛnu kɛpɔŋ mɛ́ ŋ́ɡɑ́ mbɔ̌ wɛ́.

¹⁶ Pɔ́Ꞌɔ lɑ́, ŋu pɛ́m mɛfɑɑnɛ mɛ́ mbɔ̌ mɔ́ɔmɑ́ wɛ, mɔ́ɔmɑ́ wɛ pɛ́m mɛ́ mbɔ̌ wɛ́. Ŋu wʉʉ púꞋ mbɔ́ mbɔ̌ Sɛ́ nǔu tú-mɔ́ɔmɑ́ wɛ. Ɛ́ lɛɛ pɔ́Ꞌɔ, pʉʉ fíitɛ. CɛꞋlɛ-ŋu ẅí ɑ ndʉ́ŋndʉŋ mbi Sɛ́, nɛn tɛꞋ.

¹⁷ Ɛlîi kɑ pɔ́ pɔ ŋumɛsɔŋ pɑ́Ꞌ pɛkŋɛ, ɑ kɑ cɛꞋlɛ Sɛ́ nɛ́ tʉ́m yɛ́ tsʉʉ ŋɡɔ kɔɔ mbʉŋ lɔ́, Sɛ́ ɡɛ mbʉŋ pɔɔ lɔ́ tɛ ɛ́ pɔ́ ŋɡuꞋ yɛ́tɑ́t nɛ́ pɛsɑŋ pɛ́nɛ́ntúkú.

¹⁸ A pɛn ḿbúꞋ mbɔ́ mbɔ̌ Sɛ́, mbʉŋ lɔ́, tsɛ́tsɑ́Ꞌ ɡɑ́ yúupɛ́jʉ́.

¹⁹ Pɔ́ɔpɛ́mɑ́ pɑ́ɑ, ŋu wʉʉ lɑɑ ɛ́fɑɑnɛ sɛ̂ndúŋ, ńnɑ́ nu yi ɛ́ nɛ́nẅín, pɛ́ pɛn ńtík wɛ́, tɛ ɑ pɛn nzʉʉ,

²⁰ jínɛ ŋɡɔ ŋu ẅí ɑ tíknɛ wɛ́ tɛ ɑ fú nǔu sɛ̂ndúŋ kɛpɔŋ cẅɛt, ɡʉ ŋ́ɡɛ ɑ luk. Ɛ́ lɛɛ pɔ́Ꞌɔ, Sɛ́ likŋɛ mɛnu kɛpɔŋ mɛ tɛ ɛ́ zɑ́ɑ zɑ́ɑnɛ.