Jɑ̂k 3 - Kɑɑ Fí

Ḿbɔ́ ntsu pʉ́ʉpɛ nɛnɑ́ŋ

¹ Pɔ́ɔpɛ́mɑ́ pɑ́ɑ, kɔɔ pʉʉ pɛtsʉʉ tsɑ́ɑ nɛpɔ́ pɑzíꞋ pʉɔ nɛ́ yúu, pʉʉ sɛ́ ńjí sʉ́Ꞌnɛ ŋɡɔ, pɛk pí pɛk zíꞋnɛ pʉɔ nɛ́ yúu, ntɛ́ yi pɛ́ ɡʉ ńdɑ́Ꞌ ńdɔk ŋ́ŋɑk wɛ́k, ɛ́ ɡʉ ńdɑ́Ꞌ ńtɛn ńdɛɛ yɛ́ pɛcɔ́ pʉɔ.

² Pɛkŋɛ fɑɑnɛ mɛnu ntɛ́ ntɛ́ pɔ kɛ́ vuꞋ ŋu. Ŋu lɑɑ ḿbɔ́ ŋu ẅí ɑ kɑ́ tɔ́ nɛcú nu ɛ́fɑɑnɛ pɔ́, mbɔ ɑ ŋu kɛ́ lɔ́Ꞌ, ŋ́kuꞋ nɛɡẅɛɛtɛ mbʉʉ yɛ tsʉʉ.

³ Pɛkŋɛ líŋɛ pɛlʉ́ɔ lɑ ńjʉ́ɔ, pɛkŋɛ níꞋ kwɑ́ŋ ntsu pɔ́p nɛlɔk ŋ́ɡɛ ŋɡɔ pɔ́p zúꞋ ntsu wɛkŋɛ. Pɛkŋɛ ɡɔ́ɔ ŋ́kɛ́ ńdɔk wɔ́p ŋ́ɡʉ zʉꞋ yi pɛkŋɛ sɛ́ ŋ́kɔŋ.

⁴ Pʉʉ líŋɛ mbɑ lɑ́ɑŋki lɑ ńjʉ́ɔ, ɛ́ ɡúꞋ pɔ ŋɡɔ ku lɑ́, fɛfʉ̈ɔt yí ɛ́ tsʉ́ʉnɛ wɛ́ ńtɛn pɔ ŋɡɔ ku lɑ́, mbɔ yúu lɔk shuŋ yi ŋu ẅí ɑ sɛ́ ɛ́shuŋ lɔknɛ ɛ́shuŋ wɛ́ ŋ́ɡɑ́ nǔu zʉꞋ yi ɑ sɛ́ ŋ́kɔŋ pɔ́ pɔ mɔ́ɔ mɔ́yúu.

⁵ Ɛ́ pɛn ḿbɔ́ pɔ ndʉ́ŋndʉŋ pɑ́Ꞌ lʉ́m-ŋu, ɛ́ nǔu mɛkɛm-mbʉʉ mɛ́ ḿbɔ́ pɔ mɔ́ɔ mɔ́yúu, lɑ́ ŋ́ŋɑ́Ꞌlɛ tɛꞋ. Pʉʉ pɛn ḿbɔ́ ńjí pɑ́Ꞌ mɔ́sɛsɑꞋ-múk lɑɑ ḿbɔ́ ɛ́ tɔɔ mɑ́mɑ́ mbɛ́n.

⁶ Lʉ́m pɛn ḿbɔ́ yɛ́ pɔ pɑ́Ꞌ múk, ḿbɔ́ zʉꞋ yí mɛnu kɛpɔŋ fúnɛ zúꞋu. Lʉ́m-ŋu nǔu mɛkɛm-mbʉʉ-ŋu, ḿbɔ́ yi kɛm ɛ́ níꞋnɛ ntsɛ́llɛ́ nǔu mbɑp-mbʉʉ tsʉʉ. Ɛ́ ɡʉ nɛkɛlɛmúk, ḿbɛ́ɛ múk, ńtɔ́ ńdɔk ńtɔɔ nɛnɑ́ŋ-ŋu pɔ tsʉʉ.

⁷ Ŋumɛsɔŋ kuꞋ nɛkúkŋɛ mɛyúumɛku-tɛt mɛntɛ́ mɛntɛ́, ŋ́kuꞋ nɛkúkŋɛ pɛshʉ́ŋ, ŋ́kuꞋ nɛkúkŋɛ mɛyúumɛku mi pɔ́p shuŋ nɛpɛm nɔ́p pɔ sɛ́, nɛkúkŋɛ mɛshú.

⁸ Lɑ́ ŋ́ɡʉ nǔu lʉ́m, ḿbɔ́ wɛcɔ́ ŋu kɑ́ kuꞋ nɛkúkŋɛ pɔ́. Ɛ́ tɑ́k zʉꞋ kɛ́ jẅiitɛ. Ɛ́ ɡẅɛɛ mɛ́tɛ́ kɛpɔŋ mi ɛ́ kúu nǔu ŋu ńjẅí wɛ́ jẅínɛ.

⁹ Pɛkŋɛ lɔk pɔ lʉ́m ńdɔk ŋ́ɡúꞋlɛ Tsɑpʉɔ Tɑ̌ɑ wɛkŋɛ, ḿbɛn ńdɔk pɔ yɛ́tɛ́ ńníꞋ ndɔɔ tú-pʉɔmɛsɔŋ pínɛ Sɛ́ kɑ pɔ́ɔnɛ ŋ́ɡɛ pɔ́p fí wɛ́.

¹⁰ Mbɔ́tnɛ mbɑ ndɔɔ cẅɛt pɔ tsɛt tɑ́Ꞌ ntsu wɛ́mɔ́Ꞌ. Pɔ́ɔpɛ́mɑ́ pɑ́ɑ, ɛ́ kɑ́ pɔ́ ḿbɔŋ ŋɡɔ ɛ́ pɔ́ pɔ́Ꞌɔ pɔ́.

¹¹ Ɛ́ lɑɑ ḿbɔ́ yɛcɔ́ sɑ́Ꞌ ŋki pɔɔ ḿbɔ́ fú nǔu zʉꞋ ŋ́ɡɑ́ ŋki nɔ́nɛ, ḿbɛn ɛ́fú pɔ zúꞋu ŋ́ɡɑ́ ŋki ẅí ɛ́ sɛ́ ńdẅi pɔ́.

¹² Pɔ́ɔpɛ́mɑ́ pɑ́ɑ tɛ ɛ́ lɑɑ ḿbɔ́ pɛ́ kɑ́p zɔ̌ɔ nǔu tʉ́-mbɛ́lɛ́? Ŋ́kɛ́ ŋ́kɑ́p nɛpi nǔu tʉ́-zɔ̌ɔ? Ɛ́ ndʉ́ŋndʉŋ pɑ́Ꞌ sɑ́Ꞌ ŋki ẅí ɛ́ sɛ́ ŋ́ɡɑ́ ŋki ẅí ɛ́ ɡẅɛɛnɛ ŋɡwɑ́ŋ, mbɔ ɛ́ pɔɔ ɡɑ́ ŋki nɔ́nɛ pɔ́.

Jínu yí ɛ́ fúnɛ tʉ́nɛ́pú

¹³ Ŋu lɑɑ ḿbɔ́ tsɛtsɛt pʉʉ, ḿbɔ́ ŋ́kwɑŋɛ ŋɡɔ ɑ ɡẅɛɛ jínu, ḿbɛn ŋ́ɡẅɛɛ kwɑŋɛ nu, ɑ lɔk tswɛ́ sʉ́Ꞌnɛ yɛ́ ńnyɛt, ḿbɛn ńdɔk mɛfɑꞋ mi ɛ́ nyɛtnɛ ŋɡɔ ɑ ŋu ḿbɔ́tnɛ pɔ́tnɛ́nɛ ḿbɔ́ njínu, ńnyɛt.

¹⁴ Lɑ́ ŋ́kɛ́ ḿbɔ́ yi pʉʉ lɑɑ ŋ́ɡẅɛɛ kɛ́ ɡʉ̈ɔꞋ ẅi ɛ́ kɑ ɡɑ́Ꞌ mɔ́ mbɑ nyɛt mbʉʉ tsɛt tʉ́m pʉʉ, kɔɔ pʉʉ pɛn ŋ́ŋɑ́Ꞌlɛ ŋɡɔ pʉʉ pɑjínu, kɔɔ pʉʉ lɔk cɔtnu, ḿbík nu nɛ́nẅín.

¹⁵ Yîyɑ́ ntɛ́ jínu kɑ́ pɔ́ ɛ́fú tʉ́nɛ́pú pɔ́. Ɛ́ pɔ́ pɔ yɛ́ ndǔ tsɛ́tsɑ́Ꞌ yɔ, ḿbɔ́ pɔ yɛ́ pʉɔmɛsɔŋ, ɛ́fú mbɔ̌ mɛzẅikŋɛ kɛpɔŋ.

¹⁶ Nyɛt mbʉʉ mbɑ kɛ́ɡʉ̈ɔꞋ piitɛ tɛ ḿbɔ́ nǔu zʉꞋ, tɑ́kŋɛ mbɑ mɛfɑꞋ kɛpɔŋ mɛntɛ́ mɛntɛ́ pɔ́ zúꞋu.

¹⁷ Lɑ́ ŋu ẅí ɑ ɡẅɛɛnɛ jínu yi ɛ́ fúnɛ tʉ́nɛ́pú, ɑ zɛɛ ḿbiitɛ ḿbɔ́ ŋu ẅí yɛcɔ́ lɔ́Ꞌ kɑ́ pɔ́ nǔu ŋɡɛnɛ mɛnu mɛ́ pɔ́, ḿbɑ́ɑtɛ ńnɛn pɔ nɛ́ mbɔ́tnɛ, ḿbɑ́ɑtɛ ḿbɔ́ ŋu ḿbɔ́tnɛ pɔ́tnɛ́nɛ, ŋ́ɡɛ nu ɛ́ kuꞋ kuꞋnɛ, ńjí nɛtsɑ́ɑ mɛjʉ́ŋ tɛꞋ, ɛ́fɑꞋ mɛfɑꞋ sʉ́Ꞌnɛ pɔ pɔ́Ꞌɔ. A kɑ́ ɡɛ tɔŋ pɔ́, ŋ́kɛ́ mbɔɔ ŋkɔŋmík pɔ́.

¹⁸ Pʉɔ pí pɔ́p lɔk pɔ mbɔ́tnɛ ńnɑ́ŋ tsɛtsɛt pʉɔmɛsɔŋ, pɔ́p sɛ́ ḿbi yúu nɛ́ mbɔ́tnɛ. Mɛntɑ́ɑ mi pɔ́p kɑ́pnɛ ɛ́ pɔ́ nɛnɑ́ŋ ndʉ́ŋndʉŋ pɑ́Ꞌ Sɛ́ sɛ́ ŋ́kɔŋ.