Ɛ́fɛ̂zɛ 6 - Kɑɑ Fí

Mbɔ́ŋkʉ̈ɔ́ pɔ́p pɛtɑ́t

¹ Ŋ́ɡʉ nǔu pʉʉ mbɔ́ŋkʉ̈ɔ́, mbɑ wɔ̌ lɑ́ zúꞋ ntsu tɑ́t wɛ pɔ́p mɑ́ wɛ nǔu pɑ́Ꞌ Tsɑpʉɔ sɛ́ ŋ́kɔŋ. Ɛ́ yúu mi ɛ́ tʉ́ʉnɛ ndʉ́ŋndʉŋ, pʉʉ ɡẅɛɛ nɛɡɛ pɔ́Ꞌɔ.

² Nɛcɔ́ nɛpʉ́ʉ Sɛ́ ńcú ŋɡɔ: «Gɛ mɛkuꞋ-tɑ́t ɡu pɔ́p mɑ́ ɡu. Ɛ́ nduŋmbi nɛpʉ́ʉ ni Sɛ́ kɑ kɑꞋnɛ tsɔ́ꞋfɑꞋ nǔu.

³ Ɛ́ lɔk ḿbɔ́ ŋɡɔ ɔ lɑɑ ŋ́ɡɛ pɔ́Ꞌɔ, mbɔ ɔ ɡʉ ḿbɔ́ pɔ́ttú, ŋ́kẅiꞋ ńnɑ́ŋ ndǔ tsɛ́tsɑ́Ꞌ».

⁴ Pʉʉ pɛtɑ́t-mbɔ́ŋkʉ̈ɔ́, kɔɔ pʉʉ ɡɛ lɔ́ŋ-mbɔ́ŋkʉ̈ɔ́ pʉ́ʉ zɑ́ŋ. Pʉʉ tsʉ́Ꞌ nɛtsɑ́p wɔ́p, ńtík wɔ́p, ńzíꞋ wɔ́p nɛ́ yúu mi Tsɑpʉɔ sɛ́ ŋ́kɔŋ.

Pɛkwɑɑ pɔ́p pɛtɑ́t-puꞋ

⁵ Ŋ́ɡʉ nǔu pʉʉ pɛkwɑɑ, pʉʉ zúꞋ ntsu-pʉɔ pi pɔ́p ɡẅɛɛnɛ wʉ́ʉ, ḿbɔ́ ŋ́ɡɑ́ mɛkuꞋ mɔ́p, ŋ́kɔk mbʉʉ yʉʉ ŋ́ɡɑ́ sɛ́ mbi pɔ́p, ŋ́ɡẅɛɛ tʉ́m sʉ́Ꞌnɛ nzʉʉ pɔ́p, ndʉ́ŋndʉŋ pɑ́Ꞌ pʉʉ zúꞋnɛ ntsu-Kɛlístɔ lɑ́.

⁶ Pʉʉ pɑ́ɑ nɛɡɛ pɔ́Ꞌɔ, pɔ ndɑꞋ ŋkɑ́ yi pɔ́p tʉ́ʉnɛ nzʉʉ pʉʉ. Pɑ́Ꞌ ŋkɑ́ yi pʉʉ ɡɛ pɔ yúu mi ɛ́ ɡʉ ḿbɔŋ pʉɔmɛsɔŋ lɑ́. Pʉʉ fɑꞋ pɔ pɑ́Ꞌ pɛkwɑɑ-Kɛlístɔ pi pɔ́p sɛ́ ŋ́ɡɛ yúu mi Sɛ́ sɛ́ ŋ́kɔŋ nɛ́ ŋɡɔŋ tʉ́m yɔ́p tsʉʉ.

⁷ Pʉʉ fɑꞋ fɑꞋ yɔ́p nɛ́ tʉ́m sʉ́Ꞌnɛ, pɔ pɑ́Ꞌ pʉʉ ɛ́fɑꞋ mbɔ̌ Tsɑpʉɔ tɛ pʉʉ kɑ́ pɔ́ ɛ́fɑꞋ pɔ mbɔ̌ pʉɔmɛsɔŋ pɔ́.

⁸ Pʉʉ kẅíitɛ ŋɡɔ, ŋu lɑɑ ḿbɔ́ ŋkwɑɑ, kɛ mbɔɔ ŋkwɑɑ pɔ́ ɔɔ, mbɔ Tsɑpʉɔ ɡʉ ńdɑ́Ꞌ tsʉ́Ꞌ nɛɡɑ́ tsɔ́ꞋfɑꞋ mbɑ wɔ̌ lɑ́, nǔu pɔ pɑ́Ꞌ ŋɡɑŋ kɑ lɔknɛ ɛ́fɑꞋ sʉ́Ꞌnɛ pɔ́Ꞌɔ.

⁹ Pʉʉ pɛtɑ́t-puꞋ pʉʉ ɡẅɛɛ yʉ́ʉ pɛkwɑɑ pʉʉ nɛ́ tʉ́m sʉ́Ꞌnɛ. Kɔɔ pʉʉ vukŋɛ wɔ́p vukŋɛnɛ. Pʉʉ jí ŋɡɔ pʉʉ pɛ́ pɔ́p tɛmtɛ ŋ́ɡẅɛɛ pɔ tɑ́Ꞌ ŋu ẅí ɑ sɑ́Ꞌnɛ wʉ́ʉ pɛpɔ́p ɑ pɔ́ tʉ́nɛ́pú. A kɛ́ ḿbɔɔ ŋ́ɡẅɛɛ tɔŋ tsɛtsɛt pʉɔmɛsɔŋ pɔ́.

Yúu-ntsɔ yi Sɛ́ ɡɑ́nɛ

¹⁰ Ndẅiknzʉʉ nu yi mɔ ɛ́sẅíi wʉ́ʉ, ɛ́ pɔ́ pɔ ŋɡɔ: Pɑ́Ꞌ pʉʉ lɑtnɛ mbʉʉ nǔu Tsɑpʉɔ lɑ́, pʉʉ cẅɛ́ɛ mɛtʉʉ mbɔ̌ wɛ́. A ŋɡɑŋ mɛtʉʉ tsʉʉ. Pʉʉ cẅɛ́ɛ mɛtʉʉ mbɔ̌ wɛ́.

¹¹ Pʉʉ tíi yúu-ntsɔ yi Sɛ́ ɡɑ́nɛ mbɔ̌ pʉʉ pɔ tsʉʉ, lɑ́ ńdɔk ńjí ŋɡɔ Sɑ́ttɑ ɡʉ ńdɔk wɛ́tɛ́ shʉ́ ḿmɑꞋ wʉ́ʉ ɔɔ pʉʉ pɔɔ nuklɛ,

¹² mbíꞋŋɡɔ pɛkŋɛ kɑ́ pɔ́ ŋ́ɡʉ ńdʉ̈ɔ́Ꞌ pʉɔmɛsɔŋ pɔ́. Pɛkŋɛ ɡʉ pɔ nɛlʉ̈ɔ́Ꞌ mɛzẅikŋɛ kɛpɔŋ mi ɛ́ tɛ tʉ́, ńdʉ̈ɔ́Ꞌ pɛtɑ́tndɑ́ pɔ́p, ḿbɛn ńdʉ̈ɔ́Ꞌ yúu mi ɛ́ tɛ tʉ́ ŋ́ɡẅɛɛ mɛtʉʉ, pɔ́p pʉɔ-ntɔ́Ꞌ-nzɛnzʉ́ʉ pi pɔ́p sɑ́Ꞌnɛ yɔ ndǔmbí.

¹³ Ɛ́ yúu mi ɛ́ ɡɛnɛ lɑ ɛ́ pɔ́ ḿbíkŋɛ ŋɡɔ, pʉʉ tíi yúu-ntsɔ-Sɛ́ pɔ tsʉʉ, lɑ ŋ́kuꞋ nɛpɔ́ yi lɛ́Ꞌlɑ́Ꞌ kɛpɔŋ ɡʉ ńtɔ́, pʉʉ mɑꞋ ntsɔ mɛshʉ́ mɛshʉ́ tɛ ńnɑꞋ cí, ŋ́kɛ́ ḿbɔɔ nuklɛ.

¹⁴ Pɔ́Ꞌɔ lɑ́, kɔɔ pʉʉ nuklɛ. Nu nɛ́nẅín pɔ́ kɔp yi pʉʉ lɔknɛ ńzʉ́ʉ lúꞋ yʉ́ʉ, yúu mi ɛ́ tʉ́ʉnɛ ndʉ́ŋndʉŋ pɔ́ ndẅí-ntsɔ yi pʉʉ ɡʉ ḿmɑꞋ nǔu pʉʉ.

¹⁵ Nɛnɑ́ŋ ńcẅi Ŋkʉʉ Sʉ́Ꞌnɛ-Kɛlístɔ ẅi ɛ́ nu-mbɔ́tnɛ, ɛ́ pɔ́ mʉ́ʉ mɛtɑp mi pʉʉ ɡʉ ńzẅík ku pʉʉ.

¹⁶ Wʉʉ kíꞋ-ntsɔ pɔ́ pɔ nɛzɑ́p tʉ́m nǔu Sɛ́ tɛ mbɑ pɑ́Ꞌ pʉʉ lɑɑ ńtʉ́ʉ pɔ nǔu wɛ́tɛ́ shʉ́-tsɔ lɑ́. Ẅîwɑ́ kíꞋ-ntsɔ cẅɛ́lɛ́ wʉ́ʉ nɛpík múk ẅi Ŋɡɑŋmbuu lyɛtnɛ nǔu mɛkɔŋ lɑ ńdɔk ḿmɑꞋ wʉ́ʉ.

¹⁷ Pʉʉ pɛ́m ŋɡɔ Sɛ́ sɛ́ ŋ́ɡɛ pʉʉ luk. Nɛpɛ́m pɔ́Ꞌɔ, ɛ́ nɛtíi cɔꞋ-ntsɔ ńtɔꞋ. Pʉʉ cẅɛ́ɛ níi-ntsɔ yi Zẅikŋɛ Lɛ́ɛnɛ́nɛ ɡɑ́nɛ mbɔ̌ pʉʉ. Yîyɑ́ níi-ntsɔ sẅiŋɛ-sɛ́.

¹⁸ Pʉʉ pɔ́ ŋkɑ́ tsʉʉ ḿbɔ́ ḿbúꞋ mbɔ́ mbɔ̌ Sɛ́, ḿbɔ́ ḿbúꞋ pɔ́Ꞌɔ nǔu mɛntɛ́ tsʉʉ, pɑ́Ꞌ Zẅikŋɛ ɡʉ ḿbɔ́ ńnyɛt wʉ́ʉ ŋɡɔ pʉʉ ɡɛ pɔ́Ꞌɔ. Kɔɔ pʉʉ ḿmɛꞋ jínu, pʉʉ púꞋ mbɔ́ mbɔ̌ Sɛ́ nǔu tú-pʉɔ-Sɛ́ pɛ́tsʉʉ.

¹⁹ Pʉʉ púꞋ mbɔ́ mbɔ̌ wɛ́ mbɑ nǔu yɑ́ɑ tú nɛpɔ́ yi ɑ ɡʉ ńníꞋ sẅiŋɛ ntsu mɔ, ŋɡɔ ɑ ɡɛ pɔ́Ꞌɔ, nɛpɔ́ yi n dɑɑ ŋíɛꞋ ntsu wɑ́ɑ ŋkɑ́ kʉ̈ɔ́ lɑ́, n cú nu kɛ́ pɔ́k, nɛpɔ́ yi pʉɔ ɡʉ ńjí nu yi Ŋkʉʉ Sʉ́Ꞌnɛ kɑ lɔknɛ ńtɔ́, mbɔ ɛ́ kɑ zɛɛ ḿbɔ́ yi lʉɔmɛ́nɛ.

²⁰ Mɔ mɑ́ntúu nɛcẅi ẅîwɑ́ Ŋkʉʉ, tɛ mbɑ pɑ́Ꞌ mɔ pɔ ndɑ́tsɑ́ŋ lɑɑ. Pʉʉ cɛꞋlɛ Sɛ́ ŋɡɔ ŋ ɡẅɛɛ sʉk nɛlɔk ńcú pɑ́Ꞌ ɛ́ sɛ́ ḿbíkŋɛ ŋɡɔ n cú.

CɛꞋlɛ

²¹ Tishîk ẅí ɑ mɔ́ɔmɑ́ wɛkŋɛ wɛ tʉʉndɛn, ḿbɔ́ ŋɡɑŋfɑꞋ-tsɑpʉɔ, tɛ ńjí yɛ́ pɔ ndɑꞋ yîyɑ́ fɑꞋ, ɑ ɡʉ ńtɔ́, ɛ́sẅíi wʉ́ʉ pɑ́Ꞌ mɔ zɑꞋnɛ ḿbɔ́, nɛpɔ́ yi pʉʉ ɡʉ ńjí yúu mi n tsʉ́Ꞌnɛ, mbɑ yúu mi ŋ ɡɛnɛ.

²² N zɛɛ ŋ́kɛ́ ńtúu wɛ́ mbɔ̌ pʉʉ pɔ ŋɡɔ ɑ ɛ́sẅíi wʉ́ʉ pɑ́Ꞌ pɛk pɔ́nɛ, mbɑ pɑ́Ꞌ ɑ ɡʉ ńníꞋ mɛtʉʉ mʉ́ʉ.

²³ Sɛ́ Tɑ́t, mbɑ Tsɑpʉɔ Yɛ́su Kɛlístɔ níꞋ mɔ́fíitɛ tsɛt tʉ́m pɔ́ɔpɛ́mɑ́ pi pɔ́p sɛ́ ŋ́ɡẅɛɛ ŋkɔŋɛ, ḿbɔ́ ńzɑ́p tʉ́m pɔ nǔu Sɛ́.

²⁴ Sɛ́ pɔ́ mbɔ̌ ŋu tsʉʉ ẅí ɑ kɔŋnɛ Tsɑpʉɔ wɛkŋɛ Yɛ́su Kɛlístɔ nɛ́ ntɛ́ ŋkɔŋɛ yi ɛ́ kɑ́ pɔ́ ŋ́ɡʉ ńdɑ́Ꞌ ḿmɛ pɔ́.