Ɛ́fɛ̂zɛ 4 - Kɑɑ Fí

Pʉɔ-Kɛlístɔ pɔ́ pɔ tɑ́Ꞌ nɔɔ

¹ Mɔ ẅí mɔ ndɑ́tsɑ́ŋ mbíꞋ nu-Tsɑpʉɔ Yɛ́su Kɛlístɔ, ŋ ɡʉ ɛ́fú nǔu mɛnu mi ɛ sẅíinɛ wʉ́ʉ, ḿbíkŋɛ ŋɡɔ pʉʉ ɡɔ́ ŋ́ɡɛ yʉ́ʉ mbɑ kʉ̈ɔ́ lɑ́, ŋ́kẅíitɛ ŋɡɔ Sɛ́ kɑ fúŋnɛ wʉ́ʉ ŋɡɔ pʉʉ pɔ́ pʉɔ pɛ́.

² Pʉʉ kɔk mbʉʉ yʉʉ ŋ́ɡɑ́ Sɛ́, ḿbɔ́ pʉɔ pɔ́tnɛ́nɛ, ŋ́ɡẅɛɛ kɔkmbʉʉ. Ńdɛɛ nǔu kɔŋɛ yi ɛ́ tsɛtsɛt pʉʉ, ḿmɛꞋ zɑ́ŋ lɔ́ŋ.

³ Pʉʉ sɑ́Ꞌ tʉʉ nɛ́ kɛ́ ŋ́ɡẅɛɛ pɔ tɑ́Ꞌ ntsu ẅí ɛ́ fúnɛ mbɔ̌ Zẅikŋɛ-Sɛ́, yɛ́tɛ́ sɛ́nɛ́ ŋ́ɡɔ́ ŋ́ɡɑ́ mbɔ́tnɛ mbɔ̌ pʉɔ, ŋ́ɡɑ́ wɔ́p nɛ́ tɑ́Ꞌ ntsu.

⁴ Mbɑp-mbʉʉ-Kɛlístɔ yɛmɔ́Ꞌ, Zẅikŋɛ lɛ́ɛnɛ́nɛ pɔ́ yɛ́mɔ́Ꞌ ndʉ́ŋndʉŋ pɑ́Ꞌ yúu mi Sɛ́ kɑ fúŋnɛ wʉ́ʉ, pʉʉ pɔ́ ńzẅíꞋlɛ ɛ́ pɔ́ pɔ yɛ́mɔ́Ꞌ.

⁵ Pɛkŋɛ pɛtsʉʉ ɡẅɛɛ pɔ tɑ́Ꞌ Tsɑpʉɔ wɛ́mɔ́Ꞌ, ńzɑ́p tʉ́m pɔ ndɑꞋ nǔu wɛ́ zɛ́nɛ jʉ́, mbɔ pɛkŋɛ pɛtsʉʉ kɑ tɛmtɛ ńcẅɛ́ɛ ŋki pɔ nǔu lík-tɑ́Ꞌ ŋu.

⁶ Sɛ́ pɔ́ yɛ́mɔ́Ꞌ, ɑ Tɑ́t pɛ pʉɔ tsʉʉ. A sɑ́Ꞌ pɔ pʉɔ tsʉʉ, ńdɔk pʉɔ tsʉʉ ɛ́fɑꞋ fɑꞋ yɛ́, ḿbɑ nǔu mbɑ wɔ̌ lɑ́.

⁷ Ɛ́ kɛ́ ŋ́ɡʉ nǔu mbɑ wɔ̌ lɑ́ tsɛtsɛt pɛkŋɛ, mbɔ Kɛlístɔ kɑ ɡɑ́ fuꞋ fɛ̌ɛ mbɑ wɔ̌ lɑ́ nǔu ntɛ́ yi jʉ́ Kɛlístɔ kɔŋnɛ.

⁸ Ɛ́ lɔk ḿbɔ́ pɑ́Ꞌ pɛ́ kɑ ŋwɑꞋnɛ́nɛ tsɛt ŋwɑꞋnɛ-Sɛ́ ŋɡɔ; A kɑ kɔ́Ꞌ nɛ́ tʉ́nɛ́pú, Ŋ́ɡɔ́ ŋ́kɔ́Ꞌ ńdɔk ɡɑŋtsɑ́ŋ-ntsɔ ŋ́ɡʉ, Ŋ́ɡɑ́ fuꞋ ntɛ́ nɛ́ ntɛ́ mbɔ̌ pʉɔmɛsɔŋ.

⁹ Pɔ́Ꞌɔ, pɛ́ cú ŋɡɔ ɑ kɑ kɔ́Ꞌ nɛ́ tʉ́nɛ́pú, ńdɔk ńcú ŋɡɔ kʉ̈ɔ́? Ńdɔk ńcú ŋɡɔ Kɛlístɔ kɑ zɛɛ ńcúŋ tɛ ŋ́kúu ndǔ tsɛ́tsɑ́Ꞌ zɑꞋnɛ.

¹⁰ Ŋu ẅí ɑ kɑ ńcúŋnɛ, ńtɔ́ ndǔ tsɛ́tsɑ́Ꞌ, ḿbɛn ńdɔk ḿbɔ́ pɔ ŋu ẅí ɑ kɑ kɔ́Ꞌnɛ ŋ́ɡʉ tɛ nɛ́ tʉ́nɛpú yi ɑ ɡʉ ḿbɔ́ nǔu yúu tsʉʉ.

¹¹ Jʉ́ kɑ ɡɑ́nɛ fuꞋ yɛ́ mbɑ wɔ̌ lɑ́ nǔu pʉɔ pɛ́, ńdɔk ŋ́ɡɑ́ fuꞋ fɛ̌ɛ yɛ́, ńdɔk pɛcɔ́ ŋ́ɡɛ ɡɑŋntúu, ńdɔk pɛcɔ́ ŋ́ɡɛ pʉɔ pi pɔ́p nɑ́ŋnɛ ńcẅi Ŋkʉʉ ẅí ɛ́ fúnɛ mbɔ̌ Sɛ́, ńdɔk pɛcɔ́ ŋ́ɡɛ pɑsɑ́Ꞌ Ŋkʉʉ Sʉ́Ꞌnɛ, ńdɔk pɛcɔ́ ŋ́ɡɛ pɑ cẅɛ́ɛ mbi, mbɑ pɑ́Ꞌ pɔ́p ɡʉ ḿbɔ́ ńzíꞋ pʉɔ nɛ́ nu-Sɛ́.

¹² A kɑ zɑ́pnɛ pîpɑ́ pʉɔ nɛpɔ́ yi pɔ́p ɡʉ cẅɛ́lɛ́ pʉɔ-Kɛlístɔ nɛfɑꞋ fɑꞋ-Sɛ́, cúꞋlɛ-pʉɔ-Kɛlístɔ yi ɛ́ mbɑp mbʉʉ yɛ́, kẅiꞋ ŋ́ɡʉ nɛ́ mbi.

¹³ Ɛ́ kẅiꞋ ŋ́ɡʉ nɛ́ mbi tɛ pɛkŋɛ tsʉ́Ꞌ ŋ́ɡẅɛɛ pɔ tɑ́Ꞌ ntsu ẅí ɛ́ fúnɛ nǔu pɑ́Ꞌ pɛkŋɛ zɑ́pnɛ tʉ́m yɛkŋɛ pɔ nǔu Yɛ́su mɔ́ɔ-Sɛ́, ḿbɛn ńjí wɛ́, ŋ́ɡúꞋ tɛ yɛcɔ́ yúu pɔɔ pɛn ńjɑ́k wɛkŋɛ pɔ́, pɑ́Ꞌ ɛ́ nǔu wɛ́ ḿbɔ́ pɔ́Ꞌɔ.

¹⁴ Ɛ́ lɛɛ pɔ́Ꞌɔ, pɛkŋɛ pɔɔ pɛn ḿbɔ́ pɛcʉcʉŋ mbɔ́ŋkʉ̈ɔ́ pi ɛ́ pɑ́Ꞌ kɑnúꞋ yi ŋki shuŋnɛ ńdɔk ŋ́ɡʉ zɑꞋnɛ, ŋ́ɡʉ zíꞋnɛ pɔ́. Pɛ́ pɔɔ pɛn ɛ́sẅíi wɛkŋɛ ŋɡɔ pɛkŋɛ pʉʉ pʉʉnɛ kɛ ŋɡɔ pɛkŋɛ cúŋ cúŋnɛ pɔ́, kɔɔ pɛkŋɛ zúꞋ mîmɑ́ mɛnu mi pɛ́ zíꞋnɛ pʉɔ ḿbɛ́m pɔ́. Ɛ́ fú pɔ́Ꞌɔ, pɛkŋɛ pɔɔ pɛn ḿbɔ́ pɑ́Ꞌ pɛcʉcʉŋ pi pɔ́p pɛ́mnɛ, pʉɔ kwɑŋɛ mɛnu ńdɔk ɛ́fúklɛ wɔ́p pɔ́p pɛ́m cɔtnu nu pɔ́.

¹⁵ Tɛ ńtsʉ́Ꞌ pɔ́Ꞌɔ, pɛkŋɛ kɔŋɛ mɛmbʉʉ mɛkŋɛ, ŋu sẅíi nu nɛ́nẅín mbɔ̌ mɔ́ɔmɑ́ wɛ, ŋ́ɡúꞋ nǔu mɛshʉ́ tsʉʉ, Kɛlístɔ ɡɛ pɛkŋɛ pɔ́ ńdɔk ndɑ̌ɑ ndɑɑ ŋ́kẅiꞋ ḿbɔ́ pɑ́Ꞌ jʉ́ ẅi ɑ tú nǔu mbɑp-mbʉʉ.

¹⁶ Jʉ́ ɡɛnɛ mɛzʉꞋ-mbʉʉ-cúꞋlɛ ńtɛmtɛ ḿbɔ́ tɑ́Ꞌ yúu. Mɛŋɑŋ-mbʉʉ tɛ ńzɑ́ɑ cẅɛ́lɛ́ nɛɡɛ mɛzʉꞋ-mbʉʉ tɛmtɛ, mbɑ yɛ́tɛ́ zʉꞋ-mbʉʉ lɑ́ pɛn ḿbɔ́ tɛ ḿbɔ́ ɛ́fɑꞋ yɛ́ fɑꞋ, mbɑp-mbʉʉ tsʉʉ tɛmtɛ ŋ́ɡúꞋ, ńtɛntɛ ńdɛɛ pɔ nǔu ŋkɔŋɛ yi ɛ́ tsɛtsɛt pɔ́p.

Ndwɛn nɛnɑ́ŋ pɔ́p nɛnɑ́ŋ fí

¹⁷ Ɛ́ yúu mi ɛ́ ɡɛnɛ, m bɔ́ ńcú yɔ nu tɛ tsuŋ ńcú mbɔ̌ pʉʉ nǔu lík-Tsɑpʉɔ ŋɡɔ: Kɔɔ pʉʉ pɛn ŋ́ɡɛ yʉ́ʉ pɔ pɑ́Ꞌ pʉɔ pi pɔ́p kɑ́ jí Sɛ́ pɔ́ lɑ́. Pɔ́p ɡɛ pɔ yúu mi kwɑŋɛ yɔ́p yi ɛ́ kɑ́ cẅɛ́lɛ́ sẅiŋɛ wɔ́p ŋɡɔ pɔ́p ɡɛ.

¹⁸ Mɛkwɑŋɛ mɔ́p pɔ́ pɔ mɛ́ tsɛt nzɛ́nzʉ́ʉ. Pɔ́p ɡʉ nǔu nɛnɑ́ŋ wɛ fí ẅi Sɛ́ sɛ́ ŋ́ɡɑ́, ḿbɔ́ pɔ pɛɡʉʉ, mbíꞋŋɡɔ pɔ́p kɑ́ jí sɛ̂ndúŋ-Sɛ́ pɔ́. Mbɔ tʉ́m yɔ́p kɑ sʉk mɔ́.

¹⁹ Pɔ́p kɑ tsʉ́Ꞌmɔ́ pɑkɛ́ kɔ́sʉ́ʉ, ḿmɛꞋ mbʉʉ yɔp, ḿbɔ́ nǔu nu-mpfuꞋ, ḿbɔ́ ŋ́kẅiꞋ ŋ́ɡɛ mɛnu kɛpɔŋ ntɛ́ nɛ́ ntɛ́ kɛ́ ɡẅɛɛ mbʉʉ yɔp.

²⁰ Lɑ́ ɛ́ kɛ́ ŋ́ɡʉ nǔu pʉʉ, mbɔ Kɛlístɔ ŋ́kɑɑ kɛ́ ńzíꞋ wʉ́ʉ nɛɡẅɛɛ yîyɑ́ ntɛ́ tsẅɛ́ pɔ́.

²¹ Ɛ́ lɑɑ ḿbɔ́ ŋɡɔ pʉʉ kɑ zúꞋ nu yɛ́, tɛ pɛ́ ɛ́sẅíi wʉ́ʉ nu nɛ́nẅín tsʉʉ yi ɛ́ sɛ́ ńdíŋɛ wɛ́,

²² mbɔ ɛ́ sɛ́ ḿbíkŋɛ ŋɡɔ pʉʉ cẅɛt nǔu ndwɛn mɑt ẅí pɛ́ kɑ lɔknɛ ḿbí wʉ́ʉ, ndʉ́ŋndʉŋ pɑ́Ꞌ ŋu ɛ́sɔt ndwɛn ndẅí nǔu wɛ́ ḿmɛꞋ lɑ́. Ẅîwɑ́ mɑt ɛ́ ẅí ɑ ḿbɔ́ ńdɛɛ nǔu mɛyúu kɛpɔŋ mi ɑ ḿbɔ́ ńtsɑ́ɑ, ŋ́kẅiꞋ ḿbʉ́k pʉ́knɛ. Mîmɑ́ mɛyúu kɛpɔŋ pɔ́ mi ɛ́ ɛ́fúklɛ́nɛ ŋu fúklɛ́nɛ.

²³ Ɛ́ pɛn ḿbɔ́ ḿbíkŋɛ nǔu ŋkɔ̂ɔnɛ ŋɡɔ pʉʉ pɛ́m Sɛ́ kúpmɛ mɑt wʉ́ʉ, ɑ tsʉ́Ꞌ wɛ fí, mbɑ kwɑŋɛ yʉ́ʉ tsʉ́Ꞌ wɛ fí.

²⁴ Ɛ́ pɛn ḿbɔ́ ḿbíkŋɛ ŋɡɔ pʉʉ kúu nǔu mɑt fí pɑ́Ꞌ ŋu tíi ndẅí fí ḿmɑꞋ nǔu wɛ́ lɑ́. Sɛ́ kɑ nɔŋnɛ ẅîwɑ́ mɑt. Ẅîwɑ́ mɑt ẅí pɛ́ jʉ́ɔnɛ nǔu ŋu ẅí ɑ sɛ́ ńnɛn nǔu pɑ́Ꞌ ɛ́ sɛ́ ḿbíkŋɛ, ḿbɔ́ ŋu ẅí ɑ kɑ nɑ́ yɛ́ luk tsʉʉ mbɔ̌ Sɛ́. Ẅîwɑ́ nɛnɛn ɛ́fú nǔu nu nɛ́nẅín.

²⁵ Ɛ́ lɑɑ ḿbɔ́ pɔ́Ꞌɔ, pʉʉ mɛꞋ cɔtnu. Ŋu cú pɔ nu nɛ́nẅín mbɔ̌ pɔ́ɔpɛ́mɑ́ pɛ́, mbíꞋŋɡɔ pɛkŋɛ tɛmtɛ ḿbɔ́ pɔ mɛkɛm-tɑ́Ꞌ mbʉʉ yɛ́mɔ́Ꞌ.

²⁶ Pʉʉ lɑɑ ńzɑ́ŋ lɔ́ŋ, pʉʉ pɑ́ɑ nɛɡɛ nu kɛpɔŋ, ḿbɑ́ɑ nɛm nɛɡɔ́ ḿbɔ́t, zɑ́ŋ lɔ́ŋ pɛ́t tʉ́m pʉʉ.

²⁷ Pʉʉ pɑ́ɑ nɛɡɑ́ shʉ́ lɔk ŋ́ɡẅɛɛ wʉ́ʉ mbɔ̌ Sɑ́ttɑ.

²⁸ Pʉɔ pi pɔ́p ɡẅɛɛnɛ mɑt nɛjɔ mɛꞋ tsɔ́ŋ, ńtsʉ́Ꞌ ńdɔk mbɔ́ mɔ́p, ɛ́fɑꞋ tɛ ŋ́kíɛ ziꞋnɛ ńjí ŋɡɔ pɔ́p ɡʉ ŋ́ɡẅɛɛ yúu tɛ ńdɔk yɛcɔ́ ńcẅɛ́lɛ́ pʉɔ pi pɔ́p sɛ́ ńjɑ́k yɔ́p,

²⁹ ḿbɑ́ɑ mbɑ tɑ́Ꞌ sẅiŋɛ kɛpɔŋ nɛcẅɛt ntsu pʉʉ. Pʉʉ cú pɔ nu yi ɛ́ ɡʉ cẅɛ́lɛ́ nǔu yîyɑ́ ŋkɑ́, ɛ́ pɔ́ pɔ sẅiŋɛ sʉ́Ꞌnɛ yi ɛ́ ɡʉ cẅɛ́lɛ́ pɛcɔ́ pʉɔ pɔ́p nɛkẅiꞋ ńzɑ́p tʉ́m nǔu Sɛ́. Pʉʉ cú pɔ nu yi ɛ́ ɡʉ cẅɛ́lɛ́ mbɑ wɔ̌ lɑ́ nǔu pʉɔ pi pɔ́p sɛ́ ńzẅíꞋlɛ.

³⁰ Kɔɔ pʉʉ ɡɛ Zẅikŋɛ Lɛ́ɛnɛ́nɛ yi Sɛ́ kɑ lɔknɛ ńcʉ̈ɔꞋ lii nǔu pʉʉ jʉ́ɔ ŋɡʉ̈ɔ́Ꞌ. A kɑ pɔ́ ńdɔk ńnyɛt ŋɡɔ pʉʉ pʉɔ pɛ́, ḿbɛn ńdɔk ńnyɛt ŋɡɔ lɛ́Ꞌ ɡʉ ńdɑ́Ꞌ ḿbɔ́, ɑ tɛmtɛ ńtsúꞋ wɛkŋɛ, pɛkŋɛ tɛmtɛ ńduk.

³¹ Pʉʉ cẅɛɛtɛ yúu mi ɛ́ tʉ́m pʉʉ ŋ́ɡɛ ntsu wʉ́ʉ pʉ́k, ńcẅɛɛtɛ zɑ́Ꞌ ŋkwɑɑ, ńcẅɛɛtɛ zɑ́ŋ lɔ́ŋ, kɔɔ pʉʉ pɛn ńtɑ́k mɛfɛꞋ, kɔɔ pʉʉ kɔ́ɔmɛ ntsu, pʉʉ mɛꞋ fʉꞋnɛ ntɛ́ nɛ́ ntɛ́,

³² ńdíŋɛ pɔ́ɔpɛ́mɑ́ pʉ́ʉ pɔ nɛ́ tʉ́m sʉ́Ꞌnɛ, ŋ́ɡẅɛɛ tsɑ́ɑ mɛjʉ́ŋ nzʉʉ pɛcɔ́ pʉɔ, pʉʉ likŋɛ mɛfɑɑnɛ tsɛtsɛt pʉʉ nɛ́ pʉʉ, ndʉ́ŋndʉŋ pɑ́Ꞌ Sɛ́ kɑ lɛɛnɛ nǔu Kɛlístɔ ńdikŋɛ mʉ́ʉ ŋ́ɡɑ́ mbɔ̌ pʉʉ.