Ɛ́fɛ̂zɛ 3 - Kɑɑ Fí

FɑꞋ-Pɔ̂l nǔu pʉɔ pi pɔ́p kɑ́ pɔ́ pɑíslɑyɛ̂l pɔ́

¹ Ɛ́ yúu mi ɛ́ ɡɛnɛ, mɔ Pɔ̂l ẅí mɔ ndɑ́tsɑ́ŋ mbíꞋŋɡɔ ɛ sɑ́Ꞌ nu-Yɛ́su Kɛlístɔ mbɔ̌ pʉʉ pi pʉʉ kɑ́ pɔ́ pɑyúdɑ pɔ́, mɔ sɛ́ ḿbúꞋ mbɔ́ mbɔ̌ Sɛ́ ŋkɑ́ tsʉʉ nǔu tú yʉ́ʉ.

² Ɛ́ ɡʉ ŋ́ɡɛ pɑ́Ꞌlɑ́, mbɔ pʉʉ kɑ zúꞋ ŋɡɔ kwɑꞋ Sɛ́ kɑ ɡɑ́nɛ yɔ fɑꞋ mbɔ̌ mɔ, nɛpɔ́ yi mɔ ŋ́ɡɛ yɔ fɑꞋ pʉʉ lúꞋnɛ. A kɑ pɔ́ ńdɔk ŋ́ɡɑ́ pɔ fuꞋ níinɛ yɑ́ɑ.

³ A kɑ kyɛꞌ yúu mi ɛ́ kɑ zɛɛ ńdʉ̈ɔmɛ mík-pʉɔ lʉɔmɛ́nɛ, ńnyɛt wɑ́ɑ, pɑ́Ꞌ n zɛɛ ŋ́ŋwɑꞋnɛ tsɛt yɔ ŋwɑꞋnɛ ɛ́sẅíi wʉ́ʉ lɑ́. Ŋ kɑ́ ŋwɑꞋnɛ ɛ́ sɑk pɔ́.

⁴ Pʉʉ ɡʉ fúŋ yɔ ŋwɑꞋnɛ ńzúꞋ ntɛ́ yi n dɔknɛ ńjí ntsɛm yi ɛ́ nǔu nu-Kɛlístɔ.

⁵ Sɛ́ ŋkɑɑ kyɛꞌ yɔ ntsɛm yɛ́ mbɔ̌ pʉɔmɛsɔŋ pɛ́ ŋkɑ́mbi pɔ́. Ɛ́ kɛ́ ḿbɔ́ ŋkɔ̂ɔnɛ, mbɔ ɑ ɡɛ Zẅikŋɛ yɛ́ sɑ́ɑnɛ sɑ́ɑnɛ́nɛ ŋ́kyɛ́Ꞌ nu ɛ̂yɑ́ mbɔ̌ pʉɔ pi ɑ kɑ niitɛ́nɛ wɔ́p ńdɔk ŋ́ɡɛ ɡɑŋntúu-Yɛ́su mbɑ pi ɑ kɑ lɔknɛ wɔ́p ŋ́ɡɛ pʉɔ pi pɔ́p ɡʉ ńnɑ́ŋ cẅi Ŋkʉʉ ẅí ɛ́ fúnɛ mbɔ̌ yɛ́.

⁶ Ntsɛm ɛ̂yɑ́ pʉ́ɔlɑɑ, ɛ́ fú nǔu Ŋkʉʉ Sʉ́Ꞌnɛ, pʉɔ pi pɔ́p kɑ́ pɔ́ pɑyúdɑ pɔ́, ɡẅɛɛ yɔ́p yúu nǔu yúu mi Sɛ́ kɑ kɑꞋnɛ mbɔ̌ pʉɔ pɛ́ pɑyúdɑ. Ḿbɔ́ mɛkɛm tɑ́Ꞌ mbɑp-mbʉʉ, ḿbɛn ŋ́ɡẅɛɛ yɔ́p nu nǔu yúu mi Sɛ́ kɑ fúnɛ nǔu Yɛ́su Kɛlístɔ ŋ́kɑꞋ mbɔ̌ pʉɔmɛsɔŋ.

⁷ Sɛ́ kɑ ɡɑ́ pɔ fuꞋ fɛ̌ɛ yɑ́ɑ lɑ ŋ́ɡɛ m bɔ́ ŋɡɑŋfɑꞋ nɛcẅi Ŋkʉʉ Sʉ́Ꞌnɛ. A kɑ lɔk pɔ mɛtʉʉ mɛ́ lɑ ŋ́ɡɛ pɔ́Ꞌɔ.

⁸ Tɛ mbɑ pɑ́Ꞌ mɔ tsɛtsɛt pʉɔ-Sɛ́ pɛtsʉʉ ḿbɔ́ pɔ ndẅiknzʉʉ, ɑ kɑ kɛ́ ḿbɛ́m pɛ́mnɛ ŋɡɔ mɔ ɡʉnɛ ńcẅi Ŋkʉʉ Sʉ́Ꞌnɛ mbɔ̌ pʉɔ pi pɔ́p kɑ́ pɔ́ pɑyúdɑ pɔ́, ńdɛꞋlɛ pii kɛ́mɛ yi ɛ́ nǔu nu-Kɛlístɔ.

⁹ Mbɑ pɑ́Ꞌ ŋ ɡʉ ńnyɛt mɑ́ntɑ́ɑ, pɛ́ jí pɑ́Ꞌ Sɛ́ ɡʉ ŋ́ɡɛ yúu mi ɑ kɑ lɑ́Ꞌnɛ ńzɑ́p, mbɔ ɛ́ kɑ zɛɛ ḿbɔ́ pɔ ntsɛm lɑ́, ɡʉ ḿbuutɛ pɔ́Ꞌɔ. Jʉ́ Sɛ́ ẅi ɑ kɑ niitɛ́nɛ mbɑ kʉ̈ɔ́ lɑ́, ɑ kɑ lʉɔ yîyɑ́ nu tɛ ŋ́kúu ŋkɔ̂ɔnɛ,

¹⁰ ńnyɛt pɔ́Ꞌɔ, ńjí ŋɡɔ pɛtɑ́tndɑ́-yúu mi ɛ́ tɛ tʉ́ ɡẅɛɛ tʉʉ, mbɑ mɛtʉʉ tsʉʉ mi ɛ́ tɛ tʉ́ ɡʉ ńdúꞋnɛ cúꞋlɛ-pʉɔ-Kɛlístɔ, ńjí nu nǔu jínu-Sɛ́ tɛ cɔ́kŋɛ.

¹¹ Sɛ́ kɑ ɡɛ pɑ́Ꞌɑ ɛ́ lɔk ḿbuutɛ nǔu yúu mi ɑ kɑ zɑ́pnɛ tɛ ḿbɛ́t pɔ kɛ́ puꞋ mbí, ŋɡɔ ɑ ɡʉ ńdɑ́Ꞌ ɛ́fú nǔu Tsɑpʉɔ wɛkŋɛ Yɛ́su Kɛlístɔ, ŋ́ɡɛ yîyɑ́ yúu.

¹² Pɑ́Ꞌ pɛkŋɛ lɑtnɛ mbʉʉ, ḿbɛn ḿbɔ́ ńzɑ́p tʉ́m nǔu jʉ́ Kɛlístɔ lɑ́, pɛkŋɛ ɡẅɛɛ pɑ́Ꞌ mbɔ pɛkŋɛ ɡʉ nɛjɔ́ŋ Sɛ́ tɛ yɛcɔ́ yúu pɔɔ wɛkŋɛ tɔꞋ, pɛkŋɛ kɛ́ ḿbɔɔ pɔ́k.

¹³ Pɑ́Ꞌ Sɛ́ kɑ ɡɛ pɔ́Ꞌɔ lɑ́, mɔ sɛ́ ḿbúꞋ mbɔ́ mbɔ̌ pʉʉ ŋɡɔ kɔɔ pʉʉ jʉ́ɔ pɑ́Ꞌ mɔ sɛ́ ńjʉ́ɔ ŋɡʉ̈ɔ́Ꞌ nǔu tú yʉ́ʉ, ŋ́kɑ́ɑ. Yîyɑ́ ŋɡʉ̈ɔ́Ꞌ sɛ́ ńcẅɛ́lɛ wʉ́ʉ, ḿbɔ́ mbɔ̌ pʉʉ ḿbɔ́ pɔ cɔꞋ-nɛfɔɔ.

Ŋkɔŋɛ yi ɛ́ fúnɛ mbɔ̌ Kɛlístɔ

¹⁴ Ɛ́ yúu mi ɛ́ ɡɛnɛ ŋ kẅíꞋlɛ mbi Sɛ́ Tɑ́t

¹⁵ ẅí mɛtsɛ́nndɑ́ mi ɛ́ tʉ́nɛ́pú mbɑ mi ɛ́ ndǔ tsɛ́tsɑ́Ꞌ tsʉʉ, ɛ́ ɡɔ́ ḿbɔ́ ɡú ńdúꞋnɛ pɔ wɛ́,

¹⁶ mɔ sɛ́ ńdɔ́ɔ mbɔ̌ wɛ́ ŋɡɔ ɑ lɔk pɑ́Ꞌ nɛɡúꞋ wɛ ɡú tɛꞋ lɑ́, ḿbɛ́m, ŋ́ɡɛ Zẅikŋɛ yɛ́ ɡɑ́ yʉ́ʉ tʉʉ nɛpɔ́ yi tʉ́m yʉ́ʉ ɡʉ tsuŋ tɛntɛ tɛꞋ.

¹⁷ Mɔ sɛ́ ḿbɛn ḿbɔ́ ḿbúꞋ mbɔ́ mbɔ̌ wɛ́ ŋɡɔ ɑ ɡɛ pʉʉ kɛ́ ḿbɔ́ ńzɑ́p tʉ́m pɔ nǔu Yɛ́su Kɛlístɔ. Kɛlístɔ ɛ̂wɑ́ lɔk pɔ́Ꞌɔ, ŋ́kɛ́ ḿbɔ́ ńnɑ́ŋ ḿbɔ́ pɔ tsɛt tʉ́m pʉ́ʉ. Mɔ sɛ́ ḿbɛn ḿbɔ́ ḿbúꞋ mbɔ́ mbɔ̌ ŋɡɔ ɑ ɡɛ pʉʉ kɔŋ Sɛ́, ḿbɛn ŋ́ɡẅɛɛ ŋkɔŋɛ tsɛtsɛt pʉʉ, ɛ́ lɛɛ pɔ́Ꞌɔ, pʉʉ tɛntɛ pɑ́Ꞌ tʉ́ yi mɛŋɑŋ mɛ́ kúunɛ sɛ́ lɑ́, mbɑ pɑ́Ꞌ ndɑ́ yi cʉ́ kúunɛ sɛ́.

¹⁸ Ɛ́ lɛɛ pɔ́Ꞌɔ, pʉʉ kuꞋ nɛpɔ́ yi mbɔ pʉʉ pɛ́ pʉɔ-Sɛ́ pɛtsʉʉ zúꞋ ntɛ́ yi ŋkɔŋɛ Kɛlístɔ ɡúꞋnɛ pɔ́Ꞌɔ, ɛ́sɑk pɔ́Ꞌɔ, ŋ́ɡʉ tʉ́ pɔ́Ꞌɔ, ŋ́kúu sɛ́ pɔ́Ꞌɔ.

¹⁹ Yɔ pɑ́Ꞌ mɔ sɛ́ ḿbɔ́ ḿbúꞋ mbɔ́ mbɔ̌ Sɛ́ pɔ́Ꞌɔ. A ɡʉ ɛ́fú nǔu pʉʉ kuꞋ nɛjí pɑ́Ꞌ ŋkɔŋɛ-Kɛlístɔ pɔ́Ꞌɔ, tɛ mbɑ pɑ́Ꞌ ɛ́ lɛɛnɛ jínu tsʉʉ. Pʉʉ ɡʉ ḿbɔ́ tɛ ńjí yîyɑ́ ŋkɔŋɛ, yúu tsʉʉ yi ɛ́ tʉ́m-Sɛ́ pɛn ḿbɔ́ tsɛt tʉ́m pʉʉ tɛ yúu pɔɔ nǔu jɑ́k.

²⁰ Jʉ́ Sɛ́, kuꞋ nɛɡɛ mbɑ kʉ̈ɔ́ lɑ́ nǔu pɛkŋɛ, ŋ́ɡɛ tɛ ńtsuŋ ńdɛɛ pɑ́Ꞌ pɛkŋɛ sɛ́ ńdɔ́ɔ, mbɑ pɑ́Ꞌ pɛkŋɛ sɛ́ ŋ́kwɑŋɛ. A ɡɔ́ ŋ́ɡɛ ńdɔk pɔ mɛtʉʉ mɛ́ mi ɛ́ fɑꞋnɛ tsɛt mɛtʉ́m mɛkŋɛ.

²¹ Gúꞌlɛ pɔ́ mbɔ̌ wɛ́ tsɛt cúꞋlɛ-pʉɔ-Kɛlístɔ, ńdɛɛ nǔu Yɛ́su Kɛlístɔ, nǔu mɛŋɡuꞋ mɛŋɡuꞋ, kɛ́ nɛpɑt! Ɛ́ pɔ́Ꞌɔ.