Ɛ́fɛ̂zɛ 1 - Kɑɑ Fí

Pɔ̂l sɛ́ ḿbúꞋ mbɔ́ mbɔ̌ pʉɔ-Ɛ́fɛ̂zɛ

¹ Yɔ ŋwɑꞋnɛ fú mbɔ̌ mɔ pɔ̂l, Sɛ́ kɑ kɔŋnɛ ŋɡɔ m bɔ́ ŋɡɑŋntúu-Yɛ́su Kɛlístɔ. Ŋ ɡɑ́ mbɔ̌ pʉʉ pʉɔ-Sɛ́ pi pʉʉ nɑ́ŋnɛ Ɛ́fɛ̂zɛ, mbɔ pʉʉ kɑ zɑ́p tʉ́m nǔu Yɛ́su Kɛlístɔ, ŋ́kɛ́ ńjí pɔ ndɑꞋ nu yɛ́.

² Lɑ́ wɛkŋɛ Sɛ́ mbɑ Tsɑpʉɔ Yɛ́su Kɛlístɔ sɛ́ ḿbɔ́ nɛ́ pʉʉ, ḿbɔ́ ńníꞋ mɔ́fíitɛ tʉ́m pʉʉ.

Yúu mi Sɛ́ kɑ lɛɛnɛ nǔu Kɛlístɔ ńdɔk ŋ́ɡɑ́ fuꞋ níinɛ yɛkŋɛ

³ Pɛkŋɛ sɛ́ ŋ́ɡúꞋlɛ Sɛ́ Tɑ́t pɛ́ Tsɑpʉɔ wɛkŋɛ Yɛ́su Kɛlístɔ. A kɑ ɡɛ nu sʉ́Ꞌnɛ nǔu pɛkŋɛ, ŋ́ɡɑ́ yúu sʉ́Ꞌnɛ tsʉʉ yi ɛ́ fúnɛ tɛ tʉ́nɛpú mbɔ̌ pɛkŋɛ, ŋ́ɡɑ́ pɔ́Ꞌɔ, ńdɛɛ nǔu pɑ́Ꞌ ɑ kɑ lɑ́Ꞌnɛ tɛmtɛ wɛkŋɛ pɛ́ Kɛlístɔ,

⁴ mbɔ ɑ kɑ lɛɛ nǔu Kɛlístɔ ńtsɔ́Ꞌ wɛkŋɛ, ńdɔk ŋ́ɡɛ pʉɔ pɛ́ tɛ ḿbɛ́t pɔ kɛ́ niitɛ mbí pɑ́Ꞌ pɛkŋɛ ɡʉ ḿbɔ́ mbi yɛ́ ḿbɔ́ pʉɔ lɛ́ɛnɛ́nɛ, ḿbɔ́ pɑkɛ́fɑɑnɛ. A kɑ lɔk pɑ́Ꞌ ɑ kɔŋnɛ wɛkŋɛ,

⁵ ńzɑ́p tɛ ntí sɑk tɛꞋ ŋɡɔ ɑ ɡʉ ńdɛɛ nǔu Yɛ́su Kɛlístɔ ŋ́ɡɛ pɛkŋɛ tsʉ́Ꞌ pɔ́ɔ pɛ́. Ɛ́ pɔ́ pɔ wɛ nɛkɔŋtɛ, ḿbɔŋ wɛ́ tɛꞋ.

⁶ A kɑ lɔk wɛkŋɛ ŋ́ɡɛ pʉɔ pɛ́ nɛpɔ́ yi pɛkŋɛ ɡʉ ŋ́ɡúꞋlɛ wɛ́ nǔu mɑ́mɑ́ nu kɛ́ fʉꞋ yi ɑ kɑ ɡɛnɛ. Ɛ́ kɑ lɛɛ nǔu pɑ́Ꞌ ɑ kɑ tɛmtɛ́nɛ wɛkŋɛ pɛ́ Mɔ́ɔ nɛ ẅi ɑ kɔŋnɛ wɛ́ tɛꞋ, ŋ́ɡɑ́ fuꞋ fɛ̌ɛ yɛkŋɛ, pɔ́Ꞌɔ ɛ́ pɔ́ kwɑꞋ mɑ́mɑ́ nu tɛꞋ.

⁷ Mɔ́ɔ nɛ ɛ̂wɑ́ kɑ lɔk mɛci mɛ́ ńdɔk ńtsúꞋ wɛkŋɛ, pɛkŋɛ luk. Sɛ́ likŋɛ mɛfɑɑnɛ mɛkŋɛ ŋ́ɡɑ́ mbɔ̌ pɛkŋɛ. Yɔ nu kɛ́ fʉꞋ yi Sɛ́ kɑ lɔknɛ ŋ́ɡɑ́ fuꞋ fɛ̌ɛ yɛkŋɛ,

⁸ ɛ́ fuꞋ yi ɑ kɑ ɡɑ́nɛ mbɔ̌ pɛkŋɛ tɛ ɛ́ zɑ́ɑ zɑ́ɑnɛ, ŋ́ɡɔ ŋ́ɡɑ́, ńtsɔ́Ꞌ jínu yɛkŋɛ pɛkŋɛ jí nu.

⁹ Ɛ́ yɛ́tɛ́ lɑ pɛkŋɛ jí yúu mi ɑ kɑ zɑ́pnɛ, mbɔ ɛ́ kɑ zɛɛ ḿbɔ́ pɔ yi lʉɔmɛ́nɛ. Yîyɑ́ yúu pɔ́ yi ɑ kɑ zɑ́Ꞌnɛ njí, ɛ́ pɔŋ wɛ́ pɔŋnɛ, ɑ zɑ́p ŋɡɔ ɑ ɡʉ ńdɑ́Ꞌ ńdɔk Kɛlístɔ ŋ́ɡɛ ɛ́ puutɛ,

¹⁰ ḿbɔ́ ŋɡɔ ŋkɑ́ ɡʉ ńdɑ́Ꞌ ḿbɔ́ tɛ kuꞋ, jʉ́ Sɛ́ cúꞋlɛ yúu tsʉʉ yi ɛ́ tʉ́nɛ́pú pɔ́p mi ɛ́ ndǔmbí, ŋ́ɡɑ́ tsʉʉ tsʉʉ mbɔ̌ Kɛlístɔ ɑ pɔ́ ɛ́sɑ́Ꞌ pɔ zɛ́nɛ jʉ́.

¹¹ Pɛk kɑ lúꞋnɛ pɔ pɑ́Ꞌ pɛk kɑ lɑtnɛ mbʉʉ nǔu Kɛlístɔ, lɑ ŋ́ɡẅɛɛ yɛ́k zʉꞋ tsɛtsɛt pʉɔ pi ɑ ɡɛnɛ pɔ́p luk, ɛ́ mbíꞋŋɡɔ Sɛ́ kɑ zɑ́Ꞌnɛ njí ńtsɔ́Ꞌ wɛ́k. Ɛ́ pɔ́ pɑ́Ꞌ ɑ kɑ zɑ́pnɛ. Sɛ́ pɛn ŋ́ɡɛ kʉ̈ɔ́ lɑ́ pɔ pɑ́Ꞌ ɑ kɑ zɑ́pnɛ ŋɡɔ ɑ ɡʉ ŋ́ɡɛ pɔ́Ꞌɔ.

¹² A kɑ pɔ́ ńtsɔ́Ꞌ wɛkŋɛ pɔ́Ꞌɔ, luk yi pɛk pi pɛk kɑ piitɛ́nɛ nɛzɑ́p tʉ́m nǔu Kɛlístɔ, pɛk ɡʉ ŋ́ɡúꞋlɛ jʉ́ Sɛ́ mbíꞋŋɡɔ ɑ ɡúꞋ tɛꞋ.

¹³ Ɛ́ ɡʉ nǔu pʉʉ yʉ́ʉ, mbɔ pʉʉ kɑ zúꞋ sẅiŋɛ yi ɛ́ yɛ́ nɛ́nẅín, ɛ́ pɔ́ Ŋkʉʉ Sʉ́Ꞌnɛ ẅí Sɛ́ kɑ lɛɛ pɔ nǔu lɑ ŋ́ɡɛ pʉʉ luk. Pʉʉ kɑ zúꞋ pɔ́Ꞌɔ, ńzɑ́p tʉ́m yʉ́ʉ nǔu Kɛlístɔ, Sɛ́ ńcʉ̈ɔꞋ lii yɛ́ nǔu pʉʉ, ńdɔk ńnyɛt ŋɡɔ pʉʉ pʉɔ pɛ́. Yîyɑ́ lii pɔ́ Zẅikŋɛ Lɛ́ɛnɛ́nɛ yi ɑ kɑ kɑꞋnɛ ŋɡɔ ɑ ɡʉ ŋ́ɡɑ́ mbɔ̌ pɛkŋɛ.

¹⁴ Zẅikŋɛ Lɛ́ɛnɛ́nɛ lɔk ḿbɔ́ zɛsɛ́ nǔu fuꞋ yi Sɛ́ kɑ niitɛ ńzɑ́p nɛɡɑ́ mbɔ̌ pʉɔ pɛ́. Sɛ́ lɔk ńniitɛ ɛ́sẅíi wɛkŋɛ ŋɡɔ pɛkŋɛ ɡʉ ńdɑ́Ꞌ ŋ́ɡẅɛɛ mɛcɔ́ nǔu ŋkɑ́ yi ɑ ɡʉ ńdɑ́Ꞌ ńtɛmtɛ ńcẅɛɛtɛ wɛkŋɛ nǔu nu kɛpɔŋ. Pɑ́Ꞌ ɛ́ pɔ́Ꞌɔ lɑ́, pɛkŋɛ sɛ́ ŋ́ɡúꞋlɛ Sɛ́ mbíꞋŋɡɔ ɑ ɡúꞋ tɛꞋ.

Pɔ̂l sɛ́ ḿbúꞋ mbɔ́ mbɔ̌ Sɛ́ nǔu tú-pʉɔ-Kɛlístɔ pi pɔ́p Ɛ́fɛ̂zɛ

¹⁵ Pɑ́Ꞌ ŋ kɑ zúꞋnɛ ŋɡɔ pʉʉ sɛ́ ŋ́kẅiꞋ ńzɑ́p tʉ́m yʉ́ʉ nǔu Tsɑpʉɔ Yɛ́su, ḿbɛn ńzúꞋ ŋɡɔ pʉʉ sɛ́ ŋ́kɔŋ pʉɔ-Sɛ́ pɛtsʉʉ lɑ́,

¹⁶ mɔ ḿbɔ́ ŋkɑ́ tsʉʉ ḿbɔ́ ḿbúꞋ mbɔ́ mbɔ̌ Sɛ́, ḿbɛn ŋ́ɡɛ́mtɛ wɛ́ nǔu tú yʉ́ʉ.

¹⁷ Mɔ sɛ́ ḿbúꞋ mbɔ́ mbɔ̌ Sɛ́ Tsɑpʉɔ wɛkŋɛ Yɛ́su Kɛlístɔ, jʉ́ ẅi ɑ ɡẅɛɛnɛ nɛɡúꞋ, ŋɡɔ ɑ ɡɑ́ wʉ́ʉ nɛ́ jínu, ŋ́ɡɑ́ wʉ́ʉ nɛ́ shʉ́ nɛlɔk ńtsuŋ ńjí wɛ́ tɛ ɛ́sẅíi nu.

¹⁸ Mɔ sɛ́ ḿbɛn ḿbúꞋ mbɔ́ mbɔ̌ wɛ́, ŋɡɔ ɑ ɡɛ tʉ́m yʉ́ʉ jí kyɛꞌ yɛ́ nɛpɔ́ yi pʉʉ ɡʉ tsuŋ ńjí yúu mi ɑ kɑ pɔ́ ɛ́fúŋ wʉ́ʉ ntɛ́ yɛ́tɛ́. Mbɑ pɑ́Ꞌ pʉʉ ɡʉ ńjí mɑ́mɑ́ nu sʉ́Ꞌnɛ yi pʉʉ pɛ́ pɛcɔ́ pʉɔ pi ɑ kɑ tsɔ́Ꞌnɛ wɔ́p ɡʉ ŋ́ɡɛ cẅɛ́ɛ, ɛ́ pɔ́ yúu mi ɑ kɑ niitɛ́nɛ ńzɑ́p mbɔ̌ pʉʉ.

¹⁹ Mɔ sɛ́ ḿbɛn ḿbúꞋ mbɔ́ mbɔ̌ wɛ́ ŋɡɔ ɑ ɡɛ pʉʉ jí ŋɡɔ mɛtʉʉ mɛ́ ɡúꞋ ńdɛɛ mɛtʉʉ tsʉʉ, mbɑ ŋɡɔ ɑ ɡɛ pʉʉ jí pɑ́Ꞌ mîmɑ́ mɛtʉʉ tɔ́ɔtɛ́nɛ wɛkŋɛ pɑzɑ́p tʉ́m nǔu wɛ́ pɔ́Ꞌɔ.

²⁰ Mîmɑ́ mɛtʉʉ mi Sɛ́ kɑ lɔknɛ ŋ́ɡɛ Kɛlístɔ zẅíimɛ tsɛtsɛt pɛpfú, kɔ́Ꞌ tʉ́nɛ́pú ńnɑ́ŋ nǔu ɡúŋ pɔ́ yɛ́ yi tʉʉ.

²¹ A pɔ́ zúꞋu ńdɔk ńdɛɛ ŋɡɔŋ pɛcʉ̈ɔ́Ꞌ-Sɛ́ pɔ́p pɛfɔɔ pɔ́p mbɑ mɛcɔ́ mɛyúu mi ɛ́ ɡẅɛɛnɛ mɛtʉʉ tʉ́nɛ́pú. Ɛ́ lɛɛ pʉɔ tsʉʉ tɛ mbɑ pɑ́Ꞌ ŋɡɑŋ lɑɑ ḿbɔ́ pɔ wɔ̌ lɑ́, kɛ pɔ nǔu yɔ kɛm-njí ɔ́ɔ, kɛ pɔ nǔu yi ɛ́ ɡʉ ńdɑ́Ꞌ lɑ ńtɔ́ ɔ́ɔ.

²² Sɛ́ kɑ níꞋ yúu tsʉʉ mbɔ̌ wɛ́. Sɛ́ kɑ pɔ́ tɛ ńníꞋ kʉ̈ɔ́ lɑ́ nǔu mbɔ́ mɛ́, ŋ́ɡɛ ɑ pɔ́ mbɔ̌ cúꞋlɛ-pʉɔ Sɛ́, ḿbɔ́ tú, nɛpɔ́ yi pʉɔ-cúꞋlɛ ɡʉ ḿbɔ́ ńzúꞋ ntsu wɛ́.

²³ CúꞋlɛ-pʉɔ-Sɛ́ mbʉʉ-Kɛlístɔ. A tsɛt cúꞋlɛ-pʉɔ pɛ́ ŋkɑ́ tsʉʉ, jʉ́ ẅí ɑ zʉꞋ tsʉʉ ndǔmbí.