2 Timɔtɛ́ɛ 2 - Kɑɑ Fí

Timɔtɛ̂ɛ pɛ́m nɛjʉ́ɔ ŋɡʉ̈ɔ́Ꞌ pɑ́Ꞌ Yɛ́su

¹ Ŋ́kɛ́ ŋ́ɡʉ nǔu ɡu mɔ́ɔ wɑɑ, nɑ́ Yɛ́su Kɛlístɔ ɡɑ́ mɛtʉʉ mbɔ̌ ɡu ńdɛɛ nǔu pɑ́Ꞌ ɑ ɡẅɛɛnɛ pɔŋtʉ́m.

² Nu yi ɔ kɑ pɔ́ ńzúꞋ n zíꞋ mbi pʉɔ tɛ ńzɑ́ɑ, kɛ́ ńzíꞋ pɔ yɛ́tɛ́ mbɔ̌ pʉɔ pi mbɔ ɔ tɛ́m ŋkwɛn ŋ́ɡɑ́ mbɔ̌ pɔ́p, lɑ pɔ́p kuꞋ yɔ́p nɛzíꞋ pɛcɔ́ pʉɔ.

³ Jʉ́ɔ yú ŋɡʉ̈ɔ́Ꞌ tsɛt fɑꞋ-Yɛ́su Kɛlístɔ pɑ́Ꞌ kwɑꞋ ndʉ̈ɔ́Ꞌntsɔ.

⁴ Ŋu lɛɛ tɛ ḿbɛ́m fɑꞋ-ndʉ̈ɔ́Ꞌntsɔ, mbɔɔ kíi ńzɑ́p tʉ́m yɛ́ nǔu yúu ndɛꞋ pɔ́, pɑ́Ꞌ ɑ lɑɑ ḿbɔ́ ńdɔɔ ŋɡɔ nu pɔŋ ŋu ẅí ɑ kɑ lɔknɛ wɛ́ fɑꞋ.

⁵ Ndʉ́ŋndʉŋ pɑ́Ꞌ ŋu lɑɑ ḿbɔ́ ŋ́kʉɔ ndʉ́ɔlɛ́, mbɔɔ kʉɔ nǔu ntɛ́ yi nɛpʉ́ʉ-ndʉ́ɔlɛ́ sɛ́ ḿbíkŋɛ pɔ́, pɛ́ pɔɔ tsɔ́Ꞌ fɑꞋ yɛ́ pɔ́.

⁶ Nzʉ́Ꞌnɑŋ ẅí ɑ ŋ́kíɛnɛ ziꞋnɛ sʉ́Ꞌnɛ, ḿbɔ́ nduŋmbi nɛkwɛ́t yúu mi ɛ́ fúnɛ ŋkɑ́Ꞌ yɛ́.

⁷ Sɑ́ŋ nu nǔu mɛnu mi ɛ fúnɛ nɛcú lɑɑ, Tsɑpʉɔ ɡʉ ŋ́ɡɛ ɔ zúꞋ tsʉʉ.

⁸ Kẅíitɛ Yɛ́su Kɛlístɔ, pɑ́Ꞌ ɑ kɑ zẅíimɛ́nɛ nǔu nɛvú, ɑ kɑ fú nǔu njẅɛt-fɔɔ Ndɑvît, ɛ́ pɑ́Ꞌ Ŋkʉʉ sʉ́Ꞌnɛ ẅi mɔ sɛ́ ńcẅi ńcúnɛ.

⁹ N jʉ́ɔ ŋɡʉ̈ɔ́Ꞌ tɛ pɛ́ níꞋ wɑ́ɑ ndɑ́tsɑ́ŋ pɑ́Ꞌ ŋkɑ́ yi mɔ ŋu kɛpɔŋ lɑ́ pɑ́Ꞌɑ mbíꞋ pɔ Ŋkʉʉ Sʉ́Ꞌnɛ ɛ̂wɑ́. Lɑ́ pɛ́ kɑ́ níꞋ sẅiŋɛ-sɛ́ ndɑ́tsɑ́ŋ pɔ́.

¹⁰ Ɛ́ yúu mi ɛ́ ɡɛnɛ m bɔ́ ńjʉ́ɔ ŋɡʉ̈ɔ́Ꞌ pɔ ŋɡɔ́ku ɔɔ, mbíꞋ pʉɔ pi Sɛ́ tsɔ́Ꞌnɛ wɔ́p ńdɔk ŋ́ɡɛ pʉɔ pɛ́, sʉk sʉknɛ, ńjí ŋɡɔ Yɛ́su Kɛlístɔ ɡʉ ŋ́ɡɛ pɔ́p luk yɔ́p. Pɔ́p fu pɔ́Ꞌɔ, ŋ́kúu tsɛt nɛŋwɑ́ŋɛ-luk kɛ́mɛ.

¹¹ Mɛnu mi mɔ ńcú lɑɑ ɛ́ zúꞋu ḿbɔ́ pɔ́Ꞌɔ: «Ɛ́ lɑɑ ḿbɔ́ yi pɛkŋɛ pɛ Kɛlístɔ kɑ tɛmtɛ ḿpfú, mbɔ pɛkŋɛ pɛpɔ́p ŋ́ɡɛ ńtɛmtɛ ḿbɔ́ ɡú.

¹² Pɛkŋɛ lɑɑ ŋ́kɛ́ ḿbɔ́ ɛ́sʉk tsɛt ŋɡʉ̈ɔ́Ꞌ sʉknɛ pɑ́Ꞌ jʉ́, mbɔ pɛkŋɛ pɛpɔ́p ɡʉ ŋ́ɡɛ ńtɛmtɛ ɛ́sɑ́Ꞌ ŋɡɔŋ. Pɛkŋɛ lɑɑ kɛ́ ḿmuŋɛ wɛ́, mbɔ ɑ ŋ́ɡɛ ḿmuŋɛ wɛkŋɛ ɡúu.

¹³ Ɛ́ lɑɑ ḿbɔ́ yi pɛkŋɛ nɑ́ŋ ńtsɔ́Ꞌ nzʉʉ yɛ ńtík ŋɡʉ́ɔlɛ, mbɔ ɑ kɛ́ mbɔɔ tsɔ́Ꞌ nzʉʉ yɛkŋɛ ńtík ŋɡʉ́ɔlɛ pɔ́. MbíꞋŋɡɔ ḿbɔ́ ɑ pɔɔ cú nu ḿbɛn ŋ́kúp pɔ́.»

Timɔtɛ̂ɛ pɔ́ ŋɡɑŋfɑꞋ ẅi Sɛ́ pɛ́mnɛ

¹⁴ Mɔnɛ mɛnu tsʉʉ mi ɔ ɡẅɛɛ nɛkẅíitɛ mbɔ̌ pʉɔ tsʉʉ, ńtʉ́ʉ mbi Sɛ́ ɛ́sɑ́ɑnɛ sɑ́ɑnɛ́nɛ ɛ́sẅíi pʉɔ ŋɡɔ kɔɔ pɔ́p kɑ́t ńzɔŋ nu. Pɔ́p zɔŋ nu pɔ́Ꞌɔ, ɛ́ pɔɔ cẅɛ́lɛ́ nǔu yɛcɔ́ yúu pɔ́, tɛ ńtsʉ́Ꞌ pɔ́Ꞌɔ, mbɔ ɛ́ ḿbʉ́ʉpɛ pʉɔ pi pɔ́p zúꞋnɛ mîmɑ́ mɛnu pʉ́ʉpɛ́nɛ nzʉʉ Sɛ́.

¹⁵ Sɑ́Ꞌ tʉʉ nɛɡɔ́ ńtʉ́ʉ mbi Sɛ́, ḿbɔ́ ŋu ẅí ɑ pɛ́mnɛ wɛ́, ḿbɔ́ ŋɡɑŋfɑꞋ ẅí sʉ́ʉ kɑ́ pɔ́ ŋ́kɔ́ wɛ́ nǔu fɑꞋ yɛ́ pɔ́. Ḿbɔ́ ŋɡɑŋfɑꞋ ẅí ɑ cẅinɛ Ŋkʉʉ ẅi ɛ́ nɛ́nẅín, kɛ́ ɡʉ nǔu ŋ́kúpmɛ yɛcɔ́ yúu.

¹⁶ Pɑ́ɑ nɛzɑ́p wú ntsu nǔu wɛ pɑzɔŋ mɛsẅíŋɛ mi ɛ́ pɔ́ pɔ níinɛ, mɛsẅíŋɛ mi ɛ́ tɑ́ɑtɛ ŋu tɑ́tɛ́nɛ nɛzɑ́p tʉ́m nǔu Sɛ́. Pʉɔ pi pɔ́p zɔŋnɛ mîmɑ́ mɛsẅíŋɛ kɛ́ ḿbɔ́ ɛ́fú nɛjɔ́ŋ Sɛ́ ŋ́kẅiꞋ ŋ́kʉɔ kʉɔnɛ.

¹⁷ Sẅiŋɛ-pʉɔ ɛ̂pɑ́ pɔ́ pɔ pɑ́Ꞌ fʉ́ŋ yi ɛ́ níꞋnɛ mbɛt, ḿbɔ́ ŋ́kẅiꞋ ŋ́ɡɑ́Ꞌ lɑ́. Himɛnɛ̂ pɔ́p Filɛtɛ pɔ́ lii-pʉɔ ɛ̂pɑ́.

¹⁸ Pɔ́p ḿmɛꞋ sɛ̂ndúŋ-nu nɛ́nẅín. Pɔ́p sɛ́ ńjúk ńcú ŋɡɔ Sɛ́ kɑ kɛ́mɔ́ ńdɑ́Ꞌ ŋ́ɡɛ pʉɔ zẅíimɛ nǔu nɛvú. Pɔ́p ɡɛ mɔ́ pɔ́Ꞌɔ, tɛ pʉɔ tɛ ńzɑ́ɑ pi pɔ́p zɑ́pnɛ tʉ́m nǔu Sɛ́ fú nzʉʉ yɛ́ ŋ́kʉɔ.

¹⁹ Tɛ mbɑ pɔ́Ꞌɔ, cʉ́ndɑ́ yi Sɛ́ kɑ nɔŋnɛ pɛ́t ńtɛn tɛnnɛ. Pɛ́ kɑ ŋwɑꞋnɛ ndǔ ŋɡɔ: «Tsɑpʉɔ sɛ́ ńjí pʉɔ pɛ́, ḿbɛn ŋ́ŋwɑꞋnɛ ŋɡɔ: Ŋu lɑɑ ŋɡɔ ɑ ŋu-Tsɑpʉɔ, ɑ kʉɔ nu kɛpɔŋ.»

²⁰ Pɛ́ lɑɑ ŋ́ɡʉ ndɑ́-ŋɡɑŋyúu pɛ́ jʉ́ɔ mɛkɑ́ŋ ntɛ́ nɛ́ ntɛ́. Pɛ́ jʉ́ɔ mi pɛ́ kɑ lɔk tʉ́n-ŋɡɔ̂l ńniitɛ, ńjʉ́ɔ mi pɛ́ kɑ lɔk tʉ́n-ŋkɑ́p ńniitɛ, ḿbɛn ńjʉ́ɔ mbɑ mi pɛ́ kɑ lɔknɛ tʉ́ ŋ́kɔ́ɔ, mbɑ mi pɛ́ kɑ lɔknɛ tsɑ́Ꞌ ḿbɔ́ɔ. Mɛcɔ́ pɔ́ mi pɛ́ tíknɛ sɛ́ pɔ nǔu mɛlɛ́Ꞌlɑ́Ꞌ ɡwɛ́. Mɛcɔ́ pɔ́ mi pɛ́ tíknɛ sɛ́ lɛ́Ꞌ tsʉʉ.

²¹ Pɔ́Ꞌɔ, ŋu lɑɑ ḿbʉʉtɛ mbʉʉ yɛ nǔu mɛnu kɛpɔŋ mi ɛ fúnɛ nɛcú lɑɑ, mbɔ ŋɡɑŋ ɡʉ ḿbɔ́ pɑ́Ꞌ kɑ́ŋ yi pɛ́ tíknɛ sɛ́ pɔ nǔu lɛ́Ꞌ ɡwɛ́ lɑ́. Mbɔ ɑ ɡʉ ḿbɔ́ ŋu Tsɑpʉɔ fyɑknɛ wɛ́ ńdɔk ŋ́ɡɛ wɛ, ɑ cẅɛ́lɛ́ Tsɑpʉɔ wɛ, ɑ pɔ́ ŋu ẅí ɑ ɡɛnɛ nu sʉ́Ꞌnɛ tsʉʉ.

²² Kʉɔ mɛyúu kɛpɔŋ mi ŋɡwɑsuu tsɑ́ɑnɛ nɛɡɛ. Pʉʉ pɛ pʉɔ pi pɔ́p fúŋnɛ Tsɑpʉɔ nɛ́ tʉ́m lɛ́ɛnɛ́nɛ lɔɔ nu yi ɛ́ tʉ́ʉnɛ ndʉ́ŋndʉŋ, ńzɑ́p tʉ́m nǔu Sɛ́, ŋ́kɔŋ pʉɔmɛsɔŋ, ńnɑ́ŋ nɛ́ mbɔ́tnɛ.

²³ Kʉɔ mɛnu mi pɛ́ júknɛ ńzɔŋ ɛ́ pɔ́ pɔ mɛ ɡʉɡʉʉ mɛnu mi ɛ́ kɑ́ cẅɛ́lɛ́. Ɔ jí ŋɡɔ pɛ́ zɔŋ mîmɑ́ mɛnu tɛ ńtsʉ́Ꞌ nɛmɛk, ńtɑ́k pɔ mɛfɛꞋ.

²⁴ Ɛ́ pɛn ŋ́kɛ́ ḿbɔɔ pɔŋ ŋɡɔ ŋɡɑŋfɑꞋ-Tsɑpʉɔ tɑ́k fɛꞋ pɔ́. A ɡẅɛɛ nɛkɔŋ pʉɔ tsʉʉ, ŋ́kuꞋ nɛzíꞋ pʉɔ nɛ́ yúu sʉ́Ꞌnɛ, ḿbɔ́ mbɔŋlɔ́ŋ.

²⁵ A ɡẅɛɛ nɛlɔk mbɔ́tnɛ ńdɛꞋlɛ yúu mbɔ̌ pʉɔ pi ɑ cúnɛ nu pɔ́p kúp pɔ shʉ́-nu yîyɑ́. Líkcɔ́ Sɛ́ ɡʉ ŋ́ɡɑ́ shʉ́ mbɔ̌ pîpɑ́ pʉɔ pɔ́p kúpmɛ yɔp ntɛ́ nɛsɑ́ŋ nu, ɛ́fú pɔ́Ꞌɔ, ńjí nu yi ɛ́ nɛ́nẅín,

²⁶ ḿbɛn ŋ́kwɑŋɛ nu pɑ́Ꞌ ɛ́ sɛ́ ḿbíkŋɛ ŋɡɔ pɔ́p kwɑŋɛ, ŋ́ɡɔ́ɔ ŋ́kɛ́ ɛ́fú tsɛt mɛɡwɑk mi Sɑ́ttɑ kɑ lɔknɛ ŋ́ɡẅɛɛ wɔ́p ńcẅɛt. Mbɔ pɔ́p kɑ pɔ́ tsɛtú ńtsʉ́Ꞌ ḿbɔ́ pɔ ɡɑŋtsɑ́ŋ, ŋ́ɡɛ pɔ yúu mi Sɑ́ttɑ sɛ́ ŋ́kɔŋ.