2 Timɔtɛ́ɛ 1 - Kɑɑ Fí

CɛꞋlɛ

¹ Yɔ ŋwɑꞋnɛ fú mbɔ̌ mɔ Pɔ̂l, ŋɡɑŋntúu-Yɛ́su Kɛlístɔ, mbɔ Sɛ́ kɑ kɔŋnɛ ŋɡɔ m bɔ́ wɛ́tɛ́. Yɑ́ɑ fɑꞋ pɔ́ nɛɡʉ ńcú nu nǔu luk kɛ́mɛ yi Sɛ́ kɑ kɑꞋnɛ ŋɡɔ pʉɔmɛsɔŋ ɡʉ ńdɛɛtɛ nǔu Yɛ́su Kɛlístɔ ŋ́ɡẅɛɛ.

² Ŋ ŋwɑꞋnɛ yɔ ŋwɑꞋnɛ ŋ́ɡɑ́ mbɔ̌ ɡu Timɔtɛ̂ɛ, ɡu mɔ́ɔ wɑ́ɑ, ŋ kɔŋ wú tɛꞋ. Mɔ sɛ́ ńdɔ́ɔ mbɔ̌ Tɑ̌ɑ wɛkŋɛ Sɛ́ mbɑ mbɔ̌ Tsɑpʉɔ wɛkŋɛ Yɛ́su Kɛlístɔ ŋɡɔ pɔ́p pɔ́ nɛ́ ɡu, ḿbɔ́ ńtsɑ́ɑ mɛjʉ́ŋ mú, ḿbɔ́ ńníꞋ mɔ́fíitɛ tʉ́m ɡu.

Pɔ̂l sɛ́ ŋ́ɡɑ́ pɑ́Ꞌlɑ́ mbɔ̌ Sɛ́ nǔu tú-Timɔtɛ́ɛ ḿbɛn ḿbɔ́ ńníꞋ mɛtʉʉ mɛ́

³ Mɔ sɛ́ ŋ́ɡɑ́ pɑ́Ꞌlɑ́ mbɔ̌ Sɛ́ nǔu tú yú, Sɛ́ ẅi mɔ sɛ́ ŋ́ɡúꞋlɛ nɛ́ tɑ́Ꞌ tʉ́m pɑ́Ꞌ pɛmɑ̂ɑŋɡɑpnjẅɛt pɛk kɑ ɡúꞋlɛ́nɛ yɔ́p lɑ́. Nɛnɛm kɛ nɛtúꞋ ɔɔ, m bɔ́ ḿbúꞋ mbɔ́ mbɔ̌ Sɛ́, mbɔɔ nɑ́ kɛ́ kẅíi lík yú pɔ́.

⁴ Ŋ kɑ́ likŋɛ pɑ́Ꞌ pûu kɑ ɡɔ́ fɑkŋɛ ɔ lɑɑ pɔ́. Mɔ sɛ́ ńtsɑ́ɑ tɛꞋ pɑ́Ꞌ m bɔ́ ḿbɛn ńjʉ́ɔ wú, nu pɔŋ wɑ́ɑ pɑ́ꞋtɛꞋ.

⁵ Ŋ kɑ́ likŋɛ ŋɡɔ ɔ zɑ́p tʉ́m nǔu Yɛ́su Kɛlístɔ tɛ ɛ́sẅíi nu pɔ́, ŋ kɑ́ likŋɛ ŋɡɔ mɑ́ wu wɛ ndʉ́m Lɔẅîs tɛ mbɑ mɑ́ wu Ɛnîs kɑ pɔ́ ŋ́ɡɛ pɔ pɔ́Ꞌɔ pɔ́. N jí ŋɡɔ mbɑ ɡu yú pɛn ńzɑ́p tʉ́m yú nǔu Yɛ́su pɔ pɑ́Ꞌ pɔ́p.

⁶ Ɛ́ yúu mi ɛ́ ɡɛnɛ m bɔ́ ŋ́kẅíitɛ wú ŋɡɔ, yúu mi ŋ kɑ zɑ́pnɛ mbɔ́ mɑ́ɑ tú ɡu, Sɛ́ ɡɑ́ fuꞋ fɛ̌ɛ yú, ɔ kuꞋ nɛɡɛ, kɔɔ nɑ́ ɛ́ lɛ́.

⁷ N cú mbíꞋŋɡɔ Zẅikŋɛ yi Sɛ́ kɑ zɛɛ ŋ́ɡɑ́ mbɔ̌ pɛkŋɛ, ɛ́ kɑ́ pɔ́ yi ɛ́ ŋ́ɡɛ pɛkŋɛ pɔ́k pɔ́knɛ pɔ́. Tɛ ńtsʉ́Ꞌ pɔ́Ꞌɔ, mbɔ Zẅikŋɛ ɛ̂yɑ́ níꞋ mɛtʉʉ nǔu pɛkŋɛ, ŋ́ɡɛ pɛkŋɛ kɔŋ pʉɔmɛsɔŋ, ḿbɛn ŋ́kúꞋlɛ mbʉʉ yɛkŋɛ.

⁸ Pɔ́Ꞌɔ lɑ́, kɔɔ ɔ kɔ́ sʉ́ʉ nɛcú yúu mi ɔ jínɛ nǔu Tsɑpʉɔ wɛkŋɛ. Kɔɔ ɔ kɔ́ sʉ́ʉ nɛcú ŋɡɔ ɔ jí wɑ́ɑ mbɑ pɑ́Ꞌ mɔ ndɑ́tsɑ́ŋ mbíꞋ wɛ́ lɑ́. Ńtsʉ́Ꞌ pɔ́Ꞌɔ, ɔ Pɛ́m yú pǔu tɛmtɛ ńjʉ́ɔ ŋɡʉ̈ɔ́Ꞌ, ńdɔk ŋ́ɡɛ Ŋkʉʉ Sʉ́Ꞌnɛ sɑt zʉꞋ, ɛ́sɑ́ŋ nǔu mɛtʉʉ mi Sɛ́ ɡɑ́nɛ mbɔ̌ pǔu.

⁹ A kɑ ɡɛ pɛkŋɛ luk, ɛ́fúŋ wɛkŋɛ ńdɔk ŋ́ɡɛ pʉɔ pɛ́. A ŋ́kɑɑ ɡɛ pɔ́Ꞌɔ, ɛ́fú nǔu mɛfɑꞋ sʉ́Ꞌnɛ mi pɛkŋɛ fɑꞋnɛ pɔ́, ɑ kɑ ɡɑ́ pɑ́Ꞌ ɑ kɑ kwɑŋɛ́nɛ ḿbɛn ŋ́ɡɛ pɔŋtʉ́m yɛ́. A kɑ lɛɛ nǔu Yɛ́su Kɛlístɔ ńnyɛt pɔŋtʉ́m yɛ́ ɛ̂yɑ́ tɛ ndǔmbí pɛ́t pɔ kɛ́ pɔ́ ɡú.

¹⁰ Ɛ́ ŋkɔ̂ɔnɛ, mbɔ Sɛ́ ɡɛ pɛkŋɛ jʉ́ɔ yîyɑ́ pɔŋtʉ́m mɑ́ntɑ́ɑ, mbíꞋŋɡɔ ŋu ẅí ɑ ɡɛnɛ pɛkŋɛ luk, Yɛ́su Kɛlístɔ tɔ́ mɔ́. Jʉ́ kɑ ɡẅɛɛnɛ nɛvú ńcẅɛ́ɛ mɛtʉʉ mɛ́. Jʉ́ kɑ cẅinɛ Ŋkʉʉ sʉ́Ꞌnɛ mbɔ̌ pɛk, ńnyɛt wɛkŋɛ ŋɡɔ ŋu lɑɑ ńnɛn pɑ́Ꞌ Ŋkʉʉ Sʉ́Ꞌnɛ ɛ̂wɑ́ cúnɛ ɑ ɡẅɛɛ Luk kɛ́mɛ mbɔɔ pɛn ḿpfú pɔ́.

¹¹ Sɛ́ kɑ tsɔ́Ꞌ wɑ́ɑ ŋɡɔ m bɔ́ ŋɡɑŋntúu ńcẅi wɔ Ŋkʉʉ sʉ́Ꞌnɛ, ḿbɛn ḿbɔ́ ńdɛꞋlɛ nu mbɔ̌ pʉɔ.

¹² Yɛ́tɛ ɡɛnɛ n jʉ́ɔ yɔ ntɛ́ ŋɡʉ̈ɔ́Ꞌ ŋkɔ̂ɔnɛ pɑ́Ꞌɑ mbíꞋ pɔ pɔ́Ꞌɔ. Lɑ́, sʉ́ʉ kɛ́ ḿbɔɔ ŋ́kɔ́ wɑ́ɑ nǔu pɔ́, mbíꞋŋɡɔ mɔ sɛ́ ńjí ŋu ẅi n zɑ́pnɛ tʉ́m nǔu wɛ́. N tsuŋ ḿbɔ́ ńjí ŋɡɔ ŋɡɑŋ ɡẅɛɛ mɛtʉʉ nɛlɔk ŋ́kúꞋlɛ nu yi ɑ kɑ lẅɛꞋnɛ mbɔ̌ mɔ, tɛ ŋ́kúu lɛ́Ꞌ yi Yɛ́su ńdɑ́Ꞌ ńtɔ́.

¹³ Timɔtɛ̂ɛ, pɛ́ɛ fʉꞋ nǔu sẅiŋɛ yi ɔ kɑ zúꞋnɛ ntsu mɔ ɛ́ pɔ́ nɛ́nẅín. Zɑ́p tʉ́m yú nǔu Sɛ́, ŋ́kɔŋ pʉɔmɛsɔŋ mbíꞋ pɑ́Ꞌ pɛkŋɛ lɑtnɛ mbʉʉ yɛkŋɛ nǔu Yɛ́su Kɛlístɔ lɑ́.

¹⁴ Zẅikŋɛ Lɛ́ɛnɛ́nɛ pɑ́Ꞌ ɛ́ nǔu pɛkŋɛ lɑ́ cẅɛ́lɛ́ wú. Ɔ pɔɔ pɛ́m yɛcɔ́ yúu kúpmɛ nǔu nu Sʉ́Ꞌnɛ yi pɛ́ kɑ lẅɛꞋnɛ mbɔ̌ ɡu pɔ́.

¹⁵ Ɔ sɛ́ ńjí pɑ́Ꞌ pʉɔtsʉʉ tsɛt pɑk-ŋɡɔŋ-Azîi mɛꞋ mɔ́ wɑ́ɑ tɛ mbɑ Fijɛ̂l pɔ́p Ɛlmɔjɛ̂l ɡúu.

¹⁶ Ŋɡɔ Tsɑpʉɔ ɡɛ nu sʉ́Ꞌnɛ nǔu pʉɔ tsʉʉ njɛ́Ꞌ-Ɔnɛzifɔɔ, ńdɔ́ɔ pɔ́Ꞌɔ, mbíꞋŋɡɔ ɑ ḿbɔ́ ńnɑ́ŋ ńníꞋ tʉ́m yɑ́ɑ tɛꞋ, ɑ ŋkɑɑ mɔ́ kɔ́ sʉ́ʉ nǔu mɔ pɑ́Ꞌ mɔ ŋɡɑŋtsɑ́ŋ pɔ́.

¹⁷ Tɛ ńtsʉ́Ꞌ pɔ́Ꞌɔ, mbɔ ɑ kɑ ɡɔ́ ŋ́kúu tʉ́sɔŋ-Lɔ́mɑ wɔ, ɛ́sɑ́Ꞌ tʉʉ ńdɔɔ zʉꞋ yi mɔ zúꞋu tɛ ńdɑ́Ꞌ ńjʉ́ɔ wɑ́ɑ.

¹⁸ Mɔ sɛ́ ḿbúꞋ mbɔ́ mbɔ̌ Tsɑpʉɔ ŋɡɔ ɑ lɑ́Ꞌ lɛ́Ꞌ nɛzɑ́Ꞌ ntsɑŋ ŋ́ɡẅɛɛ pɔŋtʉ́m nǔu wɛ́. KwɑꞋ ɡu sɛ́ ńjí pɑ́Ꞌ ŋ kɑ pɛ́t tʉ́sɔŋ-Ɛ́fɛ̂zɛ ɑ cẅɛ́lɛ́ wɑ́ɑ pɔ́Ꞌɔ.