2 Tɛsɑlɔník 2 - Kɑɑ Fí

Yúu ɛ́ ɡʉ ńdɑ́Ꞌ ńdɛɛ lɑ Yɛ́su tɔ́

¹ Pɔ́ɔpɛ́mɑ́, ɛ́ ɡʉ nǔu nu yi ɛ́ sɛ́ ńdíŋɛ lɛ́Ꞌlɑ́Ꞌ yi Tsɑpʉɔ wɛkŋɛ Yɛ́su Kɛlístɔ ɡʉ ńdɑ́Ꞌ ḿbɛn ńtɔ́, pɛkŋɛ cúꞋlɛ mbi yɛ́ lɑ́, pɛk sɛ́ ḿbúꞋ mbɔ́ mbɔ̌ pʉ́ʉ ŋɡɔ:

² «Kɔɔ pʉʉ zúꞋ pɑ́Ꞌ pɛcɔ́ pʉɔ sɛ́ ńcú ŋɡɔ lɛ́Ꞌlɑ́Ꞌ-Tsɑpʉɔ tɔ́, ḿvukŋɛ vukŋɛ́nɛ. Kɔɔ pʉʉ pɔ́k. Tɛ mbɑ pɑ́Ꞌ ŋu ẅí ɑ nɑŋnɛ ńcẅi Ŋkʉʉ ẅí ɛ́ fúnɛ mbɔ̌ Sɛ́ lɑɑnɛ ńcú, tɛ ńzɛɛ ḿbɔ́ yi pʉʉ zúꞋ pɔ mbɔ̌ ŋu ẅi ɑ sɛ́ ɛ́sẅíi nu-Sɛ́, kɛ pɛ́ zɛɛ ɛ́sẅíi wʉ́ʉ pɔ ŋɡɔ pɛk ŋwɑꞋnɛnɛ pɔ́Ꞌɔ ɔɔ, kɔɔ pʉʉ pɛ́m.»

³ «Kɔɔ pʉʉ pɛ́m ŋu fúklɛ wʉ́ʉ, kɛ pɔ nɛ́ yɛ́tɛ́ ntɛ́ lɑ́. Yîyɑ́ lɛ́Ꞌlɑ́Ꞌ kɛ́ lɑ́Ꞌ ńtɔ́ kɛ́ pɔ́ yi yɛcɔ́ ntɛ́ mɛnu piitɛ ńdɛɛtɛ pɔ́. Ɛ́ lɔk ḿbɔ́ pɑ́Ꞌ pʉɔ tɛ ńzɑ́ɑ ɡʉ ńdɑ́Ꞌ ńdʉꞋ nɛzúꞋ ntsu-Sɛ́. Fɔɔ-mɛnu kɛpɔŋ cẅɛt ńtʉ́ʉ lɑ yîyɑ́ lɛ́Ꞌlɑ́Ꞌ ɡɔ́ɔ ŋ́kɛ́ ńtɔ́. Jʉ́ wɑ́ ẅí pɛ́ ɡʉ ńdɑ́Ꞌ ḿmɑꞋ wɛ́ tsɛt múk lɑ́.»

⁴ A ɡʉ ńdɑ́Ꞌ cẅɛt ńtʉ́ʉ, ŋ́ɡɔ́ɔ ŋ́kɛ́ ńzɛ nɛtɔꞋ pʉɔ ŋɡɔ kɔɔ pɔ́p pɛn ŋ́ɡúꞋlɛ yɛcɔ́ yúu tɛ mbɑ Sɛ́, ɛ́ pɔ́ ńcú ŋɡɔ jʉ́ lɛɛnɛ wɔ́p pɛ́tsʉʉ, ɑ ŋ́kúu mbɑ tsɛt zʉꞋ Sɛ́ nɑ́ŋnɛ, cú ŋɡɔ jʉ́ pɔ́nɛ Sɛ́.

⁵ Tɛ pʉʉ kɑ́ pɔ́ ŋ́kẅíitɛ ŋɡɔ ŋkɑ́ yi ŋ kɑ pɔ́nɛ tsɛtsɛt pʉʉ, ŋ kɑ sẅíi wʉ́ʉ nɛ́ mɛnɛ mɛnu pɔ́ ɔɔ?

⁶ Pʉʉ sɛ́ ńjí yúu mi ɛ́ tɑɑtɛ́nɛ fɔɔ-mɛnu kɛpɔŋ lɑ ɑ pɔɔ cẅɛt ńtʉ́ʉ ŋkɔ̂ɔnɛ pɔ́. Yîyɑ́ ŋkɑ́ ɡʉ ŋ́ɡɛ ŋ́kuꞋ, lɑ ɑ cẅɛt.

⁷ Mɛnu mí fɔɔ-mɛnu kɛpɔŋ ɡʉ ńdɑ́Ꞌ ŋ́ɡɛ, ɛ́ kɛ́ mɔ́ ńzɛɛ ńzɛ, lɑ́ ŋ́kɛ́ ḿbɛ́t ɛ́sɔ́tɛ sɔ́tɛ́nɛ, ɛ́ tsʉ́Ꞌ pɔ ndɑꞋ pɑ́Ꞌ pɛ́ ɡʉ ḿbɑꞋnɛ ŋu ẅí ɑ tɑɑtɛ́nɛ wɛ́.

⁸ Jʉ́ fɔɔ-mɛnu kɛpɔŋ ɡɔ́ɔ ŋ́kɛ́ ńcẅɛt. A jʉ́ ẅi Tsɑpʉɔ Yɛ́su ɡʉ ńdɑ́ fɑ́k zwɛ́t-ntsu wɛ́ nǔu wɛ́ ɑ pfú, ntɛ́ yi Yɛ́su lɔknɛ ńtɔ́, ɡɛ ɑ mɛ.

⁹ Fɔɔ-mɛnu kɛpɔŋ ɡʉ ńdɑ́Ꞌ ŋ́ɡɔ ńtɔ́, Sɑ́ttɑ níꞋ mɛtʉʉ mɛ́ nǔu wɛ́, ɑ lɔk ŋ́ɡɛ mɛnu mɑ̌ɑmɑɑnɛ pɔ́p ndɑɑkɑ́jʉ́ɔ mɛnu mɛntɛ́ mɛntɛ́, ńdɔk ɛ́fúklɛ pʉɔ.

¹⁰ A ɡʉ ńdɑ́Ꞌ ńdɔk mɛnu mi ɛ́ kɑ́ pɔ́ nu pɔ́ mɛntɛ́ mɛntɛ́, ɛ́fúklɛ pʉɔ pi pɔ́p ɡʉ ńdɑꞋ pɛ́. Pɔ́p pɛ́ pɔ́Ꞌɔ, mbíꞋŋɡɔ pɔ́p lʉꞋ nɛkɔŋ nu yi ɛ́ nɛ́nẅín yi ɛ́ ḿbɔ́ ŋ́ɡʉ ŋ́ɡɛ pɔ́p luk.

¹¹ Ɛ́ yúu mi ɛ́ ɡɛnɛ, Sɛ́ túu yɛcɔ́ yúu tɔ́ ŋ́ɡɛ pɔ́p tsʉ́Ꞌ ḿbúunɛ púunɛnɛ, nɛpɔ́ yi kwɑŋɛ yɔ́p ɡʉ ńtsʉ́Ꞌ ńtʉ́ʉ pɔ nǔu mɛnu mi ɛ́ kɑ́ pɔ́ nu pɔ́.

¹² Ɛ́ lɛɛ pɔ́Ꞌɔ, pʉɔ pi pɔ́p ŋ́kɑɑ pɛ́m nu yi ɛ́ nɛ́nẅín pɔ́, nu yi ɛ́ kɑ́ pɔ́ nu pɔ́ tsʉ́Ꞌnɛ ḿbɔŋ wɔ́p, pɔ́p ɡɔ́ɔ ŋ́kɛ́ ḿvu ntsɑŋ.

Sɛ́ kɑ tsɔ́Ꞌ wʉ́ʉ pɑ́Ꞌ pʉʉ ɡʉ ńdɑ́Ꞌ ńduk

¹³ Pɔ́ɔpɛ́mɑ́ pi Tsɑpʉɔ kɔŋnɛ wɔ́p, ɛ́ ɡʉ nǔu pɛk, mbɔ pɛk ɡẅɛɛ nɛɡɑ́ pɑ́Ꞌlɑ́ mbɔ̌ Sɛ́ ŋkɑ́ tsʉʉ ntɛ́ wʉ́ʉ, mbíꞋŋɡɔ ɑ kɑ tsɔ́Ꞌ wʉ́ʉ tɛ ɛ́fú nzɛnɛ nɛpɔ́ yi pʉʉ ɡʉ ńduk. Pʉʉ luk ntɛ́ pɑ́Ꞌ Zẅikŋɛ Lɛ́ɛnɛ́nɛ sɛ́ ŋ́ɡɛ pʉʉ pɔ́ pʉɔ-Sɛ́, mbɑ pɑ́Ꞌ pʉʉ zɑ́pnɛ tʉ́m nǔu nu yi ɛ́ nɛ́nẅín.

¹⁴ Mɔnɛ mɛnu mi ɛ́ kɑ ɡɛnɛ Sɛ́ lɔk Ŋkʉʉ Sʉ́Ꞌnɛ ẅi pɛk kɑ cẅinɛ mbɔ̌ pʉʉ, ɛ́fúŋ wʉ́ʉ, nɛpɔ́ yi pʉʉ ɡʉ ŋ́kúu tsɛt nɛɡúꞋ-Tsɑpʉɔ wɛkŋɛ Yɛ́su Kɛlístɔ.

¹⁵ Pɔ́Ꞌɔ lɑ́ mbɑ̌ɑ pɔ́ɔpɛ́mɑ́, kɔɔ pʉʉ kɑ́ɑ. Yúu mi pɛk kɑ zíꞋnɛ wʉ́ʉ, kɛ nɛ́ ntsu ɔɔ, kɛ ŋ́ŋwɑꞋnɛ pɔ tsɛt ŋwɑꞋnɛ ɔɔ, pʉʉ ɡẅɛɛ sʉ́Ꞌnɛ.

¹⁶ Tɑ̌ɑ wɛkŋɛ Sɛ́ kɑ kɔŋ wɛkŋɛ, ńdɔk ŋ́ɡɑ́ fuꞋ fɛ̌ɛ yɛkŋɛ, ńní mɛtʉʉ mʉ́kŋɛ nǔu ntɛ́ yi ɛ́ ŋ́ɡʉ ńdɑ́Ꞌ ḿmɛ pɔ́, ḿbɛn ŋ́ɡɛ pɛkŋɛ nɑ́ŋ ḿbɔ́ ńzẅíꞋlɛ yúu sʉ́Ꞌnɛ yi ɑ kɑ kɑꞋnɛ mbɔ̌ pʉɔ pɛ́. Pɔ́Ꞌɔ, pɛk sɛ́ ńdɔ́ɔ mbɔ̌ wɛ́ mbɑ mbɔ̌ Tsɑpʉɔ wɛkŋɛ Yɛ́su Kɛlístɔ ŋɡɔ:

¹⁷ «Pɔ́p níꞋ mɛtʉʉ mʉ́ʉ, ŋ́ɡɑ́ wʉ́ʉ nɛ́ mɛtʉʉ pʉʉ lɔk ŋ́ɡɛ pɔ mɛnu sʉ́Ꞌnɛ, ḿbɛn ŋ́ɡẅɛɛ pɔ sẅiŋɛ sʉ́Ꞌnɛ.»