2 Kɔlɛ̂ŋtɛ 8 - Kɑɑ Fí

Nɛɡɑ́ yúu nǔu fɑꞋ-Sɛ́ nɛ́ pɔŋ tʉ́m

¹ Pɔ́ɔpɛ́mɑ́ pɛ́k, pɛk sɛ́ ńdɔɔ nɛɡɛ pʉʉ jí yúu mi Sɛ́ kɑ ɡɑ́nɛ fuꞋ níinɛ mɛcúꞋlɛ-pʉɔ-Kɛlístɔ mi ɛ́ Mɑsɛndwɑn pɔ́p ɡɛ.

² Ŋɡʉ̈ɔ́Ꞌ mɛntɛ́ mɛntɛ́ sɛ́ ŋ́kúu pʉɔ-Kɛlístɔ zúꞋu lɑ́, tʉ́m yɔ́p pɔ́ ńtsɑ́ɑtɛ tsɑ́ɑtɛ́nɛ tɛꞋ. Pɔ́p zɛɛ ḿbɔ́ pɔ pɛpúŋ tɛꞋ lɑ́, ŋ́ɡẅɛɛ tʉ́m sʉ́Ꞌnɛ nɛɡɑ́ yúu tɛ ɛ́ zɑ́ɑ zɑ́ɑnɛ.

³ Ɛ sẅíi wʉ́ʉ nɛ́ yúu mi ŋ kɑ jʉ́ɔ jʉ́ɔnɛ, pɔ́p kɑ ɡɑ́ yúu mi pɔ́p kuꞋ nɛɡɑ́ tɛ ḿbɛn ńdɛɛ pɑ́Ꞌ mbɔ pɔ́p ɡɑ́, ŋ́kɛ́ ŋ́kɔŋ kɔŋnɛ lɑ́ ŋ́ɡɑ́ pɔ́Ꞌɔ.

⁴ Pɔ́p kɑ PúꞋ mbɔ́ mbɔ̌ pɛk tɛꞋ ŋɡɔ pɛk pɛ́m pɔ́p ɡɑ́ yɔ́p yúu nɛlɔk ńcẅɛ́lɛ pʉɔ-Sɛ́ pi pɔ́p Yɛlúsɑlɛm.

⁵ Pɛk kɑ zɛɛ mbɔɔ kwɑŋɛ ŋɡɔ mbɔ pɔ́p ɡɑ́ yúu ndɛn nú pɔ́, pɔ́p kɑ pɔ́ ŋ́ɡɑ́ ndɛn nú, mbíꞋŋɡɔ pɔ́p kɑ piitɛ ŋ́ɡɑ́ yɔ́p luk mbɔ̌ Tsɑpʉɔ, ḿbɛn tʉ́ʉ ńzẅíꞋlɛ mbɑ kʉ̈ɔ́ lɑ́ yi pɛk ɡʉ cú mbɔ̌ pɔ́p. Ɛ́ pɔ́ pɑ́Ꞌ Sɛ́ kɔŋnɛ.

⁶ Ɛ́ yúu mi ɛ́ kɑ ɡɛnɛ pɛk PúꞋ mbɔ́ mbɔ̌ Titɛus ŋɡɔ ɑ ɡʉ lɑ́Ꞌ pʉʉ, ŋ́ɡɛ yɔ fɑꞋ-pɔŋtʉ́m yi ɑ kɑ ɡɛnɛ pʉʉ jí, ɛ́ mɛkŋɛ ńdẅiklɛ.

⁷ Ɛ́ tʉ́ʉ nǔu kʉ̈ɔ́lɑ́ pʉʉ ɡɑ́nɛ fʉꞋ sʉ́Ꞌnɛ, pʉʉ zɑ́p tʉ́m nǔu Sɛ́ sʉ́Ꞌnɛ, ńjí nɛcú nu ɛ́ cẅɛt, ńjí nu-Sɛ́ kwɑꞋ sʉ́Ꞌnɛ, ńzɑŋɛ mbʉʉ ŋɡɔŋ ŋkɑ́ tsʉʉ, ŋ́ɡẅɛɛ ŋkɔŋɛ nzʉʉ pɛk, pɔ́Ꞌɔ lɑ́ pʉʉ pɛn ńnyɛt fʉꞋ sʉ́Ꞌnɛ nǔu yɔ fɑꞋ-pɔŋtʉ́m.

⁸ Ŋ kɑ́ pɔ́ ńcú pɑ́Ꞌɑ ńdɔk ńcú pɔ yɛcɔ́ nu yi pʉʉ ɡʉ ŋ́ɡɛ pɔ́. Ɛ sẅíi wʉ́ʉ pɔ pɑ́Ꞌ mɛcɔ́ mɛcúꞋlɛ-pʉɔ-Kɛlístɔ sɛ́ zɑŋɛ mbʉʉ ŋ́ɡɛ pɔ́Ꞌɔ, ńdɔk ŋ́ɡɑ́ wʉ́ʉ nɛ́ shʉ́ nɛɡɛ pɛ́ jí ŋɡɔ pʉʉ ɡẅɛɛ ŋkɔŋɛ tɛ ɛ́sẅíi nu.

⁹ Pʉʉ zɛɛ ḿbɔ́ ńjí yúu mi Tsɑpʉɔ Yɛ́su Kɛlístɔ kɑ lɔknɛ pɔ tʉ́m sʉ́Ꞌnɛ ŋ́ɡɑ́. A kɑ ɡẅɛɛ yúu tsʉʉ, lɑ́ ńtsʉ́Ꞌ mbúŋ mbíꞋ wʉ́ʉ, pɑ́Ꞌ pʉʉ ɡʉ ɛ́fú nǔu púŋ yɛ́, ńtsʉ́Ꞌ pʉɔ pi Sɛ́ ɡɑ́nɛ yúu yɛ́ mbɔ̌ pɔ́p tɛꞋ.

¹⁰ Ŋ ɡʉ ŋkɔ̂ɔnɛ nɛsẅíi wʉ́ʉ nɛ́ yúu mi mɔ sɛ́ ŋ́kwɑŋɛ nǔu yɔ nu-ŋkɑ́p. Ɛ́ kɑ pɔ́ ŋɡuꞋlɑɑ m biitɛ ŋ́kwɑŋɛ ŋɡɔ mbɔ pɛ́ ɡɑ́ yúu ńdɔk ńcẅɛ́lɛ pʉɔ-Kɛlístɔ. Pʉʉ pɛn ḿbiitɛ nɛzɛ. Yúu mi pʉʉ lɑɑ ŋ́ɡɛ ŋkɔ̂ɔnɛ ɛ́ pɔŋ,

¹¹ pɑ́Ꞌ pʉʉ ɡʉ mɛk yîyɑ́ fɑꞋ yi pʉʉ kɑ zɛnɛ lɑ́. Pʉʉ ɡɔ́ mɛk yîyɑ́ fɑꞋ, mbɑ wɔ̌ lɑ́ ɡɑ́ pɔ yúu mi ɑ kuꞋnɛ nǔu. Ndʉ́ŋndʉŋ pɑ́Ꞌ pʉʉ kɑ lɔk zɑŋɛ mbʉʉ ŋ́kwɑŋɛ, pʉʉ pɛn ńdɔk zɑŋɛ mbʉʉ ŋ́ɡɛ.

¹² Ŋu ɡɑ́ yúu nɛ́ tʉ́m sʉ́Ꞌnɛ, Sɛ́ ɡɔ́ ḿbɛ́m yúu mi ŋɡɑŋ ɡɑ́nɛ, ɛ́fú pɔ nǔu yi ŋɡɑŋ ɡẅɛɛnɛ, ɑ kɛ́ fú nǔu yi ŋɡɑŋ kɑ́ ɡẅɛɛ pɔ́.

¹³ Ɛ́ ɡʉ nǔu yɔ nu, pɛ́ kɑ́ pɔ́ ńdɔk ńcú ŋɡɔ ŋu ɡɑ́ yúu ńdɔk ńcẅɛ́lɛ pɛcɔ́ pʉɔ tɛ ńjɑ́k yɛ́ pɔ́. Pɛ́ lɔk ńcú pɔ ŋɡɔ mbɑ wɔ̌ lɑ́ ɡẅɛɛ wɛ mɔ́zʉꞋ.

¹⁴ Ɛ́ ɡʉ nǔu nu yi pɛkŋɛ cúnɛ lɑɑ, pʉʉ jɛ́p yúu mi ɛ́ zɑ́pmɛnɛ nǔu yʉ́ʉ yúu ŋ́ɡɑ́ mbɔ̌ pʉɔ pi pɔ́p sɛ́ ńjɑ́k, ɛ́ lɛɛ pɔ́Ꞌɔ, ɛ́ lɑ́Ꞌ yɛcɔ́ lɛ́Ꞌ pʉʉ pɔ́ ńjɑ́k yʉ́ʉ, pɔ́p jɛ́p yúu mi ɛ́ zɑ́pmɛnɛ nǔu yɔ́p ńdɔk ńdẅíkŋɛ yʉ́ʉ, pʉʉ pɛ́ pɔ́p lɔk ŋ́ɡẅɛɛ yúu ndʉ́ŋndʉŋ.

¹⁵ Ɛ́ lɔk ḿbuutɛ nǔu pɑ́Ꞌ pɛ́ kɑ ŋwɑꞋnɛnɛ tsɛt ŋwɑꞋnɛ Sɛ́ ŋɡɔ: «Ŋu ẅí ɑ kɑ lɑknɛ yúu tɛ ɛ́ zɑ́ɑ ŋkɑɑ ɡẅɛɛ tɛ ɛ́ lɛɛ pɔ́. Ŋu ẅí ɑ kɑ lɑknɛ yúu ɛ́ pɔɔ zɑ́ɑ ŋkɑɑ yɛcɔ́ yúu ńjɑ́k».

Pʉɔ pi pɛ́ ɡʉ cúꞋlɛ ŋkɑ́p nníꞋ mbɔ̌ pɔ́p

¹⁶ Pɛkŋɛ ɡɑ́ pɑ́Ꞌlɑ́ mbɔ̌ Sɛ́ nǔu pɑ́Ꞌ ɑ ɡɛnɛ Titɛus zɑŋɛ mbʉʉ nǔu nu yʉ́ʉ pɑ́Ꞌ pɛk.

¹⁷ Ɛ́ yúu mi ɛ́ kɑ ɡɛnɛ pɛk cú mbɔ̌ wɛ́ ŋɡɔ ɑ pɛn lɑ́Ꞌ pʉʉ ńdíŋɛ wʉ́ʉ, ɑ ɡɔ́ɔ ḿbɛ́m. A kɑ́ pɔ́ ńtɔ́ mbíꞋ pɔ́ ndɑꞋ pɑ́Ꞌ pɛk túunɛ wɛ́ pɔ́, ɑ kɑ pɔ́ ŋ́kwɑŋɛ nɛtɔ́ ńjʉ́ɔ wʉ́ʉ, tɛ mbʉʉ yɛ pɔ́ ńzɑŋɛ nǔu tɛꞋ.

¹⁸ Pɛk túu wɔ́p wɛcɔ́ mɔ́ɔmɑ́ wɛkŋɛ. A pɔ́ ẅi mɛcúꞋlɛ-pʉɔ-Kɛlístɔ tsʉʉ ɡɛnɛ mɛkuꞋ mɛ́ tɛꞋ, ɛ́fú nǔu yɛ́ ntɛ́ nɛníꞋ tú nǔu Ŋkʉʉ Sʉ́Ꞌnɛ.

¹⁹ Pɛk kɑ́ pɔ́ ńtúu wɛ́ zɛ́nɛ pɛk pɔ́, mɛcúꞋlɛ-pʉɔ-Kɛlístɔ kɑ pɛn ńtsɔ́Ꞌ wɛ́ ŋɡɔ pɛkŋɛ pɛ́pɔ́p tɛ́m ku, ńcúꞋlɛ yɔ ŋkɑ́p. Pɛk ɡɛ yɔ fɑꞋ-pɔŋtʉ́m nɛlɔk ŋ́ɡɛ Tsɑpʉɔ ɡẅɛɛ nɛɡúꞋ mbɑ nɛlɔk ńnyɛt ŋɡɔ pɛk sɛ́ ńtsɑ́ɑ nɛcẅɛ́lɛ pɛcɔ́ pʉɔ.

²⁰ Pɛk kɑ́ pɔ́ ŋ́kɔŋ ŋɡɔ pɛ́ zɔɔtɛ wɛ́k nǔu yɔ mɑ́mɑ́ nɛpuꞋ-ŋkɑ́p ni pɛ́ sɛ́ ńtsup ŋ́ɡʉ nníꞋ mbɔ̌ pɛk pɔ́.

²¹ Pɛk sɛ́ ńtsɑ́ɑ nɛɡɛ yúu mi ɛ́ kɛ́ pɔŋ pɔ ndɑꞋ Sɛ́ pɔ́, pɛk sɛ́ ńtsɑ́ɑ nɛɡɛ yi ɛ́ ɡʉ ḿbɛn ḿbɔŋ mbɑ pʉɔmɛsɔŋ.

²² Pɛk túu wɔ́p Titɛus, ḿbɛn ŋ́ɡɛ wɛcɔ́ mɔ́ɔmɑ́ wɛkŋɛ. A pɔ́ ŋu ẅí ɑ kɔŋ nɛcẅɛ́lɛ pɛcɔ́ pʉɔ tɛꞋ. Pɛk zɛɛ mɔ́ ńjʉ́ɔ pɔ́Ꞌɔ, nǔu mɛnu tɛ ńzɑ́ɑ. Ɛ́ nǔu ŋkɔ̂ɔnɛ mbʉʉ yɛ́ pɛn ḿbɔ́ ńzɑŋɛ pɑ́ꞋtɛꞋ nɛtɔ́ ńjʉ́ɔ wʉ́ʉ mbíꞋ pɑ́Ꞌ ɛ́ lɑɑ ḿbɔ́ ɑ tɛ́m ŋkwɛn yɛ́ ŋ́ɡɑ́ mbɔ̌ pʉʉ kɛ́ cʉɔꞌ.

²³ Ɛ́ ɡʉ nǔu Titɛus, mbɔ ɑ ŋɡɑŋku wɑɑ, ɑ sɛ́ ńcẅɛ́lɛ wɑ́ɑ nǔu fɑꞋ yi ɛ fɑꞋnɛ mbíꞋ wʉ́ʉ, ŋ́ɡʉ nǔu pɔnɛ pɔ́ɔpɛ́mɑ́ pɛkŋɛ pɛ́pɑ́, mbɔ pɔ́p pʉɔ pi mɛcúꞋlɛ-pʉɔ-Kɛlístɔ kɑ túunɛ wɔ́p, pʉɔ pi yɔ́p fɑꞋ ŋ́kɑꞋ lík-Kɛlístɔ ŋ́ɡɑ́ tʉ́.

²⁴ Pɔ́p pɛ́pɔ́p lɑɑ ńtɔ́, pʉʉ ɡɛ tɛ pɔ́p jí ŋɡɔ pʉʉ sɛ́ ŋ́kɔŋ wɔ́p tɛ ɛ́sẅíi nu. MɛcúꞋlɛ-pʉɔ-Kɛlístɔ ɡɔ́ɔ ŋ́kɛ́ ńjí ŋɡɔ pɛk lɔk nu yʉ́ʉ ŋ́kɑꞋtɛ mbi pɔ́p pɑꞋnɛ tɛ ɛ́sẅíi nu.