2 Kɔlɛ̂ŋtɛ 4 - Kɑɑ Fí

FuꞋ-Sɛ́ yi ɛ́ tsɛt mɛkʉŋ-tsɑ́Ꞌ

¹ Pɔ́Ꞌɔ lɑ́, pɑ́Ꞌ Sɛ́ kɑ lɔk pɔ tsɑ́ɑ mɛjʉ́ŋ yɛ́, ŋ́ɡɑ́ yɔ fɑꞋ mbɔ̌ pɛk lɑ́, pɛk pɔɔ kɑ́ɑ pɔ́.

² Pɛk pɔɔ nǔu mɛntɛ́ lɔk ɛ́fɑꞋ mɛfɑꞋ mi ɛ́ mɛ́ ntsɛm, ḿbɛn ḿbɔ́ mɛ́ sʉ́ʉ pɔ́, wɛcɔ́ ŋkʉŋkʉ pɔɔ nǔu ku-nɛnɛn yɛ́k pɔ́, pɛk pɛn ŋ́kɛ́ ḿbɔɔ ḿbɔ́ ńdɔk mɛcɔ́ mɛnu ɛ́fɛntɛ sẅiŋɛ-Sɛ́ pɔ́, tɛ ńtsʉ́Ꞌ pɔ́Ꞌɔ, pɛk lɔk pɑ́Ꞌ pɛk mbi Sɛ́ ńdɛꞋlɛ pɔ́ nu nɛ́nẅín mbɔ̌ pʉɔmɛsɔŋ, tɛ ḿbɔ́ yi ɛ́ lɑɑ ḿbɔ́ ŋu pɔɔ lɑ́Ꞌ wɛ́k nǔu yɛcɔ́ nu pɔ́.

³ Ɛ́ lɑɑ ḿbɛn ḿbɔ́ yi Ŋkʉʉ Sʉ́Ꞌnɛ ẅi pɛk cẅinɛ, ɛ́ mbɔ̌ pɛcɔ́ pʉɔ ḿbɛ́t pɔ tsɛt ŋkwɑ́, mbɔ ŋkwɑ́ pɔ́ pɔ́Ꞌɔ, pɔ mbɔ̌ pʉɔ pi pɔ́p sɛ́ ŋ́kʉɔ Sɛ́, lɑ́ ŋ́ɡɛ ḿbɛ́ pɛ́nɛ,

⁴ ɛ́ pɑzúꞋ nu-Sɛ́ kɛ́ zɑ́p tʉ́m nǔu, pi sɛ́ wɛ yɔ mbí kɑ kɛ́mɔ́ ńjʉ́ɔꞋ jínu yɔ́p ńdɔk ńtɔ́Ꞌ wɔ́p nɛjʉ́ɔ kyɛꞌ yi ɛ́ fúnɛ nǔu Ŋkʉʉ sʉ́Ꞌnɛ. Pɔ́Ꞌɔ, pɔ́p pɔɔ jí pɑ́Ꞌ nɛŋwɑ́ŋɛ-Kɛlístɔ pɔ́nɛ pɔ́. Jʉ́ Kɛlístɔ pɑ́Ꞌ Sɛ́ pɔ́nɛ.

⁵ Pɛk kɑ pɔ́ ŋ́ɡɔ ńcẅi Ŋkʉʉ Sʉ́Ꞌnɛ, mbɔɔ fɑꞋ pɔ pɑ́Ꞌ pɛ́ ɡʉ ńjí wɛ́k pɔ́, pɛk fɑꞋ pɔ pɑ́Ꞌ pɛ́ ɡʉ ńjí ŋɡɔ Yɛ́su Kɛlístɔ Tsɑpʉɔ. Pɛk tʉ́ʉ ḿbɔ́ pɔ pɑfɑꞋ fɑꞋ pi pɔ́p fɑꞋnɛ mbɔ̌ pʉʉ mbíꞋ Yɛ́su,

⁶ mbíꞋŋɡɔ Sɛ́ ẅi ɑ kɑ cúnɛ ŋɡɔ: «Ɛ́ pɔŋ ŋɡɔ kyɛꞌ, ɛ́ kyɛꞌ zʉꞋ tsɛt nzɛ́nzʉ́ʉ», jʉ́ nɛ́ tú yɛ́ kɑ kɛ́ ńtɔ́ ŋ́kyɛꞋ mɛtʉ́m mɛ́k, nɛɡɛ pɛk jí pɑ́Ꞌ nɛŋwɑ́ŋɛ wɛ pɔ́nɛ, ɛ́ nɛŋwɑ́ŋɛ ẅi pɛ́ sɛ́ ńjʉ́ɔ nǔu shʉ́-Kɛlístɔ.

⁷ Lɑ́ pɛk pi yɔ fuꞋ nǔu pɛk, pɛk pɔ́ pɔ pɑ́Ꞌ mɛkʉŋ-tsɑ́Ꞌ lɑ́. Ɛ́ fú nǔu pɛ́ jʉ́ɔ sʉ́Ꞌnɛ ŋɡɔ mîmɑ́ mɛtʉʉ mi fʉꞋ yɛ kɑ́ pɔ́ ɡú pɔ́, fú pɔ mbɔ̌ Sɛ́, ɛ́ kɑ́ pɔ́ fú mbɔ̌ pɛk pɔ́.

⁸ Ŋɡʉ̈ɔ́Ꞌ sɛ́ ɛ́fú mɛshʉ́ mɛshʉ́ ńtɔ́ nǔu pɛk lɑ́ ŋ́kɛ́ ḿbɔɔ ḿbɔ́ ŋ́ɡɔꞋ wɛ́k pɔ́. Ɛ́ ɡʉ yɛcɔ́ ŋkɑ́ pɛk pɔɔ pɛn ńjí pɑ́Ꞌ pɛk ɡʉ ŋ́ɡɛ pɔ́, lɑ́ ŋ́kɛ́ ḿbɔɔ ńcú ŋɡɔ nu lwiklɛ zúꞋu pɔ́.

⁹ Pɛ́ kʉʉnɛ wɛ́k Sɛ́ kɛ́ mbɔɔ wɛ́k mɛꞋ. Ɛ́ ɡʉ yɛcɔ́ ŋkɑ́ yi pɛ́ tɛ́mnɛ wɛ́k sɛ́ lɑ́, pɛk kɛ́ mbɔɔ pfú.

¹⁰ Pɛk pɔ́ ŋkɑ́ tsʉʉ, ḿbɔ́ ḿbɛ́m ŋɡɔ pɛk ɡʉ ḿpfú ntɛ́ nɛvú ni Yɛ́su kɑ pfúnɛ. Pɔ́Ꞌɔ, nɛpɔ́ yi pɛ́ ɡʉ ńjʉ́ɔ ŋɡɔ luk-Yɛ́su ɛ́ yɛ́ sɔŋ mbʉʉ pɛk.

¹¹ Pɛk pí pɛk pɛ́t ɡú, pɛk ŋkɑ́ tsʉʉ ḿbɔ́ pɔ ntsu-nɛvú, mbíꞋ nu-Yɛ́su. Ɛ́ pɔ́Ꞌɔ, nɛpɔ́ yi pɛ́ ɡʉ ńdíŋɛ wɛ́k, ńjʉ́ɔ ŋɡɔ luk-Yɛ́su nǔu mbʉʉ yɛk tɛ mbɑ pɑ́Ꞌ ɛ́ ɡʉ ŋ́ɡɛ ḿpfú.

¹² Ɛ́ fú pɔ́Ꞌɔ, nɛvú ɡɔ́ ḿbɔ́ sɔŋ-mbʉʉ pɛk ḿbɔ́ ɛ́fɑꞋ yɛ́ fɑꞋ, luk pɔ́ ɛ́fɑꞋ yɛ́ fɑꞋ sɔŋ-mbʉʉ pʉʉ.

¹³ ŊwɑꞋnɛ-Sɛ́ cú ŋɡɔ: Ŋ kɑ zɑ́p tʉ́m nǔu Sɛ́, ɛ́ yúu mi ɛ́ kɑ ɡɛnɛ n cú nu, pɛk kɑ lɔk pɑ́Ꞌ pɛk zɑ́pnɛ tʉ́m nǔu Sɛ́, nǔu yîyɑ́ ntɛ́, ŋ́ɡẅɛɛ yɛ́k pɔ nɛcú nu Sɛ́,

¹⁴ ḿbɔ́ ńjí ŋɡɔ Sɛ́ ẅi ɑ kɑ ɡɛnɛ Tsɑpʉɔ Yɛ́su zẅíimɛ nǔu nɛvú, ɡʉ ŋ́ɡɛ ḿbɛn ŋ́ɡɛ pɛkŋɛ zẅíimɛ yɛkŋɛ, mbíꞋŋɡɔ pɛkŋɛ lɑt mbʉʉ nǔu Yɛ́su, Sɛ́ ɡɛ pɛkŋɛ pɛ́tsʉʉ cẅɛt, pɛkŋɛ pɛ Yɛ́su cúꞋlɛ.

¹⁵ Pɛk pɛ́m mɔnɛ mɛnu tsʉʉ mi Sɛ́ sɛ́ ńjʉ́ɔ ŋɡɔ ɛ́ kuꞋ mɛ́k, ńdɔk ńtsɑ́ɑ pɔ ŋɡɔ pʉʉ lúꞋnɛ. Pɔ́Ꞌɔ, ńjí ŋɡɔ ndɛn-pɑjí ŋɡɔ Sɛ́ kɔŋ wɔ́p ŋ́ɡɛ ŋ́kẅiꞋ zɑ́ɑ, ndɛn pɑɡɑ́ pɑ́Ꞌlɑ́ mbɔ̌ wɛ́, mbɑ pɑɡúꞋlɛ wɛ́, kẅiꞋ ńzɑ́ɑ ɡúu.

Nɛzɑ́p tʉ́m nǔu Yɛ́su ńdɔk ńnɑ́ŋ

¹⁶ Ɛ́ yúu mi ɛ́ ɡɛnɛ pɛk pɔɔ kɑ́ɑ, mbʉʉ yɛk sɛ́ ńzɛɛ ŋ́kẅiꞋ ŋ́kɑ́ɑ kɑ́ɑnɛ lɑ́, tʉ́m yɛ́k pɔ́ tsɛtú ḿbɔ́ suutɛ suutɛ́nɛ lɛ́Ꞌ tsʉʉ.

¹⁷ Mɔ́ɔ mɔ́yúu ŋɡʉ̈ɔ́Ꞌ ẅi pɛk ŋkɔ̂ɔnɛ ḿbɔ́ ńjʉ́ɔ, ɛ́ lɛɛ lɛɛnɛ. Pɛ́ lɑɑ ŋ́ɡʉ ḿbɛ́ɛ fʉꞋ, ɛ́ pɔɔ kuꞋ yɛcɔ́ yúu nǔu nɛɡúꞋ kɛ́ ndɛn ẅi ɛ́ kɑ́ pɔ́ ŋ́ɡʉ ńdɑ́Ꞌ ḿmɛ pɔ́, ẅi yîyɑ́ ŋɡʉ̈ɔ́Ꞌ lɔk ńtsɔ́Ꞌ sɛ̂ndúŋ ŋ́ɡɑ́ mbɔ̌ pɛkŋɛ.

¹⁸ Pɛk kɑ́ pɔ́ ɛ́fɑꞋ pɔ yúu mi pɛ́ lɔknɛ mík ńjʉ́ɔ pɔ́, pɛk sɛ́ ɛ́fɑꞋ pɔ yi pɛ́ kɑ́ pɔ́ ńjʉ́ɔ nɛ́ mík pɔ́. Ɛ́ zɛɛ ŋ́ɡɔ ḿbɔ́, yúu mi pɛ́ lɔknɛ mík ńjʉ́ɔ ɛ́ kɑ́ ńnɑ́ŋ tɛꞋ pɔ́, lɑ́ yi pɛ́ kɑ́ pɔ́ ńdɔk mík ńjʉ́ɔ pɔ́, ɛ́ ŋ́kɛ́ ńdɑ́Ꞌ ḿbɔ́ pɔ ɡú.