2 Kɔlɛ̂ŋtɛ 3 - Kɑɑ Fí

PɑfɑꞋ fɑꞋ nǔu kɑɑ fí

¹ Pɛk cú ńdɔk ḿbɛn ńzɛ zɛnɛ nɛlɛ́Ꞌlɛ ntɛ́ pʉɔ pi pɛk pɛ́tɛ kɛkʉ̈ɔ́? Kɛ ɛ́ sɛ́ ḿbíkŋɛ pɔ ŋɡɔ pɛk cẅɛ́ɛ ŋwɑꞋnɛ yi ɛ́ lɛ́Ꞌlɛ́nɛ pʉɔ pi pɛk pɛ́tɛ́, pɑ́Ꞌ pɛcɔ́ pʉɔ ɡɛnɛ lɑ ńdɔk ńtɔ́ mbi pʉʉ, kɛ pɔ́ nɛcẅɛ́ɛ mbɔ̌ pʉʉ lɑ ńdɔk ŋ́ɡʉ yɛcɔ́ zʉꞋ ɔɔ?

² Pʉʉ wɑ́ pɔ́nɛ yɛ́k ŋwɑꞋnɛ, mbɔ pɛ́ kɑ ŋwɑꞋnɛ tsɛt tʉ́m pɛk, pʉɔ pɛtsʉʉ sɛ́ ńjí ḿbɛn ḿbɔ́ ɛ́fúŋ,

³ ḿbɔ́ pɛ́ lɔk pɔ mík ńjʉ́ɔ ŋɡɔ pʉʉ ŋwɑꞋnɛ yi Kɛlístɔ kɑ ŋwɑꞋnɛ́nɛ, ńtúu wɛ́k pɛk tɔ́ ŋ́ɡɑ́. A ŋkɑɑ lɔk pɔ ŋkɔŋ-ŋwɑꞋnɛ lɑ́ ŋ́ŋwɑꞋnɛ yîyɑ́ ŋwɑꞋnɛ pɔ́, ɛ́ kɑ pɔ́ ŋwɑꞋnɛ, ńdɛɛ pɔ nǔu Zẅikŋɛ-Sɛ́, jʉ́ Sɛ́ ẅi ɑ ɡú, ḿbɔ́ ntʉʉ. Ɛ́ ŋkɑɑ pɔ́ ŋwɑꞋnɛ nǔu pɛtɑ̌ɑfɛlɛ́-ŋɡɔꞋ pɔ́, ɑ kɑ ŋwɑꞋnɛ pɔ nǔu tʉ́m-pʉɔmɛsɔŋ.

⁴ Pɛk cú nu nǔu fɑꞋ yɛ́k pɑ́Ꞌɑ, mbíꞋŋɡɔ pɛk lɔk pɑ́Ꞌ pɛk lɑtnɛ mbʉʉ nǔu Kɛlístɔ, ńtsuŋ ńjí ŋɡɔ Sɛ́ pɛ́m nu yɛ́k.

⁵ Pɛk kɑ́ pɔ́ ńcú pɑ́Ꞌɑ ŋɡɔ mbɔ pɛk lɔk kwɑꞋ mʉ́k mɛtʉʉ ŋ́ɡɛ yɛcɔ́ yúu pɔ́. Mɛtʉʉ mi pɛk lɔknɛ ŋ́ɡɛ yɔ fɑꞋ fú pɔ mbɔ̌ Sɛ́.

⁶ Jʉ́ kɑ ɡɛnɛ pɛk kuꞋ nɛpɔ́ pɑfɑꞋ fɑꞋ, nǔu kɑɑ yɛ́ fí. Yîyɑ́ kɑɑ kɑ́ pɔ́ fú pɔ nǔu nɛpʉ́ʉ ni pɛ́ kɑ ŋwɑꞋnɛ́nɛ pɔ́, ɛ́ fú pɔ nǔu Zẅikŋɛ-Sɛ́. Nɛpʉ́ʉ ni pɛ́ kɑ ŋwɑꞋnɛ́nɛ, ɛ́ ɡɛ ŋu pfú pfúnɛ, Zẅikŋɛ ɡɛ ŋu pɔ́ pɔ ɡú.

⁷ Pʉʉ pɛn ḿbɔ́ ńjí yʉ́ʉ pɑ́Ꞌ nu-nɛpʉ́ʉ kɑ pɔ́nɛ pɔ́Ꞌɔ. Pɛ́ kɑ ŋwɑꞋnɛ nǔu tɑ̌fɛlɛ́-ŋɡɔꞋ, ɛ́ ɡɛ pɛ́ pfú pfúnɛ. Tɛ mbɑ pɔ́Ꞌɔ, fɑꞋ nǔu nu-nɛpʉ́ʉ ɛ̂nɑ́, ɡẅɛɛ mɑ́mɑ́ nɛŋwɑ́ŋɛ, tɛ pɑíslɑyɛ̂l pɔɔ kuꞋ nɛlíŋɛ ẅîwɑ́ nɛŋwɑ́ŋɛ nǔu shʉ́-Mɔ̌sɛ̂ɛ pɔ́, mbɑ pɑ́Ꞌ ɑ ŋ́kɑɑ ńnɑ́ŋ pɔ́.

⁸ Pɑ́Ꞌ ɛ́ kɑ pɔ́ pɔ́Ꞌɔ lɑ́, ɛ́ ɡʉ ŋ́ɡɛ pɑ́Ꞌ lɑ́ fɑꞋ nǔu nu-Zẅikŋɛ Lɛ́ɛnɛ́nɛ, pɔɔ ɡɑ́ nɛŋwɑ́ŋɛ tɛ ńdɛɛ ẅîwɑ́ pɔ́ ɔɔ?

⁹ Ɛ́ lɑɑ ḿbɔ́ yi nu nǔu fɑꞋ-nɛpʉ́ʉ ni tɛ mbɑ pɑ́Ꞌ ɛ́ ḿbɔ́ ŋ́ɡɛ pɛ́ pfú pfúnɛ, ɛ́ kɑ ɡẅɛɛ nɛŋwɑ́ŋɛ, mbɑ nu nǔu fɑꞋ yi ɛ́ ɡɛnɛ pʉɔ tʉ́ʉ ndʉ́ŋndʉŋ mbi Sɛ́ ɡʉ ŋ́kɛ́ ŋ́ɡẅɛɛ nɛŋwɑ́ŋɛ ńdɛɛ yîyɑ́,

¹⁰ mbɔ pɛkŋɛ zɛɛ ńcú ŋɡɔ, nɛŋwɑ́ŋɛ wɛ ŋkɔ̂ɔnɛ tsúŋ ḿbɔ́ ɡú tɛꞋ, tɛ wɛ ŋkɑ́mbi ŋkɑɑ pɔ́ yɛcɔ́ yúu pɔ́.

¹¹ Ɛ́ zɛɛ ḿbɔ́ yi yúu mi ɛ́ ŋ́kɑɑ ńdɑ́Ꞌ ńjúk ḿbɔ́ pɔ́ ɡú pɔ́, ɛ́ kɑ ɡẅɛɛ wɛ nɛŋwɑ́ŋɛ, mbɑ yúu mi ɛ́ ɡʉ ńdɑ́Ꞌ ńjúk ḿbɔ́ pɔ ɡú, ŋ́ɡɛ ŋ́kɛ́ ŋ́ɡẅɛɛ nɛŋwɑ́ŋɛ ɛ́ lɛɛ yîyɑ́.

¹² Pɑ́Ꞌ pɛk sɛ́ ńniitɛ ńjí ŋɡɔ mɔnɛ mɛnu nɛ́nẅín lɑ́, pɛk sɑ́ɑnɛ sɑ́ɑnɛ́nɛ ńcú nu nǔu.

¹³ Pɛk kɑ́ pɔ́ ŋ́ɡɛ pɑ́Ꞌ Mɔ̌sɛ̂ɛ ẅí ɑ ḿbɔ́nɛ ńtɔꞋ ŋkwɑ́ nǔu shʉ́ wɛ́ ńdɔk ḿbɔ́k vuvuk ẅi ɛ́ ŋ́kɑɑ ḿbɔ́ ŋ́ɡʉ ńnɑ́ŋ pɔ́, nɛɡɔ́ ḿmɛ pʉɔ-Íslɑyɛ̂l pɔ́ ńjʉ́ɔ pɔ́.

¹⁴ Lɑ, ɛ́ kɑ zɛɛ ŋ́ɡɔ ḿbɔ́, mbɔ jínu yɔ́p kɑ jʉ́ɔꞋnɛ, ɛ́ kɑ jʉ́ɔꞋnɛ jɔ́Ꞌnɛ́nɛ tɛ ŋ́kúu lɔ́Ꞌnɛ, mbíꞋŋɡɔ pɔ́p ḿbɔ́ ɛ́fúŋ ŋwɑꞋnɛ-Ndɛn Kɑɑ, ŋkwɑ́ ɛ̂yɑ́ pɛ́t ḿbɔ́ pɔ ɡú, ɛ́ pɛ́t ḿbɔ́ pɔ ɡú, mbíꞋŋɡɔ ŋu lɑɑ ḿbɛ́t kɛ́ lɑt mbʉʉ nǔu Kɛlístɔ, wîwɑ́ ŋkʉ pɛ́t ḿbɔ́ pɔ ɡú.

¹⁵ Tɛ ŋ́kúu lɔ́Ꞌnɛ pʉɔ-Íslɑyɛ̂l pɔ́ tɛ ḿbɔ́ ɛ́fúŋ mɛŋwɑꞋnɛ-Mɔ̌sɛ̂ɛ, yɛcɔ́ ŋkwɑ́ pɔɔ jínu yɔ́p.

¹⁶ Lɑ́ ŋu lɑɑ ḿbɔ́ tɛ ɛ́shɔt mbʉʉ ńdíŋɛ Tsɑpʉɔ, ŋkwɑ́ jɛ́pmɛ,

¹⁷ mbíꞋŋɡɔ Tsɑpʉɔ pɔ́ pɔ Zẅikŋɛ, zʉꞋ yi Zẅikŋɛ-Tsɑpʉɔ pɛn ḿbɔ́ zúꞋu lɑ́, yɛcɔ́ yúu mi ḿbɔ́ ɛ́ tɑ́ɑtɛ ŋu, pɔɔ pɛn ḿbɔ́ zúꞋu pɔ́.

¹⁸ Pɛkŋɛ pɛtsʉʉ kɑ́ pɛn ŋ́ɡẅɛɛ yɛcɔ́ ŋkwɑ́ nǔu shʉ́ wɛkŋɛ pɔ́, nɛŋwɑ́ŋɛ Tsɑpʉɔ sɛ́ ńtɛ́mɛ nǔu pɛkŋɛ ḿbɛn nzʉʉ pɑ́Ꞌ kyɛꞌ yi ɛ́ tɛ́mɛ́nɛ nǔu jʉ́ɔ shʉ́ lɑ́. Tsɑpʉɔ ẅi ɑ pɔ́ pɔ Zẅikŋɛ, ɑ sɛ́ ŋ́ɡɛ pɛkŋɛ kúpmɛ ntɛ́, ŋ́ɡɛ pɛkŋɛ fí wɛ́, nɛŋwɑ́ŋɛ ẅi ɛ́ nǔu pɛkŋɛ, pɛn ḿbɔ́ ŋ́kẅiꞋ kẅiꞋnɛ.