2 Kɔlɛ̂ŋtɛ 2 - Kɑɑ Fí

¹ Pʉʉ zúꞋ yúu mi ɛ́ kɑ ɡɛnɛ n jʉ́ɔ ŋɡɔ ŋ kɛ́ pɛn ḿbɛn lɑ́Ꞌ pʉʉ, ŋ́ɡɛ pʉʉ pɛn ḿmʉk pɔ́,

² mbíꞋŋɡɔ n dɑɑ ŋ́ɡɛ pʉʉ mʉk, mbɔ pɛ́ wɔ̌ ɡʉ ḿbɛn ŋ́ɡɛ tʉ́m yɑ́ɑ tsɑ́ɑtɛ tɛ ɛ́ pɔɔ pɔ́ wʉ́ʉ ẅi n zɛɛ ŋ́ɡɛ pʉʉ mʉk pɔ́ ɔɔ?

³ Ɛ́ yúu mi ɛ́ kɑ ɡɛnɛ ŋ ŋwɑꞋnɛ pɔ ŋwɑꞋnɛ ŋ́ɡɑ́ mbɔ̌ pʉʉ, nǔu ntɛ́ yi ŋ kɑ ŋwɑꞋnɛ́nɛ lɑ́, mɔ ŋ́kɑɑ ḿbɔ́ ŋ́kɔŋ nɛɡɔ́ ńtɔ́ lɑ́Ꞌ pʉʉ, ńjʉ́ɔ pʉɔ pɔ́p ɡɛ ŋ ɡẅɛɛ nɛmʉk lɑ́ mbɔ pɔ́p ḿbɔ́ ŋ́ɡʉ ŋ́ɡɛ tʉ́m yɑ́ɑ tsɑ́ɑtɛ tsɑ́ɑtɛ́nɛ pɔ́. Mɔ sɛ́ ńjí sʉ́Ꞌnɛ ŋɡɔ n dɑɑ ḿbɔ́ ńtsɑ́ɑtɛ, mbɔ pʉʉ ɡʉ ńtsɑ́ɑtɛ yʉ́ʉ.

⁴ Ŋ kɑ pɔ́ ŋ́ŋwɑꞋnɛ ŋwɑꞋnɛ ɛ̂yɑ́, ńdɔk pɔ ŋki-mík, tʉ́m yɑ́ɑ pɔ́ ńzɑ́ŋ tɛꞋ, mbʉʉ yɑɑ pɔ́ ńcitɛ, lɑ́ mɔ ŋ́kɑɑ ŋ́kɛ́ ḿbɔ́ ŋ́ŋwɑꞋnɛ ńdɔk ŋ́ɡɛ ŋɡɔ pʉʉ mʉk pɔ́. Ŋ kɑ pɔ́ ŋ́ŋwɑꞋnɛ pɔ́Ꞌɔ, pɔ nɛlɔk ńnyɛt wʉ́ʉ nɛ mɑ́mɑ́ ŋkɔŋɛ yi ŋ ɡẅɛɛnɛ nzʉʉ pʉʉ.

Pʉʉ likŋɛ ŋ́ɡɑ́ mbɔ̌ pʉɔ pi pɔ́p ɡɛnɛ nu kɛpɔŋ nǔu pʉʉ

⁵ Ɛ́ ɡʉ nǔu ŋu ẅi ɑ kɑ ɡɛnɛ pʉʉ nɑ́ŋ nɛ́ nɛmʉk, mbɔ ɑ ŋ́kɑɑ ḿbɔ́ ŋ́ɡɛ pɔ nǔu mɔ pɔ́, ɑ kɑ ɡɛ pɔ nǔu pʉʉ pɛtsʉʉ. Líkcɔ́ ɛ́ ŋ́kɑɑ ḿbɔ́ nǔu pʉʉ pɛtsʉʉ pɔ́, lɑ́ ɛ́ kɑ kɛ́ ḿbɔ́ nǔu nɛzɑ́ɑ pʉɔ.

⁶ Nɛzɑ́ɑ pʉɔ kɛ́ ŋ́kɑkŋɛ wɛ́, ɛ́ kuꞋ pɔ́Ꞌɔ.

⁷ Lɑ́ ɛ́ sɛ́ ḿbíkŋɛ ŋkɔ̂ɔnɛ pɔ ŋɡɔ pʉʉ likŋɛ ŋ́ɡɑ́ mbɔ̌ wɛ́, ńtɔ́ɔtɛ wɛ́, ḿbɔ́k pɑ́Ꞌ ɛ́ lɑɑ ḿbɔ́ ɑ mʉk sɛ́sʉ́ʉ, ŋ́kɑ́ɑ.

⁸ Pɔ́Ꞌɔ lɑ́, mɔ sɛ́ ńtsɑ́ɑ ŋɡɔ pʉʉ ɡɛ nǔu ntɛ́ yi ɑ ɡʉ ńjí ŋɡɔ pʉʉ pɛ́t ŋ́kɔŋ wɛ́ kɔŋnɛ.

⁹ Pʉʉ jí ŋɡɔ ŋ kɑ pɛn ŋ́ɡɔ ŋ́ŋwɑꞋnɛ ŋwɑꞋnɛ mbɔ̌ pʉʉ ḿbɔ́ ńdɔɔ nɛkwɑꞋnɛ wʉ́ʉ ńjʉ́ɔ, kɛ pʉʉ kuꞋ nɛzúꞋ ntsu nǔu mɛnu tsʉʉ ɔɔ.

¹⁰ Pʉʉ lɑɑ ńdikŋɛ mɛfɑɑnɛ-ŋu, ŋ́ɡɑ́ mbɔ̌ wɛ́, mbɔ mɔ ńdikŋɛ yɑ́ɑ ŋ́ɡɑ́ mbɔ̌ ŋɡɑŋ, ḿbɔ́ yi n dɑɑ ŋ́ɡẅɛɛ nɛlikŋɛ mɛfɑɑnɛ-ŋu, ńdikŋɛ, mbɔ n tʉ́ʉ mbi Kɛlístɔ ńdikŋɛ pɔ nɛlɔk ńcẅɛ́lɛ wʉ́ʉ,

¹¹ ńjí ŋɡɔ pɛkŋɛ kɛ́ nɑ́ Sɑ́ttɑ ɑ lɛɛ wɛkŋɛ pɔ́, mbíꞋŋɡɔ pɛkŋɛ kɑ́ pɔ́ ḿmuŋɛ yúu mi ɑ nzʉʉ pɛkŋɛ ńdɔɔ pɔ́.

Pɔ̂l kúu Tɔ̂lɑ́s mbʉʉ yɛ́ pɔ́ ńcitɛ

¹² Ɛ́ ɡʉ nǔu wɑɑ nɛnɛn ɛ̂wɑ́, mbɔ ŋ kɑ kúu tʉ́sɔŋ-Tɔ̂lɑ́s nɛcẅi Ŋkʉʉ Sʉ́Ꞌnɛ-Kɛlístɔ zúꞋu, Tsɑpʉɔ tsɔ́Ꞌ sɛ̂ndúŋ mbɔ̌ mɔ nɛfɑꞋ fɑꞋ yɛ́,

¹³ lɑ́Ꞌ, mbʉʉ yɑɑ kɛ́ ńcitɛ citɛ́nɛ, mbíꞋŋɡɔ mɔ ŋkɑɑ mɔ́ɔmɑ́ wɛkŋɛ Titɛus zúꞋu jʉ́ɔ. Ɛ́ yúu mi ɛ́ kɑ ɡɛnɛ n dɛɛmɛ pʉɔ-Tɔ̂lɑ́s ŋ́ɡʉ nɛ́ Mɑsɛndwɑn nɛlɔɔ wɛ́.

Nɛlɔk lík-Yɛ́su Kɛlístɔ ńjʉ́ ntsɔ

¹⁴ Lɑ́, pɛk ɡʉ ŋ́kɛ́ ŋ́ɡɑ́ pɔ pɑ́Ꞌlɑ́ mbɔ̌ Sɛ́, mbíꞋŋɡɔ pɛk lɑɑ ḿbɔ́ pɔ ɡɔ́ lɑ́, mbɔ ɑ ɡʉ ŋ́ɡɛ pɛk pɔ́ pɔ nǔu mɑ́nzɔŋ-Kɛlístɔ, mbɔ jʉ́ Kɛlístɔ jʉ́ ntsɔ. Jʉ́ Sɛ́ lɔk wɛ́k ŋ́ɡɛ pɛ́ jí Kɛlístɔ zʉꞋ tsʉʉ, pɑ́Ꞌ yúu mi pɛ́ tɔɔnɛ, jɑ́k kɔ́Ꞌ ɛ́sɑt zʉꞋ tsʉʉ lɑ́.

¹⁵ Pɛk zɛɛ ḿbɔ́ mbɔ̌ Sɛ́ ḿbɔ́ pɔ pɑ́Ꞌ jɑ́k yúu sʉ́Ꞌnɛ yi ɛ́ fúnɛ mbɔ̌ Kɛlístɔ. Jɑ́k yi ɛ́ kɔ́Ꞌnɛ ńtɛ́mɛ mɛlẅí-pʉɔ, mɛlẅí pʉɔ pi pɔ́p sɛ́ ńduk, tɛ mbɑ nǔu mɛ́ pʉɔ pi pɔ́p sɛ́ ḿbɛ́.

¹⁶ Yîyɑ́ jɑ́k ɛ́ mbɔ́ pʉɔ pi pɔ́p sɛ́ ḿbɛ́ ḿbɔ́ jɑ́k nɛvú ni ɛ́ ɡɑ́nɛ nɛvú, mbɔ̌ pʉɔ pi pɔ́p sɛ́ ńduk, ḿbɔ́ jɑ́k luk yi ɛ́ ɡɛnɛ pɛ́ pɔ́ ɡú, tɛ ɛ́ pɑ́Ꞌɑ, ḿbɔ́ wɔ̌ kuꞋ nɛpɔ́ yúu mi pɛ́ ɡʉ ńdɔk ɛ́fɑꞋ yɔ fɑꞋ?

¹⁷ Lɑ́Ꞌ pɛk kɑ pɔ́ pɑ́Ꞌ pɛcɔ́ pʉɔ tɛ ńzɑ́ɑ pi pɔ́p lɔknɛ sẅiŋɛ-sɛ́ ŋ́ɡɛ yɔ́p yúu mɛntɑ́ɑ pɔ́, pɛk ɛ́sẅíi yɛ́k pɔ nɛ́ tʉ́m Lɛ́ɛnɛ́nɛ, ḿbɔ́ pɔ pʉɔ pi Sɛ́ kɑ túunɛ. Pɛk pɔ́ ɛ́sẅíi, Sɛ́ pɔ́ ńjʉ́ɔ wɛ́k pɛk pɛn ńdɑt mbʉʉ nǔu Kɛlístɔ.