1 Jɑ̂ŋ 2 - Kɑɑ Fí

¹ Mbɔ́ŋkʉ̈ɔ́ pɑ́ɑ, ŋ ŋwɑꞋnɛ mɔnɛ mɛnu nɛpɔ́ yi pʉʉ ɡʉ ŋ́ɡẅɛɛ shʉ́ tɛ mbɔɔ ɡɛ nu kɛpɔŋ pɔ́. Lɑ́ ḿbɔ́ yi ŋu lɑɑ ŋ́ɡɛ nu kɛpɔŋ, mbɔ pɛkŋɛ ɡẅɛɛ wɛkŋɛ ŋu nɛjɔ́ŋ Tɑ̌ɑ, ɑ pɔ́ Yɛ́su Kɛlístɔ, jʉ́ ẅi ɑ ndʉ́ŋndʉŋ mbi Sɛ́.

² A kɑ zɛɛ ńdɔk tú yɛ́, ńnɔŋ pɔꞋ pɑ́Ꞌ ɛ́ lɑɑ ḿbɔ́ Sɛ́ likŋɛ mɛnu kɛpɔŋ mɛkŋɛ. Pɑ́Ꞌ ɛ́ lɑɑ ḿbɔ́ ɑ pɔɔ likŋɛ pɔ ndɑꞋ mɛkŋɛ pɔ́, pɑ́Ꞌ mbɔ ɑ pɛn ńdikŋɛ mɛ́ pʉɔmɛsɔŋ tsʉʉ ndǔmbí.

³ Pɛkŋɛ lɑɑ ŋ́ɡɛ yúu mi Sɛ́ sɛ́ ńcú mbɔ̌ pɛkŋɛ, mbɔ ẅîwɑ́ nɛpɔ́ ɡʉ ńnyɛt wɛkŋɛ ŋɡɔ pɛkŋɛ jí Sɛ́.

⁴ Ŋu ẅí ɑ cúnɛ ŋɡɔ: «N jí wɛ́» Lɑ́ ŋ́kɛ́ ḿbɔɔ mbʉ́ʉ mɛ́ kúꞋlɛ, mbɔ ŋɡɑŋ ncɔtnu, nu nɛ́nẅín yi ɛ́ fúnɛ mbɔ̌ Sɛ́ lɔk ḿbɔɔ ḿbɔ́ tsɛt tʉ́m-ŋɡɑŋ pɔ́.

⁵ Lɑ́ ŋu ẅí ɑ kúꞋlɛ́nɛ sẅiŋɛ-Sɛ́, ɑ ŋu ẅí ɑ tsuŋ ŋ́kɔŋ Sɛ́ tɛ ɛ́sẅíi nu. Yɔ pɑ́Ꞌ pɛkŋɛ lɔknɛ ńjí ŋɡɔ pɛkŋɛ pɛ Sɛ́ kɑ tɛmtɛ.

⁶ Ŋu lɑɑ ńcú ŋɡɔ: Pɛk Sɛ́ kɑ tɛmtɛ, ɛ́ píkŋɛ ŋɡɔ ŋɡɛnɛ mɛnu mɛ́ pɔ́ pɑ́Ꞌ mɛ́ Yɛ́su Kɛlístɔ kɑ pɔ́nɛ pɔ́Ꞌɔ.

Nɛpʉ́ʉ fí

⁷ Pɛsúu pɑ́ɑ pɛ́ tʉʉndɛn, yɔ kɑ́ pɔ́ pɔ nɛpʉ́ʉ fí ni ŋ ŋwɑꞋnɛ́nɛ ŋkɔ̂ɔnɛ ŋ́ɡɑ́ mbɔ̌ pʉʉ pɔ́, ɛ́ pɔ́ pɔ ndwɛn nɛpʉ́ʉ ni pʉʉ sɛ́ ńjí tɛ ɛ́fú nzɛnɛ, nînɑ́ ndwɛn nɛpʉ́ʉ pɔ́ pɔ sẅiŋɛ yi pʉʉ kɑ zúꞋnɛ.

⁸ Tɛ mbɑ pɔ́Ꞌɔ, nɛpʉ́ʉ ni ŋ ŋwɑꞋnɛ́nɛ ŋ́ɡɑ́ mbɔ̌ pʉʉ lɑɑ, ɛ́ pɑ́Ꞌɑ, ŋ́kɛ́ ḿbɔ́ nɛ fí, ɛ́ nɛ fí ńdɛɛ nǔu yúu mi pɛ́ sɛ́ ńjʉ́ɔ nǔu Kɛlístɔ mbɑ nǔu pʉʉ ɡúu. Pʉʉ zɛɛ ńjʉ́ɔ pɑ́Ꞌ nzɛ́nzʉ́ʉ sɛ́ ḿmɛ, lɑ́ mbɔ kwɑꞋ kyɛꞌ zɛ mɔ́ nɛkyɛ́Ꞌ zʉꞋ.

⁹ Ŋu ẅí ɑ cúnɛ ŋɡɔ ŋɡɛnɛ mɛnu mɛ́ ɛ́ mɛ́ zʉꞋ fúknɛ, ḿbɛn ḿbɔ́ ḿbɑɑ mɔ́ɔmɑ́ wɛ, ŋɡɑŋ lɔk ḿbɛ́t ḿbɔ́ pɔ tsɛt nzɛ́nzʉ́ʉ.

¹⁰ Ŋu ẅí ɑ kɔŋnɛ mɔ́ɔmɑ́ wɛ, ɑ ŋu ẅí ŋɡɛnɛ mɛnu mɛ́ mɛ́ zʉꞋ-fúknɛ. Mbɔ ɑ pɔɔ kɔɔtɛ nǔu yɛcɔ́ yúu ḿvu sɛ́ pɔ́.

¹¹ Lɑ́ ŋu ẅí ɑ pɑɑnɛ mɔ́ɔmɑ́ wɛ, ɑ ŋu ẅí ŋɡɛnɛ mɛnu mɛ́ tsɛt nzɛ́nzʉ́ʉ, ɑ nɛn pɔ tsɛt nzɛ́nzʉ́ʉ, ŋ́kɛ́ ḿbɔɔ ḿbɔ́ ńjí zʉꞋ yi ɑ ɡʉnɛ nɛ́ zúꞋu pɔ́, mbíꞋŋɡɔ nzɛ́nzʉ́ʉ kɑ ɡɛ mɔ́ ɑ fʉ.

¹² Mbɔ́ŋkʉ̈ɔ́ pɑ́ɑ, mɔ tsɛt yɔ ŋwɑꞋnɛ, ḿbɔ́ ɛ́sẅíi wʉ́ʉ ŋɡɔ Sɛ́ lɛɛ nǔu yúu mi Yɛ́su Kɛlístɔ kɑ ɡɛnɛ, ńdikŋɛ mɛnu kɛpɔŋ mʉ́ʉ ŋ́ɡɑ́ mbɔ̌ pʉʉ.

¹³ Mɔ sɛ́ ɛ́sẅíi wʉ́ʉ pɛlʉ́m ŋɡɔ: Pʉʉ pɛꞋnɛ ḿbɔ́ ńjí ŋu ẅí ɑ ɡú tɛ ɛ́fúnɛ nzɛnɛ, ḿbɔ́ ɛ́sẅíi wʉ́ʉ pɔ́ɔsuu ŋɡɔ pʉʉ kɑ kɛ́ ńtɛn ńdɛɛ ŋu kɛpɔŋ.

¹⁴ Mbɔ́ŋkʉ̈ɔ́ pɑ́ɑ, mɔ pɑ́Ꞌɑ ḿbɔ́ ŋ́ŋwɑꞋnɛ ɛ́sẅíi wʉ́ʉ ŋɡɔ pʉʉ sɛ́ ńjí Tɑ́t wɛkŋɛ, ŋ́ɡʉ nǔu pʉʉ pɛlʉ́m, mbɔ mɔ pɑ́Ꞌɑ ḿbɔ́ ɛ́sẅíi wʉ́ʉ ŋɡɔ pʉʉ sɛ́ ńjí ŋu ẅí ɑ ɡú tɛ ɛ́fú nzɛnɛ, ŋ́ɡʉ nǔu pʉʉ pɔ́ɔsuu, mɔ sɛ́ ɛ́sẅíi wʉ́ʉ ŋɡɔ, pʉʉ pɔ́ ńtɛntɛ tɛntɛnɛ, sẅiŋɛ-sɛ́ kɛ́ ḿbɔ́ pɔ tʉ́m pʉʉ, pʉʉ pɔ ńtɛn ńdɛɛ ŋu kɛpɔŋ.

¹⁵ Kɔɔ pʉʉ tík mík mʉ́ʉ nǔu ndǔmbí, kɔɔ pʉʉ tík mík nǔu yúu mi ɛ́ ndǔmbí. Ŋu lɑɑ ŋ́kɔŋ ndǔmbí, mbɔ ɑ kɑ́ pɔ́ ŋ́kɔŋ Sɛ́ Tɑ́t pɔ́,

¹⁶ mbíꞋŋɡɔ mbɑ kʉ̈ɔ́ lɑ́ yi ɛ́ ndǔmbí, pɑ́Ꞌ yúu mi mbʉʉ-ŋu tsʉ́ʉnɛ́nɛ wɛ́ ɑ tsɑ́ɑ, pɑ́Ꞌ yúu mi ŋu zɑ́pnɛ lík yɛ́ nǔu ńtsɑ́ɑ nɛɡẅɛɛ, mbɑ yúu mi pʉɔmɛsɔŋ lɔknɛ ŋ́ŋɑ́Ꞌtɛ, mîmɑ́ mɛyúu kɑ́ pɔ́ ɛ́fú mbɔ̌ Tɑ́t wɛkŋɛ pɔ́, ɛ́ ɛ́fú pɔ ndǔmbí.

¹⁷ Ndǔmbí zɛɛ ḿbɔ́ ńdɛɛ lɛɛnɛ, tɛ mbɑ yúu mi pʉɔmɛsɔŋ sɛ́ ńjʉ́ɔ ndǔmbí ńtsɑ́ɑ nɛɡẅɛɛ. Lɑ́ ŋu ẅí ɑ ɡɛnɛ yúu mi Sɛ́ sɛ́ ŋ́kɔŋ, ɑ ɡʉ ḿbɔ́ pɔ ɡú ŋkɑ́ tsʉʉ.

Ŋɡɑŋmbuu-Kɛlístɔ

¹⁸ Mbɔ́ŋkʉ̈ɔ́ pɑ́ɑ, ndẅiknzʉʉ ŋkɑ́ sɛ́ ŋ́kuꞋ. Pʉʉ kɑ zúꞋ pɛ́ cú ŋɡɔ, ŋɡɑŋmbuu-Kɛlístɔ ɡʉ ńdɑ́Ꞌ ńtɔ́. Ɛ́ ŋkɔ̂ɔnɛ, mbɔ ɡɑŋmbuu-Kɛlístɔ tɔ́ tɛ ńzɑ́ɑ zɑ́ɑnɛ. Ɛ́ yúu mi ɛ́ ɡɛnɛ pɛkŋɛ jí ŋɡɔ ndẅiknzʉʉ ŋkɑ́ sɛ́ ŋ́kuꞋ.

¹⁹ Gɑŋmbuu fú pɔ tsɛt cúꞋlɛ yɛkŋɛ ńcẅɛt ŋ́ɡʉ. Pɔ́p kɑ zɛɛ mbɔɔ pʉɔ pɛkŋɛ pɔ́. Pɔ́p kɑ pɔ́ pɛ́Ꞌnɛ ḿbɔ́ pʉɔ pɛkŋɛ, mbɔ pɔ́p kɑ ɡɔ́ŋ tsɛtsɛt pɛkŋɛ. Lɑ́, ɛ́ kɑ kɛ́ ḿbɔŋ ŋɡɔ ɛ́ cẅɛt pɔ pɔ́Ꞌɔ nǔu pɔ́p, mbɑ wɔ̌ lɑ́ jʉ́ɔ ŋɡɔ pɔ́p ŋ́kɑɑ pɔ́ pʉɔ pɛkŋɛ pɔ́,

²⁰ ŋ́ɡʉ nǔu pʉʉ, mbɔ Kɛlístɔ kɑ ɡɑ́ Zẅikŋɛ Lɛ́ɛnɛ́nɛ mbɔ̌ pʉʉ. Ɛ́ yúu mi ɛ́ ɡɛnɛ pʉʉ pɛtsʉʉ jí nu nɛ́nẅín.

²¹ Ŋ kɑ ɡɔ́ ŋwɑꞋnɛ ŋwɑꞋnɛ ŋ́ɡɑ́ mbɔ̌ pʉʉ mbɔɔ ńdɔk ńcú ŋɡɔ pʉʉ kɑ́ pɔ́ ńjí nu nɛ́nẅín pɔ́ pɔ́. Ɛ́ pɔ́ pɔ nu yi pʉʉ sɛ́ ńjí. Pʉʉ pɛn ḿbɔ́ ńjí ŋɡɔ, mbɔ yɛcɔ́ cɔtnu pɔɔ tsɛt nu nɛ́nẅín cẅɛt.

²² Ŋɡɑŋ cɔtnu wɔ̌? A kɑ́ pɔ́ pɔ ŋu ẅí ɑ cúnɛ ŋɡɔ Yɛ́su kɑ́ pɔ́ Nzɑ́Ꞌŋkʉ pɔ́ pɔɔ? A ŋɡɑŋmbuu-Kɛlístɔ, ḿbɔ́ ŋu ẅí ɑ ɡɔ́ ńdʉꞋnɛ nu-Tɑ̌ɑ, ńdʉꞋ mbɑ nu-Mɔ́ɔ.

²³ Ŋu lɑɑ ńdʉꞋ nɛpɛ́m nu-Mɔ́ɔ, mbɔ ɑ lʉꞋ nɛpɛ́m nu-Tɑ̌ɑ wɛkŋɛ, ŋu ẅí ɑ pɛ́mnɛ nu-Mɔ́ɔ, ɑ pɛn ḿbɛ́m yɛ́ Tɑ̌ɑ wɛkŋɛ.

²⁴ Ɛ́ yúu mi ɛ́ ɡɛnɛ n cú mbɔ̌ pʉʉ ŋɡɔ pʉʉ kúꞋlɛ sẅiŋɛ yi pʉʉ kɑ zúꞋnɛ tɛ ɛ́fú nzɛnɛ kwɑꞋ sʉ́Ꞌnɛ. Sẅiŋɛ yi pʉʉ kɑ zúꞋnɛ tɛ ɛ́fú nzɛnɛ lɑɑ ḿbɔ́ tsɛt tʉ́m pʉʉ, mbɔ pʉʉ yʉ́ʉ ɡʉ ńtɛmtɛ nǔu Mɔ́ɔ mbɑ nǔu Tɑ́t.

²⁵ Kɛlístɔ kɑ kɑꞋ mbɔ̌ pɛkŋɛ ŋɡɔ, pɛkŋɛ pɛ Sɛ́ ɡʉ ńdɑ́Ꞌ ḿbɔ́ pɔ ŋkɑ́ tsʉʉ.

²⁶ Yɔ yúu mi n dɑ́Ꞌ ḿbɔ́ ńdɔɔ nɛsẅíi wʉ́ʉ, mbíꞋ pʉɔ pi pɔ́p lɔɔnɛ nɛfúklɛ wʉ́ʉ pʉʉ fɑɑnɛ sɛ̂ndúŋ,

²⁷ ŋ́ɡʉ nǔu pʉʉ, mbɔ Kɛlístɔ kɑ ɡɑ́ Zẅikŋɛ yɛ́ mbɔ̌ pʉʉ. Yîyɑ́ Zẅikŋɛ pɛn ŋ́kɛ́ ḿbɔ́ pɔ nǔu pʉʉ, ɛ́ yúu mi ɛ́ ɡɛnɛ, ɛ́ kɑ́ pɔ́ ḿbíkŋɛ ŋɡɔ ŋumɛsɔŋ zíꞋ wʉ́ʉ nɛ́ yúu pɔ́, mbíꞋŋɡɔ Zẅikŋɛ Lɛ́ɛnɛ́nɛ sɛ́ ńzíꞋ wʉ́ʉ nɛ́ mbɑ kʉ̈ɔ́ lɑ́, yúu mi ɛ́ lɛ́Ꞌlɛ́nɛ pɛn ḿbɔ́ nɛ́nẅín, ɛ́ kɑ́ pɔ́ cɔtnu pɔ́. Pɔ́Ꞌɔ lɑ́, pʉʉ kɛ́ ńdɑt pɔ mbʉʉ yʉʉ nǔu Kɛlístɔ pɑ́Ꞌ Zẅikŋɛ Lɛ́ɛnɛ́nɛ kɑ zíꞋnɛ wʉ́ʉ lɑ́.

²⁸ Pɑ́Ꞌ ɛ́ pɔ́Ꞌɔ lɑ́, mbɑ̌ɑ mbɔ́ŋkʉ̈ɔ́ pɑ́ɑ, pʉʉ kɛ́ ńdɑt mbʉʉ yʉʉ pɔ nǔu Kɛlístɔ, ńjí ŋɡɔ ɛ́ ɡʉ ńdɑ́Ꞌ lɛ́Ꞌ yi ɑ cẅɛtnɛ, pɛkŋɛ pɔɔ yɛcɔ́ yúu pɔ́k, tʉ́m yɛkŋɛ pɔɔ sii ńcʉ̈ɔꞋ nǔu yɛcɔ́ yúu pɔ́. Ɛ́ pɔ́ lɛ́Ꞌ ɛ̂yɑ́, pɛkŋɛ pɔɔ tʉ́ʉ mbi yɛ́ sʉ́ʉ kɔ́ wɛkŋɛ pɔ́.

²⁹ Pʉʉ sɛ́ ńjí ŋɡɔ Kɛlístɔ ɡɛ yúu mi ɛ́ ndʉ́ŋndʉŋ mbi Sɛ́, pɔ́Ꞌɔ lɑ́ pʉʉ pɛn ńjí ŋɡɔ ŋu lɑɑ ŋ́ɡɛ yúu mi ɛ́ ndʉ́ŋndʉŋ mbi Sɛ́, mbɔ ɑ ɡʉ ńtsʉ́Ꞌ mɔ́ɔ-Sɛ́.