1 Timɔtɛ́ɛ 2 - Kɑɑ Fí

¹ Pɔ́Ꞌɔ lɑ́, mɔ ŋ́ɡɛ ŋ́ɡɔ ḿbɛn ńcú nu, ḿbiitɛ ńcú ŋɡɔ ɛ́ sɛ́ ḿbíkŋɛ ŋɡɔ pʉɔ-Sɛ́ pɔ́ ńcɛꞋlɛ wɛ́ nǔu tú pʉɔ tsʉʉ, ḿbɔ́ ńdɔ́ɔ mbɔ̌ wɛ́ ŋɡɔ ɑ cẅɛ́lɛ́ mbɑ wɔ̌lɑ́, ḿbɔ́ ḿbúꞋ mbɔ́ mbɔ̌ wɛ́, ḿbɔ́ ŋ́ɡɛ́mtɛ wɛ́ nǔu tú mbɑ wɔ̌lɑ́.

² Pɛ́ sɛ́ ḿbúꞋ mbɔ́ mbɔ̌ Sɛ́ nǔu tú-pɛfɔɔ, tɛ mbɑ nǔu tú pɛcɔ́ pʉɔ pi pɔ́p sɑ́Ꞌnɛ lɑ́Ꞌ. Nɛpɔ́ yi pɛkŋɛ ɡʉ ńnɑ́ŋ sʉ́Ꞌnɛ, lɑ́Ꞌ yɛkŋɛ pɔ́ lɑ́Ꞌ mbɔ́tnɛ. Pɛkŋɛ pɔ́ pʉɔ pi pɔ́p ɡɛnɛ yúu mi ɛ́ pɔŋnɛ Sɛ́, ŋ́ɡẅɛɛ tsẅɛ́ ẅi ɛ́ ɡẅɛɛnɛ mɛkuꞋ.

³ NɛcɛꞋlɛ Sɛ́ nǔu tú-pʉɔ pɔŋ, ḿbɔ́ yúu mi ɛ́ pɔŋnɛ Sɛ́ ẅí ɑ ɡɛnɛ pɛkŋɛ luk.

⁴ Jʉ́ ẅí ɑ sɛ́ ŋ́kɔŋ ŋɡɔ pʉɔmɛsɔŋ tsʉʉ luk, ḿbɛn ńjí nu nɛ́nẅín.

⁵ Sɛ́ zɛɛ ḿbɔ́ pɔ wɛ́mɔ́Ꞌ. Nɛnkɛ́m pɔ́ pɔ wɛ́mɔ́Ꞌ tsɛtsɛt Sɛ́ pɔ́p pʉɔmɛsɔŋ. A Yɛ́su Kɛlístɔ, ḿbɔ́ yɛ́ ŋumɛsɔŋ.

⁶ KwɑꞋ Jʉ́ kɑ ɡɑ́nɛ tú yɛ́ ńdɔk ńtsúꞋ pʉɔ pɛtsʉʉ mbɔ̌ nɛvú, ńdɔk pɔ́Ꞌɔ, ńnyɛt nǔu ŋkɑ́ yi Sɛ́ kɑ zɑ́pnɛ ŋɡɔ jʉ́ Sɛ́ sɛ́ ŋ́kɔŋ ŋɡɔ pʉɔmɛsɔŋ tsʉʉ luk.

⁷ Sɛ́ kɑ zɑ́pnɛ wɑ́ɑ ŋɡɔ m bɔ́ Ncẅiŋkʉʉ wɛ, ḿbɔ́ ŋɡɑŋntúu-Yɛ́su nɛcú yîyɑ́ nu. A kɑ ɡɑ́ mbɔ̌ mɔ ŋɡɔ n zíꞋ pʉɔ pi pɔ́p kɑ́ pɔ́ pɑyúdɑ pɔ́, nɛzɑ́p tʉ́m nǔu Kɛlístɔ, mbɑ nɛjí nu yi ɛ́ nɛ́nẅín. Ɛ sẅíi nu nɛ́nẅín, ŋ kɑ́ pɔ́ ńcɔtnu pɔ́.

Ntɛ́ yi mɑŋɡɛ́ kɛ ŋu mbɛ́ɛnɛ ɔ́ɔ ɡẅɛɛ nɛlɔk ńnɑ́ŋ tsɛt cúꞋlɛ-pʉɔ-Kɛlístɔ pɔ́Ꞌɔ

⁸ Ɛ́ ɡʉ nǔu nu nɛcɛꞋlɛ Sɛ́ mɔ sɛ́ ŋ́kɔŋ ŋɡɔ mbɑ ɡɔ́ lɑ́ yi pʉɔ-Kɛlístɔ cúꞋlɛ́nɛ zúꞋu, mbɛ́ɛnɛ cɛꞋlɛ Sɛ́, ŋ́ɡɔ ńcɛꞋlɛ, ḿbɔ́ pʉɔ pi pɔ́p kɑ́ zɑ́p mbɔ́ nǔu yúu kɛpɔŋ lɑ ḿbɛn ŋ́kɑꞋ ŋ́ɡɑ́ tʉ́ ŋkɑ́ nɛcɛꞋlɛ Sɛ́ pɔ́. Pɔ́p pɛn ḿbɔ́ pʉɔ pi pɔ́p kɑ́ pɔ́ pɑzɑ́ŋlɔ́ŋ pɔ́, ŋ́kɛ́ mbɔɔ lɔɔ fɛꞋ pɔ́.

⁹ M bɛn ḿbɔ́ ŋ́kɔŋ ŋɡɔ pɑŋɡɛ́-cúꞋlɛ-pʉɔ-Kɛlístɔ, mɑꞋ mɛndẅí mi ɛ́ pɔŋnɛ, mɛndẅí mi ɛ́ kɑ́ pɔ́ pɔ yɛcɔ́ ntɛ́ pɔ́, mi ɛ́ pɔ́ pɔ mɛ́ pɑŋɡɛ́ pi mɛkuꞋ nǔu pɔ́p. Kɔɔ pɔ́p tsʉ́Ꞌ nɛkẅii mbʉʉ yɔp, ńniitɛ mɛnuk-tú mɔ́p pɔ nǔu yɛcɔ́ ntɛ́ yi ɛ́ shẅɛt shẅɛtnɛ. Kɛ ńzẅík pɔ yúu mi ɛ́ cʉ́ɔk pɔ ŋkɑ́p tɛꞋ ɔɔ, kɔɔ pɔ́p mɑꞋ mɛndẅí nɛlɔk ńnyɛt pɔ mbʉʉ.

¹⁰ Ɛ́ píkŋɛ ŋɡɔ pɔ́p lɔk pɔ mɑt wɔp ńnyɛt ŋɡɔ pɔ́p pɑŋɡɛ́ pi pɔ́p síinɛ. Ɛ́ pɑ́Ꞌ pɑŋɡɛ́ pi pɔ́p ɡɛnɛ yúu mi ɛ́ pɔŋnɛ Sɛ́ ɡẅɛɛnɛ nɛɡɛ.

¹¹ Pɑŋɡɛ́ lɑɑ ńnɑ́ŋ ńtɔ́ tsɛt cúlɛ-pʉɔ-Kɛlístɔ, pɔ́p pɔ́tnɛ ńnɑ́ŋ sɛ́, ńzẅíꞋlɛ yúu mi pɛ́ sɛ́ ńzíꞋ tɛ kɔɔ pɔ́p pɑ́klɛ́ zʉꞋ.

¹² Ŋ kɑ́ pɛ́m ŋɡɔ pɑŋɡɛ́ zíꞋ mbɛ́ɛnɛ nɛ yúu pɔ́. Pɔ́p pɛn ŋ́kɛ́ mbɔɔ ɡẅɛɛ nɛsɑ́Ꞌ mbɛ́ɛnɛ pɔ́. Pɔ́p ɡẅɛɛ pɔ nɛ pɔ́tnɛ ńnɑ́ŋ, ńjʉ́ɔꞋ ntsu wɔ́p.

¹³ Pʉʉ zɛɛ ńjí ŋɡɔ Sɛ́ kɑ piitɛ ḿbɔ́ɔ Ádɑm, lɑ mbɑ́ɑtɛ ḿbɔ́ɔ Ɛ̂vɛ.

¹⁴ Ádɑm ŋkɑɑnɛ pɛn ŋ́kɛ́ ḿbɛ́m pɛ́ fúklɛ wɛ́ pɔ́. Mɑŋɡɛ́ kɑ pɛ́mnɛ pɛ́ fúklɛ wɛ́, ɑ fɑɑnɛ nu mbɔ̌ Sɛ́.

¹⁵ Lɑ́, n cú pɑ́Ꞌnɛ, mɑŋɡɛ́ ɡʉ ńdɔk pɔ pɑ́Ꞌ ɑ ɡẅɛɛnɛ mbɔ́ŋkʉ̈ɔ́ lɑ ńduk. Lɑ́, ɛ́ píkŋɛ ŋɡɔ ɑ kɛ́ ńzɑ́p pɔ tʉ́m nǔu Sɛ́, ŋ́kɔŋ pʉɔmɛsɔŋ, ŋ́ɡẅɛɛ mbʉʉ yɛ́ nɛ́ mɛkuꞋ, ŋ́ɡɛ yúu mi ɛ́ pɔŋnɛ Sɛ́.