1 Tɛsɑlɔník 4 - Kɑɑ Fí

¹ Pɔ́ɔpɛ́mɑ́, nu yi pɛk ɡʉ ńdɔk ńdẅiklɛ ɛ́ pɔ́ pɔ ŋɡɔ pɛk kɑ sẅíi wʉ́ʉ nɛ́ ntɛ́ yi ɛ́ lɑɑ ḿbɔ́ pʉʉ lɔk ńnɑ́ŋ pɔ́Ꞌɔ, nu yʉ́ʉ pɔŋ Sɛ́. Ɛ́ ɡʉ ŋ́ɡɛ pɑ́Ꞌ lɑ́ pʉʉ pɔ́ ńnɑ́ŋ pɔ pɔ́Ꞌɔ. Lɑ́ pɛk pɛn ḿbɔ́ ḿbíkŋɛ mbɔ̌ pʉʉ, tɛ ḿbúꞋ pɔ mbɔ́ nǔu lík-Tsɑpʉɔ Yɛ́su ŋɡɔ, pʉʉ ɡɛ pɔ pɔ́Ꞌɔ, ńdɔk ŋ́ɡʉ nɛ́ mbi.

² Pʉʉ zɛɛ ḿbɔ́ ńjí yúu mi pɛk kɑ lɔknɛ lík-Tsɑpʉɔ Yɛ́su ńcú ŋɡɔ pʉʉ ɡɛ.

³ Yúu mi Sɛ́ sɛ́ ŋ́kɔŋ ɛ́ pɔ́ pɔ ŋɡɔ pʉʉ pɔ́ ndɛ́ɛnɛ lɛ́ɛnɛ́nɛ, kɔɔ mbɛ́ɛnɛ lɔɔ pɑŋɡɛ́, kɔɔ pɑŋɡɛ́ lɔɔ mbɛ́ɛnɛ,

⁴ ŋɡɔ mbɑ wɔ̌ lɑ́ tsɛtsɛt pʉʉ ɡuutɛ mbʉʉ yɛ nǔu ntɛ́ yi Sɛ́ sɛ́ ŋ́kɔŋ, nǔu ntɛ́ yi ɛ́ ɡẅɛɛnɛ mɛkuꞋ.

⁵ Tɛ ɑ pɔɔ pɛ́m kwɑŋɛ kɛpɔŋ ndǔmbí ɡúu pɑ́Ꞌ yi pʉɔ pi pɔ́p kɑ́ jí Sɛ́ pɔ́.

⁶ Lɑ́ ɛ́ ɡʉ nǔu nu-mɑŋɡɛ́, kɔɔ ŋu ɡɛ nu kɛpɔŋ nǔu mɔ́ɔmɑ́ wɛ, kɔɔ ɑ zɛɛ ɛ́fúklɛ wɛ́ mbɑ fúklɛ́nɛ, mbíꞋŋɡɔ Tsɑpʉɔ wɛkŋɛ ɡʉ ńdɑ́Ꞌ ńníꞋ ŋɡʉ̈ɔ́Ꞌ tú-pʉɔ pinɛ pɔ́p ɡɛnɛ pɔ́Ꞌɔ. Pɛk kɑ lɑ́Ꞌ ɛ́sẅíi wʉ́ʉ tɛ ńtsuŋ ɛ́sẅíi.

⁷ Sɛ́ kɑ zɛɛ mbɔɔ fúŋ wɛkŋɛ ŋɡɔ pɛkŋɛ ɡɛ mɛnu mi ɛ́ ɡẅɛɛnɛ ntsɛ́llɛ́ pɔ́, ɑ kɑ fúŋ wɛkŋɛ ŋɡɔ pɛkŋɛ ɡẅɛɛ pɔ mɑt ẅí ɛ́ wɛ pʉɔ pɛ́.

⁸ Pɔ́Ꞌɔ lɑ́, ŋu ẅí ɑ zúꞋnɛ yɔ nu ńdʉꞋ, ɑ kɑ́ pɔ́ ńdʉꞋ pɔ ŋumɛsɔŋ pɔ́, ɑ lʉꞋ pɔ́p Sɛ́ ẅi ɑ kɑ ɡɑ́nɛ zẅikŋɛ lɛ́ɛnɛ́nɛ yɛ́ mbɔ̌ pʉʉ.

⁹ Yɛcɔ́ yúu mi m bɔ́ ŋ́ŋwɑꞋnɛ ŋ́ɡɑ́ mbɔ̌ pʉʉ ntɛ́ ŋkɔŋɛ tsɛtsɛt pɔ́ɔpɛ́mɑ́ ɛ́ kɑ́ pɔ́ ɡú pɔ́, n cú mbíꞋŋɡɔ pʉʉ kɑ zíꞋ pɔ kwɑꞋ mbɔ̌ Sɛ́ nɛkɔŋ mɛmbʉʉ mʉ́ʉ.

¹⁰ Pʉʉ sɛ́ ḿbɛn ḿbɔ́ ŋ́kɔŋ pɔ́ɔpɛ́mɑ́ pi pɔ́p Mɑsɛndwɑn tsʉʉ. Pɔ́Ꞌɔ lɑ́, pɛk sɛ́ ńcú mbɔ̌ pʉʉ ŋɡɔ pʉʉ pɛn ŋ́kẅiꞋ ńdɔk ŋ́ɡʉ nɛ́ mbi.

¹¹ Pʉʉ sɑ́Ꞌ tʉʉ, ńnɑ́ŋ kɛ́ cʉ́ɔk tsɛtsɛt pʉʉ, ŋu wʉ́ʉ cú nu pɔ nǔu nu yí ɛ́ sɛ́ ńdíŋɛ wɛ́. Pʉʉ lɔk mɛlɑ́ɑ-mbɔ́ mʉ́ʉ ɛ́fɑꞋ lɑ ńjʉ́ pɑ́Ꞌ pɛk kɑ cúnɛ ŋɡɔ pʉʉ ɡɛ lɑ́,

¹² ńjí ŋɡɔ pʉɔ pi pɔ́p kɑ́ pɔ́ pʉɔ-Kɛlístɔ pɔ́, ɡʉ ńjʉ́ɔ pɔ́Ꞌɔ, ŋ́ɡʉ̈ɔꞋtɛ yʉʉ ntɛ́ nɛnɑ́ŋ. Pʉʉ pɛn ŋ́kɛ́ mbɔɔ tsʉ́Ꞌ piꞋ mbɔ̌ wɛcɔ́ ŋu pɔ́.

Nɛtɔ́ wɛ Tsɑpʉɔ

¹³ Pɔ́ɔpɛ́mɑ́, pɛk sɛ́ ŋ́kɔŋ ŋɡɔ pʉʉ jí nu nɛ́nẅín yi ɛ́ líŋɛ pɛpfú, nɛpɔ́ yi pʉʉ kɛ́ nɑ́ŋ tsɛt nɛmʉk pɑ́Ꞌ pɛcɔ́ pʉɔmɛsɔŋ pi pɔ́p kɑ́ pɔ́ ńzẅíꞋlɛ yɛcɔ́ yúu mbɔ̌ Sɛ́ pɔ́ pɔ́.

¹⁴ Pɛkŋɛ sɛ́ ḿbɛ́m ŋɡɔ Yɛ́su kɑ pfú ḿbɛn ńzẅíimɛ nǔu nɛvú. Pɛkŋɛ pɛn ḿbɔ́ ńjí ɡúu ŋɡɔ pʉɔ pi pɔ́p kɑ ɡɔ́ ḿpfú ḿbɔ́ ńzɑ́p tʉ́m nǔu Sɛ́, ɑ ɡʉ ńdɔk Yɛ́su ŋ́ɡɛ pɔ́p zẅíimɛ.

¹⁵ Pʉʉ zɛɛ ńzúꞋ yɔ nu yi pɛk ɡʉnɛ nɛcú, ɛ́ pɔ́ yɛcɔ́ tɑ́Ꞌ nu yi Tsɑpʉɔ kɑ sẅíinɛ wɛkŋɛ ŋɡɔ: Pʉɔ pɛkŋɛ pi Tsɑpʉɔ ɡʉ ńdɑ́Ꞌ ŋ́ɡɔ ńtɔ́, pɔ́p pɛ́t pɔ ntʉʉ kɛ́ ɡʉ ńdɑ́Ꞌ ńduŋmbi lɑ pʉɔ pi pɔ́p kɑ pfúnɛ pɑ́ɑtɛ pɔ́.

¹⁶ Ɛ́ ɡʉ ńdɑ́Ꞌ lɛ́Ꞌ ɛ̂yɑ́, pɛ́ zúꞋ yúu mi ɛ́ pʉ́nɛ, tɑ́tndɑ́-pɛcʉ̈ɔ́Ꞌ-Sɛ́ ɡʉ ńdɑ́Ꞌ ŋ́ɡɑ́ ŋɡi yɛ́ tʉ́ ńcú nu, pɛ́ ɡʉ ńzúꞋ ŋɡi-ntɑŋ-Sɛ́, kwɑꞋ Tsɑpʉɔ fú tʉ́nɛ́pú ḿpfúu, pʉɔ pi pɔ́p kɑ ɡɔ́ ḿpfú ḿbɔ́ ńzɑ́p tʉ́m nǔu wɛ́ piitɛ ńzẅíimɛ nǔu nɛvú.

¹⁷ Pɛkŋɛ pi pɛkŋɛ ɡʉ ńdɑ́Ꞌ ḿbɛ́t ntʉʉ, Sɛ́ pɑ́ɑtɛ ńtíi wɔ́p pɛpɔ́p nǔu mɛlɑ́ɑ, pɔ́p pɛpɔ́p pɛ́tsʉʉ ɡʉ ŋ́kẅɛ́ɛtɛ Tsɑpʉɔ wɛkŋɛ tʉ́. Pɛkŋɛ pɛ Tsɑpʉɔ lɑ́Ꞌnɛ ńtsʉ́Ꞌ ḿbɔ́.

¹⁸ Pɔ́Ꞌɔ lɑ́ pʉʉ nɑ́ŋ ńdɔk sẅiŋɛ yɔ, ɛ́shɔtnɛ ńtík mɛmbʉʉ mʉ́ʉ.