1 Tɛsɑlɔník 3 - Kɑɑ Fí

¹ Pɑ́Ꞌ nji yʉʉ kɑ pɔ́ ńzɑ́ŋ wɛ́k tɛꞋ lɑ́, pɛk ŋkɑɑ zúꞋ nɛpɛn ɛ́sʉk pɔ́. Ɛ́ yɛ́tɛ́ lɑ́ pɛk Sílɑs kɑ jʉ́ɔ ŋɡɔ pɛknɛ ɡʉ ḿbɔ́ ńnɑ́ŋ Atɛ̂n,

² ńtúu Timɔtɛ̂ɛ mbɔ̌ pʉʉ. Pʉʉ sɛ́ ńjí ŋɡɔ ɑ mɔ́ɔmɑ́ wɛkŋɛ ẅí pɛk pɛpɔ́p fɑꞋnɛ fɑꞋ-Sɛ́, ńnɛn ńcẅi Ŋkʉʉ sʉ́Ꞌnɛ-Kɛlístɔ. Pɛk kɑ túu wɛ́ nɛpɔ́ yi ɑ ɡʉ ŋ́ɡɛ pʉʉ tɛntɛ, ḿbɛn ńníꞋ mɛtʉʉ mʉ́ʉ nǔu wʉʉ nɛzɑ́p tʉ́m nǔu Sɛ́,

³ nɛpɔ́ yi ŋɡʉ̈ɔ́Ꞌ yi pʉʉ sɛ́ ńjʉ́ɔ ŋkɔ̂ɔnɛ, kɛ́ ɡɛ wɛcɔ́ ŋu tsɛtsɛt pʉʉ mʉꞋlɛ nǔu nu-Sɛ́ pɔ́. Pʉʉ zɛɛ ḿbɔ́ ńjí yʉ́ʉ ŋɡɔ ŋɡʉ̈ɔ́Ꞌ ɡẅɛɛ nɛkúu wɛkŋɛ pɑzɑptʉ́m nǔu Sɛ́.

⁴ Pʉʉ kẅíitɛ pɑ́Ꞌ pɛk kɑ pɛ́tnɛ tsɛtsɛt pʉʉ, ḿbiitɛ ɛ́sẅíi wʉ́ʉ ŋɡɔ ŋɡʉ̈ɔ́Ꞌ ɡʉ ńtɔ́ nǔu pɛkŋɛ. Ɛ́ kɑ kɛ́ ńtɔ́ tɛ pʉʉ pɔ́ ńjí yʉ́ʉ.

⁵ Ɛ́ yúu mi ɛ́ kɑ ɡɛnɛ lɑ m bɔɔ pɛn ŋ́kuꞋ nɛzẅíꞋlɛ pɔ́, ńtsʉ́Ꞌ ńtúu Timɔtɛ̂ɛ, ŋɡɔ ɑ ɡʉ ńjʉ́ɔ pɑ́Ꞌ wʉʉ nɛzɑ́p tʉ́m nǔu Sɛ́ kɑ tsʉ́Ꞌnɛ ḿbɔ́ pɔ́Ꞌɔ, ŋ́ɡɔ ńtúu wɛ́, ḿbɔ́ ḿbɔ́k ŋɡɔ Sɑ́ttɑ kɑ tsʉ́Ꞌ ŋ́kwɑꞋlɛ wʉ́ʉ tɛ fɑꞋ yi pɛk kɑ fɑꞋnɛ lɛɛ níinɛ.

⁶ Lɑ́ ɛ́ nǔu ŋkɔ̂ɔnɛ, mbɔ ɑ fú lɑ́Ꞌ pʉʉ ḿbɛn tɛ ŋ́kúu zɑꞋnɛ. A sẅíi wɛ́k nɛ́ nu nǔu wʉʉ nɛzɑ́p tʉ́m nǔu Sɛ́, nǔu ŋkɔŋɛ yi pʉʉ ɡẅɛɛnɛ, tɛ nu pɔŋ wɛ́k. A sẅíi wɛ́k pɑ́Ꞌ pʉʉ nɑŋnɛ ŋ́kẅíi wɛ́k pɔ sʉ́Ꞌnɛ, mbɑ pɑ́Ꞌ pʉʉ sɛ́ ńtsɑ́ɑ nɛpɛn ńjʉ́ɔ wɛ́k pɑ́Ꞌ pɛk ɡúu sɛ́ ńtsɑ́ɑ nɛpɛn ńjʉ́ɔ wʉ́ʉ.

⁷ Pɔ́ɔpɛ́mɑ́, pɛk zúꞋ pɔ́Ꞌɔ, mɛnu zɛɛ ḿbɔ́ ɛ́fyɛ́t wɛ́k fyɛ́tnɛ, pɛk zɛɛ ḿbɔ́ ńjʉ́ɔ pɔ ŋɡʉ̈ɔ́Ꞌ lɑ́, nu yʉ́ʉ mbɑ wʉʉ nɛzɑ́p tʉ́m nǔu Sɛ́ níꞋ mɛtʉʉ mɛ́k níꞋnɛ.

⁸ Ɛ́ ŋkɔ̂ɔnɛ, pɛk zúꞋ ɛ́ pɔŋ, mbíꞋŋɡɔ pʉʉ ŋkɑɑ kɑ́ɑ nɛpɔ́ pɔ nzʉʉ Tsɑpʉɔ pɔ́,

⁹ ḿbɔ́ pɛk ɡɑ́ pɑ́Ꞌlɑ́ mbɔ̌ Sɛ́ kwɑꞋ ŋɡɔ́ku ntɛ́ wʉ́ʉ? A sɛ́ ŋ́ɡɛ pɛk ɡẅɛɛ tsɑ́ɑtɛ pɑ́ꞋtɛꞋ ntɛ́ wʉ́ʉ.

¹⁰ Ɛ́ ɡʉ nǔu ŋkɑ́ yi pɛk sɛ́ ḿbúꞋ mbɔ́ mbɔ̌ Sɛ́, nɛnɛm, kɛ nɛtúꞋ ɔɔ, pɛk lɑɑ mbɔ̌ wɛ́ tɛꞋ, ŋɡɔ ɑ ɡɛ pɛk pɛn ńjʉ́ɔ mɛshʉ́ mʉ́ʉ, pɛk pɛn ŋ́ɡɑ́ wʉ́ʉ nɛ́ yúu mi ɛ́ sɛ́ ńjɑ́k nǔu wʉʉ nɛzɑ́p tʉ́m nǔu wɛ́.

¹¹ Pɔ́Ꞌɔ, pɛk sɛ́ ńdɔ́ɔ ŋɡɔ jʉ́ Sɛ́ ɛ̂wɑ́, ẅí ɑ Tɑ̌ɑ wɛkŋɛ, mbɑ Yɛ́su ẅi ɑ Tsɑpʉɔ wɛkŋɛ tsɔ́Ꞌ sɛ̂ndúŋ pɛk tɔ́ tɛ ńjʉ́ɔ wʉ́ʉ.

¹² Pɛk pɛn ḿbɔ́ ńdɔ́ɔ ŋɡɔ Tsɑpʉɔ ɡɛ ŋkɔŋɛ yi pʉʉ ɡẅɛɛnɛ tsɛtsɛt pʉʉ, mbɑ yi pʉʉ ɡẅɛɛnɛ nǔu pɛcɔ́ pʉɔmɛsɔŋ tsʉʉ, ɛ́ kẅiꞋ kẅiꞋnɛ, ŋɡɔ ɑ ɡɛ ɛ́ pɔ́ pɑ́Ꞌ yi pɛk ɡẅɛɛnɛ nǔu pʉʉ,

¹³ ḿbɛn ŋ́ɡɛ tʉ́m yʉ́ʉ kɛ́ ḿbɔ́ ńzɑpmɛ pɔ nǔu wɛ́. Lɑ ɛ́ lɑ́Ꞌ lɛ́Ꞌ yi Tsɑpʉɔ wɛkŋɛ Yɛ́su pɔ́p pʉɔ pi ɑ kɑ tsɔ́Ꞌnɛ tɔ́nɛ, pʉʉ tʉ́ʉ mbi Tɑ̌ɑ wɛkŋɛ Sɛ́, ḿbɔ́ ndɛ́ɛnɛ lɛ́ɛnɛ́nɛ, yɛcɔ́ lɔ́Ꞌ yʉ́ʉ pɔɔ pɔ́ ɡú pɔ́.