1 Tɛsɑlɔník 2 - Kɑɑ Fí

MɛfɑꞋ-Pɔ̂l Tɛsɑlɔ́nik

¹ Pɔ́ɔpɛ́mɑ́ pɛ́k nzʉʉ Kɛlístɔ, pʉʉ sɛ́ ńjí sʉ́Ꞌnɛ ŋɡɔ pɛk ŋ́kɑɑ tɔ́ tʉ́sɔŋ pʉʉ pɔ níinɛ pɔ́.

² Pʉʉ pɛn ḿbɔ́ ńjí ŋɡɔ pɛk kɑ ɡɔ́ ńtɔ́, ɛ́fú nɛ́ Filipɛ, mbɔ pɛ́ nyɛt wɛ́k nɛ́ ŋɡʉ̈ɔ́Ꞌ zúꞋu tɛꞋ, ńzɔɔtɛ wɛ́k. Lɑ́ Sɛ́ ɡɑ́ wɛ́k nɛ́ nɛsʉk nɛcẅi Ŋkʉʉ sʉ́Ꞌnɛ yɛ́ mbɔ̌ pʉʉ tɛ mbɑ pɑ́Ꞌ pɛ́ kɑ pɛn ḿbɔ́ ńnyɛt wɛ́k pɔ nɛ́ ŋɡʉ̈ɔ́Ꞌ lɑ́.

³ Nu yi pɛk zɛɛ ḿbɔ́ ɛ́sẅíi pʉɔ, ɛ́ kɑ́ pɔ́ nu yi ɛ́ ɡwɑ́ŋɛnɛ pɔ́, pɛk ŋ́kɑɑ ɡẅɛɛ kwɑŋɛ kɛpɔŋ pɔ́, ŋ́kɛ́ ḿbɔɔ tɑ́ɑ pɔ mɛzúŋ pɔ́.

⁴ Pɛk ńcú pɔ nu yi Sɛ́ sɛ́ ŋ́kɔŋ ŋɡɔ pɛk cú, mbíꞋŋɡɔ ɑ kɑ kwɑꞋnɛ wɛ́k tɛ ńjʉ́ɔ ŋɡɔ pɛk kuꞋ nɛcẅi Ŋkʉʉ sʉ́Ꞌnɛ yɛ́. Pɔ́Ꞌɔ lɑ́ pɛk pɔɔ ńcú nu pɔ nǔu ntɛ́ yi pʉɔ ɡʉ ŋ́kɔŋ wɛ́k pɔ́, pɛk cú nu pɔ nǔu ntɛ́ yi Sɛ́ ɡʉ ŋ́kɔŋ wɛ́k, jʉ́ ẅi ɑ líŋɛ́nɛ tʉ́m yɛ́k.

⁵ Pʉʉ sɛ́ ńjí sʉ́Ꞌnɛ ŋɡɔ pɛk ŋ́kɑɑ sẅiŋɛ sẅíŋɛ-lẅɑklɛ pɔ́, ŋ́kɛ́ mbɔɔ cú nu yi pɛk lɔk ńtsɑ́ɑ pii yi ɛ́ ɡʉ kúu pɑɑ pɛk pɔ́. Tɛ Sɛ́ pɔ́ ńjí.

⁶ Pɛk ŋ́kɑɑ píkŋɛ ŋɡɔ pɛ́ ɡɑ́ mɛkuꞋ mɛ́k pɔ́, kɛ pɔ pʉʉ nɛɡɑ́ pɔ́, kɛ pɔ pɛcɔ́ pʉɔ pɔ́.

⁷ Lɑ́, mbɔ pɛk kɑ kuꞋ nɛlɔk mɛtʉʉ ḿbíkŋɛ, mbíꞋŋɡɔ pɛk ɡɑŋntúu-Kɛlístɔ. Lɑ́ pɛk ŋ́kɑɑ pɔ́Ꞌɔ ɡɛ, pɛk kɑ pɔ́tnɛ yɛ́k pɔ́tnɛnɛ pɔ pɑ́Ꞌ Mɑ́mɔ́ɔ ẅi ɑ sɛ́ ńdíŋɛ mbɔ́ŋkʉ̈ɔ́ pɛ́ lɑ́.

⁸ Pɛk kɑ kɔŋ wʉ́ʉ kɔŋnɛ tɛ ńtʉ́ʉ pɑ́Ꞌ ḿbɔ́ pɛk pɔɔ ɡɑ́ pɔ ndɑꞋ Ŋkʉʉ Sʉ́Ꞌnɛ nu-Sɛ́ mbɔ̌ pʉʉ pɔ́, pɑ́Ꞌ mbɔ pɛk pɛn ŋ́ɡɑ́ mbɑ tú yɛ́k, mbíꞋŋɡɔ ɛ́ kɑ ɡɔ́ ḿbɔ́, mbɔ pʉʉ tsʉ́Ꞌ yúu-tʉʉndɛn mbɔ̌ pɛk.

⁹ Pʉʉ kẅíitɛ pɑ́Ꞌ ɛ́ kɑ pɔ́nɛ ŋkɑ́ yi pɛk kɑ pɔ́ ńcẅi Ŋkʉʉ Sʉ́Ꞌnɛ mbɔ̌ pʉʉ lɑ́, pɛk pɛn ɛ́fɑꞋ tɛ ŋ́kɑ́ɑ, lɑ ŋ́ɡẅɛɛ yúu kwɛ́tnɛ. Pɛk kɑ pɔ́ ɛ́fɑꞋ nɛnɛm ɛ́fɑ́Ꞌ nɛtúꞋ. Pɛk ŋkɑɑ kɔŋ nɛtsʉ́Ꞌ piꞋ mbɔ̌ wɛcɔ́ ŋu wʉʉ pɔ́.

¹⁰ Pʉʉ sɛ́ ńjí yúu mi pɛk kɑ ɡɛnɛ, Sɛ́ pɛn ḿbɔ́ ńjí yɛ́ mɑt wɛk tsɛtsɛt pʉʉ pɑpɛ́m sẅiŋɛ-sɛ́, Ɛ́ kɑ pɔ́ sʉ́Ꞌnɛ. Pɛk pɔ́ ndʉ́ŋndʉŋ yɛcɔ́ lɔ́Ꞌ yɛ́k pɔɔ ɡú pɔ́.

¹¹ Pʉʉ pɛn ḿbɔ́ ńjí ŋɡɔ pɛk ḿbɔ́ nɛjɔ́ŋ mbɑ wɔ̌ lɑ́ nǔu pʉʉ, ŋ́ɡɛ pɔ pɑ́Ꞌ tɑ́mɔ́ɔ ɡɛ nɛjɔ́ŋ mbɔ́ŋkʉ̈ɔ́ pɛ́ lɑ́.

¹² Pɛk kɑ níꞋ mɛtʉʉ mʉ́ʉ, ńníꞋ tʉ́m yʉ́ʉ, ńtsuŋ ńcú mbɔ̌ pʉʉ ŋɡɔ pʉʉ nɛn nǔu sɛ̂ndúŋ ẅi Sɛ́ sɛ́ ŋ́kɔŋ. Jʉ́ ẅi ɑ sɛ́ ɛ́fúŋ wʉ́ʉ tsɛt nɛfɔɔ nɛ́, tsɛt nɛɡúꞋ wɛ.

¹³ Yɛcɔ́ yúu mi ɛ́ ɡɛnɛ pɛk ɡɑ́ pɑ́Ꞌlɑ́ mbɔ̌ Sɛ́ ŋkɑ́ tsʉʉ, ɛ́ mbíꞋŋɡɔ pɛk kɑ sẅíi nu-Sɛ́ mbɔ̌ pʉʉ, pʉʉ zúꞋ, ḿbɛ́m ŋɡɔ ɛ́ sẅiŋɛ-sɛ́, ŋɡɔ ɛ́ kɑ́ pɔ́ sẅiŋɛ-ŋumɛsɔŋ pɔ́. Ɛ́ sɛ́ ɛ́fɑꞋ tsɛt tʉ́m yʉ́ʉ, pʉʉ pí pʉʉ kɑ zɑ́pnɛ tʉ́m yʉ́ʉ nǔu Yɛ́su.

¹⁴ Pɔ́ɔpɛ́mɑ́, ŋɡʉ̈ɔ́Ꞌ yi ɛ́ kɑ kúunɛ pʉɔ-Kɛlístɔ Judɛ̂ pi pɔ́p kɑ zɑ́pnɛ tʉ́m nǔu Kɛlístɔ, ńcúꞋlɛ ńtsʉ́Ꞌ pʉɔ-Sɛ́, kɑ kúu wʉ́ʉ ɡúu. N cú mbíꞋŋɡɔ pʉɔ lɑ́Ꞌ pʉ́ʉ kɑ nyɛt wʉ́ʉ nɛ́ ŋɡʉ̈ɔ́Ꞌ, ɛ́ pɔ́ pɑ́Ꞌ pɑyúdɑ, pʉɔ-lɑ́Ꞌ pɔ́p ɡúu, kɑ nyɛtnɛ wɔ́p nɛ́ ŋɡʉ̈ɔ́Ꞌ.

¹⁵ Pɑyúdɑ ɛ̂pɑ́ kɑ jẅí pɑcẅiŋkʉʉ-Sɛ́ pɛ́ ŋkɑ́mbi, pɔ́p kɑ pɛn ńjẅí Tsɑpʉɔ Yɛ́su. Pɔ́p pɛn ḿbɔ́ ŋ́kʉ́ʉnɛ wɛ́k. Pɔ́p kɑ́ pɔ́ ŋ́ɡɛ yúu mi ɛ́ pɔŋnɛ Sɛ́ pɔ́, pɔ́p pɑɑ pʉɔ tsʉʉ.

¹⁶ Pɔ́p sɛ́ ɛ́sɑ́Ꞌ tʉʉ ńtɔꞋ wɛ́k nɛsẅíi nu-Sɛ́ mbɔ̌ pʉɔ pi pɔ́p kɑ́ pɔ́ pɑyúdɑ pɔ́, ḿbɔ́k pɑ́Ꞌ ɛ́ ɡʉ ŋ́ɡɛ pɔ́p luk. Ɛ́ pɔ́Ꞌɔ, ńdɔk ŋ́kẅiꞋ ndɛnnú kɛpɔŋ yɔ́p kẅiꞋnɛ. Sɛ́ kɑ kɛ́ ńzɑ́ŋ lɔ́ŋ tɛ ńzɑ́p pɔ́ yɛ́ nǔu pɔ́p.

Pɔ̂l sɛ́ ńtsɑ́ɑ nɛpɛn ńjʉ́ɔ pʉɔ-Tɛsɑlɔník

¹⁷ Ɛ́ ɡʉ nǔu pɛk, mbɑ pɔ́ɔpɛ́mɑ́, tɛ fúnɛ pɑ́Ꞌ pɛkŋɛ kɑ fyɑkŋɛ́nɛ, tɛ pɛkŋɛ pɔɔ ḿbɛ́t ńjʉ́ɔnɛ nǔu mɛshʉ́ pɔ́, lɑ́ ŋ́kɛ́ ŋ́ɡẅɛɛ pɔ tɑ́Ꞌ kwɑŋɛ lɑ́, pɛk lɔɔ shʉ́ tɛꞋ nɛpɛn ńtɔ́ pɛkŋɛ jʉ́ɔnɛ nǔu mɛshʉ́, mbíꞋŋɡɔ nji yʉʉ sɛ́ ńzɑ́ŋ wɛ́k tɛꞋ.

¹⁸ Ɛ́ nɛ́nẅín ŋɡɔ pɛk kɑ kɔŋ nɛpɛn ńtɔ́ lɑ́Ꞌ pʉʉ, kwɑꞋ mɔ Pɔ̂l, n dɔɔ mɛshʉ́ mɛku tɛ ńzɑ́ɑ lɑ́ Sɑ́ttɑ kɛ́ ńtɑɑtɛ wɛ́k tɑɑtɛ́nɛ.

¹⁹ Pʉʉ zɛɛnɛ ḿbɔ́ pʉɔ pi pɔ́p ɡɛnɛ pɛk pɔ́ ńzẅíꞋlɛ lɛ́Ꞌlɑ́Ꞌ-Tsɑpʉɔ Yɛ́su tɛꞋ. Pʉʉ pɔ́nɛ yɛ́k tsɑ́ɑtɛ, ḿbɔ́ yɛ́k ŋɡúꞋ yi pɛk ɡʉ ńdɑ́Ꞌ ńdɔk ńtʉ́ʉ mbi Tsɑpʉɔ wɛkŋɛ, ŋkɑ́ yi ɑ ɡʉ ńdɑ́Ꞌ ḿbɛn ńtɔ́.

²⁰ Ɔ́ɔŋ pʉʉ wɛk nɛɡúꞋ, ḿbɔ́ yɛ́k tsɑ́ɑtɛ.