زَبور 98 - هُدائے پاکێن کتاب، بلۆچی زبانا

نۆکێن سئوتے بجنێت

زَبورے.

¹ په هُداوندا نۆکێن سئوتے بجنێت، که اَجَبێن کاری کرتگ، آییئے راستێن دست و پاکێن باسکا سۆب و پیرۆزی کَٹّتگ.

² هُداوندا هما نجات پێش داشتگ که چه آییئے نێمگا اِنت، وتی اَدلی کئومانی چمّان پدّر کرتگ.

³ آییا په اِسراییلئے اۆبادگان وتی مِهر و وَپا یاتا آورتگ، زمینئے سجّهێن گُڈّی هَدّ و سیمسران، مئے هُدائے داتگێن نجات دیستگ.

⁴ او سجّهێن زمین! په هُداوندا شادمانیئے کوکّارا بُرز کن. کوکّار کنێت، په شادهی سئوت بجنێت، بنازێنێت.

⁵ په هُداوندا چنگ و ساز بجنێت، گۆن سازا سئوت بجنێت.

⁶ گۆن سُرنا و گوَرانڈئے کانٹا بادشاهێن هُداوندئے بارگاها، شادهیئے کوکّارا چست کنێت.

⁷ دریا و دریائے تهئے سجّهێن چیزّ گرَنداتنت، جهان و آییئے سجّهێن جهمنند.

⁸ کئور چاپ بجناتنت و کۆه په شادمانی سئوت،

⁹ هُداوندئے بارگاها سئوت بجناتنت، که آ په زمینئے دادرسیا کئیت. آ جهانا په اَدل دادرسیَ کنت و کئومان په اِنساپ.