زَبور 83 - هُدائے پاکێن کتاب، بلۆچی زبانا

او هُداوند! بێتئوار مبئے

اَساپئے زَبور. سئوتے.

¹ او هُدا! بێتئوار مبئے، هامۆش مبئے و هُشکا مَنِند، او هُدا!

² بچار که تئیی دژمن چه پئیما گُرّنت و چه تئو نپرت کنۆکانی سر چۆن بُرز اِنت.

³ تئیی کئومئے هلاپا په چالاکی پندلَ سازنت و تئیی گران‌کَدرێنانی هلاپا شئور و سلاهَ کننت.

⁴ گوَشنت: ”بیاێت گار و گُمسارِشَ کنێن که کئومے مماننت و اِسراییلئے نام په یاتێا هم پَشت مکپیت.“

⁵ په همدلی شئورِش کرتگ و تئیی هلاپا اَهدے بستگِش.

⁶ اِدومی و اِسماییلی، موآبی و هاگاری،

⁷ گێبالی، اَمّونی و اَمالیکی، پیلیستی و سورئے نندۆک،

⁸ آشوری هم گۆن آیان همراه اَنت و په لوتئے چُکّان باسکے بوتگ‌اَنت. اۆشت...

⁹ گۆن آیان هما پئیما بکن که تئو گۆن میدیانا کرت، گۆن سیسِرا و یابینا، کیشونئے کئورئے کرّا،

¹⁰ که اِندۆرا تباه بوتنت و زمینئے کَد و سَمات بوتنت.

¹¹ اِشانی سرداران اُرێب و زِهێبئے پئیما کن، شهزادگانِش زِبَه و زَلمونّائے ڈئولا،

¹² که گوَشتگ‌اَتِش: ”بیاێت هُدائے چراگاهان په زۆرَ گِرێن.“

¹³ او منی هُدا! اِشان دَنزێئے پئیما بال دئے، چۆ که پَلارے، گواتئے دێما.

¹⁴ اَنچش که آس جنگلا سۆچیت و کۆهان مانَ داریت،

¹⁵ گۆن وتی توپّانان رَندااِش کپ و گۆن سیَه‌گواتان بتُرسێنِش،

¹⁶ دێمااِش چه شرما سیاه کن تانکه تئیی نامئے شۆهازا ببنت، او هُداوند!

¹⁷ شرمسار بات و اَبدی تُرسێا کپاتنت، رُسوا بات و بمِراتنت.

¹⁸ بِلّ بزاننت که تئیی نام هُداوند اِنت و تهنا تئو، او بُرزێن اَرشئے هُدا، سجّهێن زمینئے سرا هاکمیَ کنئے.