زَبور 82 - هُدائے پاکێن کتاب، بلۆچی زبانا

نزۆرانی هَکّا بگرێت

اَساپئے زَبور.

¹ هُدا، وتی هُدایی بارگاها برجم اِنت، ”هُدایانی“ دیوانا دادرسیَ کنت.

² تان کدێن په نااِنساپی شئورَ بُرّێت؟ تان کدێن بدکارانی بدلا بێت؟ اۆشت...

³ نزۆر و چۆرئوانی دادرسیا بکنێت و گریب و سِتم دیستگێنانی هکّا بگرێت.

⁴ نێزگار و هاجتمندان برَکّێنێت و چه بدکارانی دستا آزات کنێت.

⁵ اے ”هُدا“ هچَّ نزاننت و سرپدَ نبنت، تهاریا سرگردان اَنت و زمینئے سجّهێن بُنیاد لرزگا اَنت.

⁶ گوَشتُن: ”شما ’هُدا‘ اێت و شما سجّهێن، بُرزێن اَرشئے هُدائے چُکّ اێت،

⁷ بله مردمانی پئیما مرێت و شهزادگانی پئیما سرشکونَ بێت.“

⁸ او هُدا! جاه جن و زمینئے دادرسیا بکن، که سجّهێن کئوم تئیی میراس اَنت.