زَبور 81 - هُدائے پاکێن کتاب، بلۆچی زبانا

دْرێگتا منی کئوما منی هبر گۆش بداشتێن

په سازگر و وش‌آوازانی سالارا. ”گیتّیتئے“ تَرزئے سرا. اَساپئے زَبور.

¹ هُدایا په شادهی بنازێنێت که مئے زۆر و واک اِنت، په آکوبئے هُدایا شادمانیئے کوکّارا بُرز کنێت.

² ساز و تَمبورگا بُنگێج کنێت، وشتئوارێن چنگ و سُرۆدان.

³ ماهئے نۆکا، گوَرانڈئے کانٹئے تئوارا بُرز کنێت، ماهئے چاردها، مئے پاکێن اییدا.

⁴ اے په اِسراییلا هُکمے، رهبندے چه آکوبئے هُدائے نێمگا.

⁵ وهدے مِسرئے هلاپا در آتک کانونے په ایسُّپا اِشتی. من اِشکت، ناآشناێن زبانێا گوَشت:

⁶ ”بارُن چه آییئے کۆپگا دور کرت و دست چه گرانێن سَپتا آزات کرتنت.“

⁷ تئو سکّیانی ساهتان پریات کرت و من ترا رَکّێنت، من گْرندان اَندێم اتان و ترا پَسّئو دات، مِریبائے آپانی کرّا ترا چکّاستُن. اۆشت...

⁸ او منی کئوم! بِشکن که ترا ڈاهَ دئیان، او اِسراییل! دْرێگتا تئو منی هبر گۆش بداشتێن.

⁹ شمئے نیاما درامدێن هُداے مبات و بیگانگێن هُداێئے دێما سرا جَهل مکنێت.

¹⁰ من هُداوند آن، تئیی هُدا که ترا چه مِسرا در کرت و آورت. وتی دپا سَرجما پَچ کن، که من پُرّیَ کنان.

¹¹ ”بله کئوما منی هبر گۆش نداشت و اِسراییل منی پرمانبَردار نبوت.

¹² گڑا من آ یله داتنت که وتی سِنگێن دلانی رَندگیریا بکننت، وتی جندئے راه و هئیالانی.

¹³ دْرێگتا منی کئوما منی هبر گۆش بداشتێن و اِسراییل، منی راها بشُتێن.

¹⁴ آ وهدا من دمانا آیانی دژمن پرۆش داتگ‌اتنت و منی دست آیانی دژمنانی هلاپا چست بوتگ‌اَت.

¹⁵ هما که چه هُداوندا نپرتَ کننت، دوتل و سرجهل بوتگ‌اتنت، تان اَبد اَنچش بوتگ‌اَت.

¹⁶ بله ترا گهترێن گندمئے وراکُن داتگ‌اَت و ترا چه تلارا در کرتگێن بێنَگا سێرُن کرتگ‌اَت.“