زَبور 76 - هُدائے پاکێن کتاب، بلۆچی زبانا

هُدائے دێما کئے اۆشتاتَ کنت؟

په سازگر و وش‌آوازانی سالارا. گۆن سیمّی سازان. اَساپئے زَبور. سئوتے.

¹ یَهودیَها هُدا زانگ و پجّاه آرگَ بیت، اِسراییلا آییئے نام مزن اِنت.

² آییئے تَمبو شَلیما اِنت و منندجاه، سَهیونا.

³ آسگوارێن تیری همۆدا پرۆشتنت، زَهم و اِسپر هم، که جنگی سِلاه اَنت. اۆشت...

⁴ تئو دْرپشان ائے و شئوکت و شانِت، چه آ کۆهِستگان زێباتر اِنت که شکارا پُرّ اَنت.

⁵ دلێر آوار جَنَگ بوتنت، وتی گُڈّی وابا اَنت، چه جنگاوران یکّے هم نمنت که دستے بسُرێنیت.

⁶ او آکوبئے هُدا! چه تئیی نهِرّان، آیانی اَرّابه و اسپان سر په مَرکئے وابا دات.

⁷ تئو باکَمال ائے، وهدے هِژمَ گرئے، کئے تئیی دێما اۆشتاتَ کنت؟

^8-9 تئو چه آسمانا دادرسیَ کنئے و وهدے تئو، او هُدا، په دادرسیا جاهَ جنئے که زمینئے سجّهێن ستم دیستگێنان نجات بدئیئے، زمین چه تُرسا چُپ و بێتئوارَ بیت. اۆشت...

¹⁰ په انسانا تئیی هِژم هم تئیی سَتائے سئوَبَ بیت و پَشت کپتگێن هِژما تئو وتی لانکا بندئے.

¹¹ گۆن وتی هُداوندێن هُدایا کئول بکنێت و وتی زبانئے سرا بۆشتێت، آ سجّهێن که کِرّ و گوَران اَنت په هماییا ٹێکی بیارنت که باکَمال اِنت.

¹² آ هاکمانی گرورانَ پرۆشیت، زمینئے بادشاه چه آییا تُرسنت.