زَبور 74 - هُدائے پاکێن کتاب، بلۆچی زبانا

او هُدا! چیا مارا یله داتگِت؟

اساپئے شئیری گوَشتانک.

¹ او هُدا! چیا مارا تان اَبد یله داتگِت؟ په چے تئیی هِژمئے آس په تئیی چَراگاهئے پسان رۆک اِنت؟

² وتی کئومئے یاتا بکپ، که تئو چه دێرێن زمانگان په بها زرتگ‌اتنت، که تئو مۆکِتگ‌اَنت تان تئیی کئوم و میراس ببنت. سَهیونئے کۆهئے هئیالا بکپ که اۆدا جهمنند بوتگئے.

³ وتی گامان دێم په وتی همے مُدامیگێن وئیرانگان بترّێن، چیا که دژمنا هر چیزّ بێران کرتگ که تئیی پاکێن جاگها بوتگ.

⁴ دژمنان تئیی دیدارجاهئے تها گُرِّت و وتی بئیرک په نشانیا مِکّ کرتنت.

⁵ همایانی پئیما اتنت که وتی تپران جنگلئے درچکانی سرا بُرزَ برنت.

⁶ آیان، تئیی پاکێن جاگهئے سجّهێن آجِتگێن دار گۆن وتی تپر و تێشگان پرۆشت و هورت کرتنت.

⁷ تئیی پاکێن جاگه‌اِش آس کَشِّت و هاک و پُر کرت، تئیی نامئے منندجاهِش پَلیت کرت.

⁸ وتی دلا گوَشتِش: ”آیان سَرجمیا وتی پنجگئے چێرا کارێن،“ گڑا هُدائے سجّهێن دیدارجاهِش اے سرڈگارا سۆتکنت.

⁹ نون هچ نشانیے نگندگا اێن، هچ نبیے پَشت نکپتگ و چه ما کَسّ هم نزانت که تان کدێن اے پئیما بیت.

¹⁰ او هُدا! تان کدێن دژمن تئیی سرا بکندیت؟ دژمن تان اَبد تئیی ناما بَد و رَد بکنت؟

¹¹ چیا وتی دستا پُشتا دارئے، وتی راستێن دستا؟ دستا پَچ کن و په آیان گاری و تباهیے بیار.

¹² بله هُدا چه دێرێن زمانگان منی بادشاه اِنت، که زمینئے سرا نجات‌بَکشێن کارَ کنت.

¹³ اے تئو اتئے که دریااِت گۆن وتی زۆر و واکا دو نێم کرت و دریائے بَلاهانی سرِت آپانی نیاما پرۆشتنت،

¹⁴ لیویاتانئے سرِت پرۆشتنت و گیابانئے سَهدارانی وراکِت کرت.

¹⁵ جۆ و سرچمّگ، تئو رُمبێنت و رئوان کرتنت، مُدامیگێن کئور، تئو هُشک کرتنت.

¹⁶ رۆچ تئییگ اِنت و شپ هم تئیی ماه و رۆچ تئو برجاه داشتگ‌اَنت.

¹⁷ اے تئو اتئے که زمینئے هَند و سیمسرِت گیشّێنتنت، گرماگ و زمستانئے اڈّ کنۆک تئو ائے.

¹⁸ او هُداوند! یاتا بکپ که دژمن چِه پئیما مسکرا کننت و نازانتێن مردم تئیی ناما چِه پئیما بَد و رَدَ گوَشنت.

¹⁹ وتی کپۆتا رسترانی وراک مکن و ستم دیستگێن کئومئے زندا تان اَبد مشمۆش.

²⁰ وتی بستگێن اَهدا بدار، چیا که اے سرڈگارئے تهارێن جاگه چه زُلم و زۆرئے کُدۆه و کُداما پُرّ اَنت.

²¹ مئیل که پادمالێن مردم گۆن رسوایی پد بکِنزنت، سِتَم دیستگ و هاجتمند تئیی ناما ستا بکناتنت.

²² او هُدا! جاه جن و وتی هکّئے دێمپانیا بکن، یاتا بکپ که نازانت سجّهێن رۆچا چِه پئیما تئیی سرا کندنت.

²³ وتی دژمنانی کوکّاران مشمۆش، دژمنانی شۆرشا که مُدام بُرزاد اِنت.