زَبور 67 - هُدائے پاکێن کتاب، بلۆچی زبانا

سجّهێن کئوم ترا ستا کناتنت

په سازگر و وش‌آوازانی سالارا. په سیمّی سازان. زَبورے. سئوتے.

¹ هُدا مئے سرا مهربان بات، مارا برکت بدئیات و وتی دێما په ما دْرپشان کنات، اۆشت...،

² تانکه تئیی راه جهانا زانگ ببیت و تئیی داتگێن رَکّێنگ سجّهێن کئومانی نیاما.

³ او هُدا! کئوم ترا ستا کناتنت، سجّهێن کئوم ترا ستا کناتنت.

⁴ کئوم شادهی کناتنت و شادمانیئے گوانکا بجناتنت، چیا که تئو کئومانی سرا په اِنساپ دادرسیَ کنئے و جهانئے کئومانی رهشۆنَ بئے. اۆشت...

⁵ او هُدا! کئوم ترا ستا کناتنت، سجّهێن کئوم ترا ستا کناتنت.

⁶ زمینا وتی بَر و سَمر داتگ، هُدا، مئے هُدا، مارا برکت بدئیات.

⁷ هُدا مارا برکت بدئیات تانکه زمینئے چار کُنڈ آییئے مزنیا شرپ بدئینت.