زَبور 3 - هُدائے پاکێن کتاب، بلۆچی زبانا

او هُداوند! پاد آ

داوودئے زَبور، هما وهدا که چه وتی چُکّ اَبشالوما جِهَگا اَت.

¹ او هُداوند! منی دژمن چنکدر باز اَنت. بازێنے منی هلاپا پاد آیگا اِنت.

² بازێنے منی بارئوا گوَشگا اِنت: ”هُدا اِشیا نرَکّێنیت.“ اۆشت...

³ بله تئو او هُداوند! وت منی چاگردا اِسپر ائے، منی شان و شئوکت ائے، منا سرپرازَ کنئے.

⁴ هُداوندُن گۆن بُرزێن تئوارے پریاتَ کرت و آییا چه وتی پاک و گچێنیێن کۆها منا پَسّئو دات. اۆشت...

⁵ من آسودگ وپتان و پاد آتکان، چیا که هُداوند منی پُشت و پناه اَت.

⁶ چه لَکّانی لَکّا نترسان که چه هر نێمگا منا اَنگرِّش کرتگ.

⁷ او هُداوند! پاد آ. او منی هُدا! منا برَکّێن. تئو ائے که منی دژمنانی دێما شهماتَ جنئے و بدکارانی دپ و دنتانانَ پرۆشئے.

⁸ رَکّێنۆک هُداوند اِنت، تئیی برکت تئیی کئوما برسات! اۆشت...