زَبور 20 - هُدائے پاکێن کتاب، بلۆچی زبانا

او هُداوند! بادشاها سۆب و پێرۆزی بدئے

په سازگر و وش‌آوازانی سالارا. داوودئے زَبور.

¹ هُداوند ترا سکّی و سۆریانی رۆچا پَسّئو بدئیات، آکوبئے هُدائے نام ترا نگهپان بات.

² چه وتی پاکێن جاگها په تئو کُمک برسێنات و چه سَهیونا ترا مَدَت کنات.

³ تئیی سجّهێن کُربانیگان وتی یاتا بدارات، تئیی سۆچگی کُربانیگانی مَنّۆک بات. اۆشت...

⁴ تئیی دلئے واهگان برجاه دارات و تئیی سجّهێن شئوربندیان کامیاب کنات.

⁵ تئیی سۆب و پێرۆزیا گۆن شادمانی کوکّار بکنێن و وتی بئیرکا تئیی نامئے سرا بُرزاد بچنڈێنێن. هُداوند تئیی سجّهێن دَزبندیان پوره و سَرجم بکنات.

⁶ نون زانتُن که هُداوند وتی رۆگن پِر مُشتگێنا رَکّێنیت و چه وتی پاکێن آسمانا آییا پَسّئوَ دنت، گۆن وتی راستێن دستئے رَکّێنۆکێن واک و تاگتا.

⁷ لهتێن وتی اسپ و اَرّابهانی سرا پَهرَ کننت، بله ما وتی هُداوندێن هُدائے نامئے سرا پَهرَ کنێن.

⁸ آ سرێن‌پرۆشَ بنت و کپنت، بله ما پادَ کاێن و مُهرَ اۆشتێن.

⁹ او هُداوند! بادشاها سۆب و پێرۆزی بدئے. تئوار که کنێن، مئے پَسّئوا بدئے.