زَبور 15 - هُدائے پاکێن کتاب، بلۆچی زبانا

کئے تئیی پاکێن کۆها جهمنند ببیت

داوودئے زَبور.

¹ او هُداوند! کئے تئیی تمبوا مهمان ببیت؟ کئے تئیی پاکێن کۆها جهمنند ببیت؟

² هما که بےائیب گام بجنت، اَدل و اِنساپا برجاه داریت و په دلسِتکی راستێنا بگوَشیت،

³ هما که گۆن وتی زبانا کَسێئے باپُشتا هبرے مگوَشیت، په همساهگا بدی مکنت و همراهان اێر مجنت،

⁴ هما که بدکار آییئے چمّان هکیر و بے‌ارزش ببنت، هُداتُرسان اِزّت و هُرمت بدنت و وتی لبزئے سرا وپا بکنت، تُرے زَلَر و زیان بگندیت،

⁵ هما که وتی زرّا په سوتّ مدنت و بێگُناهێئے هلاپا رشوَت مگیپت، آ که اِشان برجاهَ داریت هچبرَ نلرزیت.