زَبور 149 - هُدائے پاکێن کتاب، بلۆچی زبانا

په هُداوندا نۆکێن سئوتے بجنێت

¹ هُداوندا بنازێنێت، هَلّێلویا. په هُداوندا نۆکێن سئوتے بجنێت و آییا، آییئے وپادارانی مُچیا بنازێنێت.

² اِسراییل په وتی اَڈّ کنۆکا شادهی بکنات، سَهیونئے چُکّ په وتی بادشاها گَل باتنت.

³ گۆن ناچ آییئے ناما ستا بدئیات و آییا گۆن ژانگ و چَنگ بنازێناتنت.

⁴ چێا که هُداوند چه وتی کئوما وشنۆد اِنت، آ بێکِبران سۆبمندیئے تاجا بَکشیت.

⁵ آییئے وپادار گۆن اے پهرا شادهی بکنات و وتی گندلانی تها شادهیئے سئوت بجناتنت.

⁶ هُداوندئے ستا و سنااِش دپا بات و دودپێن زهمِش دستا

⁷ که چه راجان بێر بگرنت و کئومان سزا بدئینت،

⁸ بادشاهانِش په زمزیل ببندنت و سردارانِش په آسنێن پادبَند،

⁹ تانکه هما دادرسیا برجاه بکننت که اِشانی هلاپا نبشته کنگ بوتگ، اے، آییئے سجّهێن وپادارانی شان اِنت. هُداوندا بنازێنێت، هَلّێلویا.