زَبور 128 - هُدائے پاکێن کتاب، بلۆچی زبانا

هُداتُرسیئے بَهتاوری

دێم په اورشَلیما برزاد رئوگئے سئوتے.

¹ بَهتاور هما اِنت که هُداوندئے تُرسی دلا اِنت و آییئے پرمانبرداریا گامَ جنت.

² تئو وتی زَهمتئے بَر و سمرا ورئے و بهتاور و وشهالَ بئے.

³ تئیی جَن تئیی لۆگئے تها چۆ بر آورێن انگورا بیت، تئیی چُکّ تئیی پرزۆنگئے چَپّ و چاگردا چۆ زئیتونئے نهالا بنت.

⁴ هئو، هما مردم که هُداوندئے تُرس آییئے دلا اِنت همے ڈئولا بَهتاورَ بیت.

⁵ هُداوند چه سَهیونا ترا برکت بدئیات، اورشَلیمئے آبادیا بگنداتئے، وتی زِندئے سجّهێن رۆچان.

⁶ وتی چُکّانی چُکّان بگنداتئے، اِسراییل اێمن و سلامت بات.