زَبور 126 - هُدائے پاکێن کتاب، بلۆچی زبانا

مئے وشبهتیا پدا بیار

دێم په اورشَلیما برزاد رئوگئے سئوتے.

¹ وهدے هُداوندا سَهیونئے وشبَهتی پِر تَرّێنت و آورت ما پوره واب گندگا اتێن.

² مئے دپ چه کَندگا پُرّ اَت، زبان چه شادهیئے سئوتا. آ وهدا کئومانی نیاما گوَشگ بوت: ”هُداوندا په اِشان مزنێن کار کرتگ.“

³ هئو، هُداوندا په ما مزنێن کار کرت، ما گَل اَتێن.

⁴ او هُداوند! مئے وشبهتیا پدا بیار، انچۆ که کئور نێگێوئے گیابانا آبادیَ کاریت.

⁵ هما که اَرس رێچانا کِشت و کِشارَ کننت، په شادهی کوکّار کنانا رُننت.

⁶ هما که گرێوانا درَ کپیت و تُهمان په کِشَگا بارت، په شادهی کوکّار کنانا واتَرَّ کنت و وتی لۆٹُکانَ کاریت.